- ଗଣତନ୍ତ୍ରରେ ସାଧାରଣ ଜନତାଙ୍କ ଭୂମିକା ଓ ସରକାରଙ୍କ ସମ୍ପର୍କିତ ଆଲୋଚନାଚକ୍ର
ବ୍ରହ୍ମପୁର, (କେପିଏନ୍ଏସ୍) : ବିଜିପୁରସ୍ଥିତ ସନ୍ତୋଷୀ ମା’ କଲ୍ୟାଣ ମଣ୍ଡପଠାରେ ସଂଗ୍ରାମୀ ସୁଭାଷ ପରିଡାଙ୍କ ନବମ ଶ୍ରାଦ୍ଧ ବାର୍ଷିକୀ ଉତ୍ସବ ପାଳିତ ହୋଇଯାଇଛି । ଏହି ଅବସରରେ ଗଣତନ୍ତ୍ରରେ ସାଧାରଣ ଜନତାଙ୍କ ଭୂମିକା ଓ ସରକାରଙ୍କ ଗତିବିଧି ସମ୍ପର୍କରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା । ଆଲୋଚନାଚକ୍ରରେ ରାଜ୍ୟର ବିଭିନ୍ନ ବାମପନ୍ଥୀ ସଂଗଠନ, ସାମାଜିକ କର୍ମୀ ଓ ଶିକ୍ଷାବିତମାନେ ଯୋଗଦେଇ ଦେଶର ଗଣତନ୍ତ୍ରର ହତ୍ୟା ଚାଲିଛି ଏବଂ ଇତିହାସରେ ବିକୃତିକରଣ ଭାରତର ଅସ୍ମିତାକୁ ନଷ୍ଟ କରୁଛି ବୋଲି ଦୃଢେ଼ାକ୍ତି ପ୍ରକାଶ କରିଥିଲେ । ସମସ୍ତ ବକ୍ତା ସୁଭାଷ ବାବୁ ଜଣେ ସରକାରୀ କର୍ମଚାରୀ ରହି ସମସ୍ତ ଗଣତାନ୍ତ୍ରିକ ଆନ୍ଦୋଳନରେ ସାମିଲ ହୋଇ ବହୁବାର କାରାବରଣ କରିଛନ୍ତି । ଏଭଳି ବ୍ୟକ୍ତି ଭାରତ ବର୍ଷରେ ବିରଳ ବୋଲି ବକ୍ତାମାନେ ପ୍ରକାଶ କରିଥିଲେ । ସୁଭାଷ ପରିଡ଼ା ବହୁମୁଖୀ ସମାଜ କଲ୍ୟାଣ ସମିତି ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଭାରତ ବର୍ଷର ସ୍ୱନାମଧନ୍ୟ ପରିବେଶବିତ୍ ତଥା ଲୋକଶକ୍ତି ଅଭିଯାନର ସଭାପତି ପ୍ରଫୁଲ କୁମାର ସାମନ୍ତରା, ଗଞ୍ଜାମ ବାର ଆସୋସିଏସନର ପୂର୍ବତନ ସଭାପତି ତଥା ସାମାଜିକ କର୍ମୀ ଭଗବାନ ସାହୁ, ପୂର୍ବତନ ବିଧାୟକ ନାରାୟଣ ରେଡ଼ୀ, ସିପିଆଇଏମ୍ଏଲ୍ ନେତା ଭାଲଚନ୍ଦ୍ର ଷଡ଼ଙ୍ଗୀ, ନବୀନର ସମ୍ପାଦକ ତଥା ହିନ୍ଦ ମଜଦୁର ସଭାର ରାଜ୍ୟ ଉପସଭାପତି ରବି ରଥ, ପିସିସି ମୁଖପାତ୍ର ପୀତବାସ ପଣ୍ଡା, ଡାୟଟ ପୁରୀର ଅଧ୍ୟକ୍ଷ ଡ଼. ବାୟାମନୁ ଚର୍ଚ୍ଚି, ଶିକ୍ଷାବିତ୍ ତଥା ପରିବେଶବିତ୍ ସୁଧୀର ରାଉତ, ମହାନ ସଂଘ ସଭାପତି ସୁଶାନ୍ତ ସାବତ, ରାଜେନ୍ଦ୍ର ଦଳ ବେହେରା, ବିଘ୍ନେଶ୍ୱର ସାହୁ, ସାମ୍ବାଦିକ ଡ଼. ଜଗନମୋହନ ମହାପାତ୍ର, ସମାଜସେବୀ ତ୍ରିନାଥ ମହାରଣା ପ୍ରମୁଖ ଆଜିର ଗଣତାନ୍ତ୍ରିକ ବ୍ୟବସ୍ଥା ସମ୍ପର୍କରେ ନିଜ ନିଜ ମତ ରଖିଥିଲେ । ଭାରତ ବିକାଶ ପରିଷଦର ସଭାପତି ସୁରେନ୍ଦ୍ର ପାଣିଗ୍ରାହୀ କାର୍ଯ୍ୟକ୍ରମରେ ଅଧ୍ୟକ୍ଷତା କରିଥିଲେ । ଅନୁଷ୍ଠାନର ଆବାହକ ସଞ୍ଜୟ କୁମାର ମାଝି କାର୍ଯ୍ୟକ୍ରମ ସଂଯୋଜନା କରିଥିଲେ । କର୍ମଚାରୀ ନେତା କିଶୋର ପାତ୍ର, ଗୁରୁଚରଣ ପାତ୍ର, ମାନବ ସୁରକ୍ଷା ମଞ୍ଚର ଅବନୀ ଗୟା, ଶିକ୍ଷାବିତ୍ ଶ୍ୟାମ ସୁନ୍ଦର ଖାଡ଼ଙ୍ଗା, ସୁଦାମ ବେହେରା, ସୁବାସ ପାତ୍ର, ମୀନକେତନ ଜେନା, ଗାଗାରିନ ନାୟକ, ରବି ନାୟକ, ଭିକାରୀ ଚରଣ ନାୟକ, ବଂଶୀଧର ଭୂୟାଁ, ବି.ରାଙ୍ଗା ପାତ୍ର, ଭଗବାନ ପଣ୍ଡା ପ୍ରମୁଖ ଆଲୋଚନାରେ ଅଂଶଗ୍ରହଣ କରି ସୁଭାଷ ବାବୁଙ୍କ ବହୁମୁଖୀ ପ୍ରତିଭା ଅନ୍ୟାୟ, ଭ୍ରଷ୍ଟାଚାର ବିରୋଧରେ ଯେକୌଣସି କ୍ଷମତାଶୀଳ ଲୋକ ହୋଇପାରନ୍ତି, ସେ ତାକୁ ବରଦାସ୍ତ କରିନାହାନ୍ତି ଏବଂ ଜୀବନସାରା ସାଧାରଣ ଜନତାଙ୍କ ପାଇଁ ସଂଗ୍ରାମ କରି ଇତିହାସ ରଚନା କରିଛନ୍ତି ବୋଲି ପ୍ରକାଶ କରିଥିଲେ । ଏହି କାର୍ଯ୍ୟକ୍ରମରେ ସହରର ଶତାଧିକ ବିଶିଷ୍ଟ ବ୍ୟକ୍ତି ଯୋଗଦେଇ ସ୍ୱର୍ଗତ ପରିଡ଼ାଙ୍କ ସ୍ମୃତିଚାରଣ କରିବା ସହ ଶ୍ରଦ୍ଧାସୁମନ ଅର୍ପଣ କରିଥିଲେ ।