ବେଲପଡ଼ା ପୋଲିସକୁ ବଡ ସଫଳତା : ଏକ ବଡ ଧରଣର ବାଇକ୍ ଚୋରି ରାକେଟର ପର୍ଦାଫାସ କରିବା ସହ ଅଭିଯୁକ୍ତମାନଙ୍କୁ କୋର୍ଟ ଚାଲାଣ
ବେଲପଡା, (ଭୋଜରାଜ ଦଣ୍ଡସେନା) : ବେଲପଡା ପୋଲିସକୁ ମିଳିଛି ଏକ ବଡ଼ ଧରଣର ସଫଳତା । ବାଇକ ଚୋରି ରାକେଟର ପର୍ଦାଫାସ କରିବା ସହ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଥିବା ସୂଚନା ମିଳିଛି । ସୂଚନାଯୋଗ୍ୟ ଯେ, ଗତ ୮ ତାରିଖ ଦିନ ମୋହନ ପୁଞ୍ଜି ତାଙ୍କ ହିରୋ ହୋଣ୍ଡା ସ୍ପାଲଣ୍ଡର ଗାଡ଼ି ନମ୍ୱର – ଓଆର୍-୦୩-ଜି-୯୩୮୭ ଚୋରି ହୋଇଥିବା ନେଇ ଏକ ଲିଖିତ ଅଭିଯୋଗ କରିଥିଲେ । ସେହିଦିନରେ ପର୍ଲିମାଲ ଗ୍ରାମର ସୁବାସ ମାଝୀ ମଧ୍ୟ ତାଙ୍କ ଗାଡ଼ି ଚୋରି ହୋଇଥିବା ନେଇ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗ ପରେ ବେଲପଡ଼ା ପୋଲିସ ତଦନ୍ତ ଆରମ୍ଭ କରିଥିଲା ଓ ଦୁଇ ଦିନ ମଧ୍ୟରେ ସଂପୃକ୍ତ ଥିବା ଚୋରକୁ ଧରିବାରେ ସଫଳ ହୋଇଥିଲା । ବେଲପଡ଼ାର ରାଜେଶ ସିନ୍ଦ୍ରିଆ(୩୫), କାନ୍ହା ମେହେର(୨୦), ଭିକି ରାଉତ(୨୫), ମନୋଜ ମେହେର(୨୪), ଦେବରାଜ ଶବର(୨୩)ଙ୍କୁ ଗିରଫ କରାଯାଇଥିବା କୁହାଯାଇଛି । ବେଲପଡ଼ା ଆଇଆଇସି ବୁଲୁ ମୁଣ୍ଡାଙ୍କ କହିବା ଅନୁଯାୟୀ ଚୋରି ଅଭିଯୋଗ ହୋଇଥିବା ଦୁଇଟି ଗାଡ଼ି ତାଙ୍କ ଠୁ ଜବତ ହୋଇଛି ଏବଂ ତା ସହ ଆହୁରି ୬ ଟି ମୋଟର ସାଇକଲ ମଧ୍ୟ ତାଙ୍କଠୁ ଜବତ ହୋଇଛି । ଚୋରମାନଙ୍କୁ ଡାକ୍ଟରି ଟେଷ୍ଟ କରିବା ପରେ ସେମାନଙ୍କୁ ଆଜି କୋର୍ଟ ଚାଲାଣ କରିଥିବା ପୋଲିସ ସୂଚନା ଦେଇଛି ଏବଂ ଗାଡ଼ି ଗୁଡ଼ିକୁ ତାଙ୍କ ଅସଲ ମାଲିକ ମାନଙ୍କୁ ହସ୍ତାନ୍ତର କରିଥିବା କୁହାଯାଇଛି ।