- କିରାନା ଦୋକାନରୁ କେବଳ ସାମଗ୍ରୀ ଚୋରି ଅଭିଯୋଗ
- ପୁଲିସର ତନାଘନା ତଦନ୍ତ
- ଥାନାରେ ମାମଲା ରୁଜ୍ଜୁ
ମୁରିବାହାଲ, (ଦୁର୍ଗାନନ୍ଦ ମହାକୁର) : ବଲାଙ୍ଗିର ଜିଲ୍ଲା ମୁରିବାହାଲ ସଦର ମହକୁମା ବଜାରପଡ଼ାରେ ଥିବା ୪ଟି ବିଭିନ୍ନ ଦୋକାନରେ ଗୁରୁବାର ବିଳମ୍ବିତ ରାତିରେ ଏକସଙ୍ଗେ ଦୁର୍ବୃତ୍ତମାନେ ତାଲା ଭାଙ୍ଗି ଚୋରି ଉଦ୍ୟମ କରିଥିବା ନେଇ ଥାନାରେ ଲିଖିତ ଅଭିଯୋଗ ହୋଇଛି । ବଜାର ପଡ଼ା ରାସ୍ତା ପାଖରେ କିରାନା ଦୋକାନ ଦେଇଥିବା ପାତଳପଡ଼ା ଗ୍ରାମର ଶ୍ରୀଜିତ୍ ଦାସ(୩୭) ଥାନାରେ ଦେଇଥିବା ଲିଖିତ ଏତଲା ଆଧାରରେ ସେ ଗତ ୧୪ତାରିଖ ରାତି ୮ଟାରେ ଦୋକାନ ବନ୍ଦ କରି ଘରକୁ ଯାଇଥିଲେ । ସେ ସକାଳୁ ଆସି ଦେଖିଲା ବେଳକୁ ତାଙ୍କ ଦୋକାନର ଦୁଇଟି ତାଲା ଭାଙ୍ଗି ଦୋକାନରେ ଥିବା ନଗଦ ୧୭ ହଜାର ୮୦୦ଟଙ୍କା, କିରାନା ସାମଗ୍ରୀ ହାରାହାରି ୧୫ହଜାର ଟଙ୍କାର କେହି ଦୁର୍ବୃତ୍ତ ଚୋରୀ କରିନେଇଥିବା ଜାଣିପାରି ସେ ଥାନାରେ ଲିଖିତ ଏତଲା ଦେଇଥିଲେ । ସେହିପରି ଦୁର୍ବୃତ୍ତମାନେ ପାଖ ଗୋବିନ୍ଦ ସେଠୀଙ୍କ ଔଷଧ ଦୋକାନର ମଧ୍ୟ ଦୁଇଟି ତାଲା ଭାଙ୍ଗି ଥିଲେ ମଧ୍ୟ ଭିତରକୁ ପଶି ନ ପାରି ଫେରିଯାଇଥିବା ଜଣାପଡିଛି । ସେଠାରୁ ଶହେ ମିଟର ଦୂର ଟୁନଟୁନି ମୁଣ୍ଡା ଛକରେ ଥିବା ଫ୍ଲିପକାର୍ଟ ଦୋକାନର ମଧ୍ୟ ଦୁଇଟି ତାଲାକୁ ଦୁର୍ବୃତ୍ତମାନେ ଭାଙ୍ଗିଥିଲେ ମଧ୍ୟ କୌଣସି ସାମଗ୍ରୀ ଚୋରୀ କରିନାହାଁନ୍ତି । ପାଖରେ ଥିବା ଅନ୍ୟ ଏକ ଦୋକାନ ଭିତରେ ଜଣେ ବ୍ୟକ୍ତି ଶୋଇଥିଲେ ମଧ୍ୟ ତାଙ୍କ ଦୋକାନର ତାଲା ମଧ୍ୟ ଦୁର୍ବୃତ୍ତମାନେ ଭାଙ୍ଗି ଦେଇଥିବା ଜଣାପଡିଛି । ଦୁର୍ବୃତ୍ତମାନେ କମ ବୟସର ୩ ଜଣ ଯୁବକ ଥିବା ଓ ରାତି ୧୧ଟା ପାଖାପାଖି ସମୟରେ ଦୋକାନ ଆଖପାଖରେ ବୁଲାବୁଲି କରୁଥିବା ଫ୍ଲିପକାର୍ଟ ଦୋକାନରେ ଲାଗିଥିବା ସିସିଟିଭି ଚିତ୍ରରୁ ଜଣାପଡିଛି । କିରାନା ଦୋକାନୀ ଶ୍ରୀଜିତଙ୍କ ଏତଲା ଆଧାରରେ ପୁଲିସ କେସ ନଂ ୩୪୫/୨୪ରୁଜ୍ଜୁ କରି ତୁରନ୍ତ ଘଟଣା ସ୍ଥଳରେ ପହଞ୍ଚି ତନାଘନା ତଦନ୍ତ ଜାରି ରଖିଥିବା ଥାନା ଆଇଆଇସି ସିପୋରା ସରାୟ ଲୁଗୁନ ପ୍ରକାଶ କରିଛନ୍ତି ।