ବଲାଙ୍ଗିର, (ଦେବାଶିଷ ମିଶ୍ର) : ବଲାଙ୍ଗିର ବ୍ଲକ ଖୁଜେନପାଲି ହାଇସ୍କୁଲକୁ ବିଦ୍ୟୁତ ବିଭାଗ ତରଫରୁ ବିଦ୍ୟୁତ କାଟ କରାଯାଇ ଥିବା ଅଭିଯୋଗ ହେଉଛି । ବିଶେଷ ସୁତ୍ରରୁ ପ୍ରାପ୍ତ ଖବର ଅନୁଯାୟୀ, ଭଗବାନ ବିଦ୍ୟା ମନ୍ଦିର, ଖୁଜେନପାଲି ତୃତୀୟ ପର୍ଯ୍ୟାୟରେ ୫-ଟିରେ ସାମିଲ ହୋଇଛି । ସ୍କୁଲ ରୁପାନ୍ତରଣ ହେବା ବର୍ଷେ ପାଖାପାଖି ହେଲାଣି । କିନ୍ତୁ ଆଜି ପର୍ଯ୍ୟନ୍ତ ବିଦ୍ୟୁତ ବିଭାଗର ବକେୟା ବିଲ୍ ପୈଠ ହୋଇନଥିବାରୁ ସ୍କୁଲକୁ ବିଦ୍ୟୁତ ସେବା ବନ୍ଦ ରହିଛି । ବର୍ତ୍ତମାନ ବିଦ୍ୟାଳୟର ଅବସ୍ଥା ସାଂଘାତିକ । ସ୍ମାର୍ଟ ବୋର୍ଡରେ ପାଠପଢା ବନ୍ଦ, ପିଲାଙ୍କ କମ୍ପ୍ୟୁଟର ଶିକ୍ଷା ଠପ୍, ପିଇବା ପାଇଁ ପାଣି ନାହିଁ, ଏପରି କି ରାତି ସାରା ସ୍କୁଲ ଅନ୍ଧାରରେ ରହିଛି । ଲକ୍ଷ ଲକ୍ଷ ଟଙ୍କାର ଜିନିଷପତ୍ର ଥିବା ଯୋଗୁଁ ଶିକ୍ଷକମାନେ ଭୀତତ୍ରସ୍ତ । ଚୋରି ହେବାର ଯଥେଷ୍ଟ ସମ୍ଭାବନା ରହିଛି । ଏ ବିଷୟରେ ବିଭାଗୀୟ କର୍ତ୍ତୃୃପକ୍ଷଙ୍କୁ ଜଣାଇଥିଲେ ମଧ୍ୟ ସେମାନେ ନୀରବଦ୍ରଷ୍ଟା ସାଜିଥିବା ଅଭିଯୋଗ ହେଉଛି । ଏ ଦିଗରେ ବିହିତ ପଦକ୍ଷେପ ନେବା ପାଇଁ ଜନସାଧାରଣ ଓ ଶିକ୍ଷକମାନଙ୍କ ତରଫରୁ ଦାବି ହେଉଛି ।