କଟକ : ଆଜି ଶପଥ ନେବେ ଓଡ଼ିଶା ହାଇକୋର୍ଟର ନୂଆ ମୁଖ୍ୟ ବିଚାରପତି ଜଷ୍ଟିସ୍ ହରିଶ୍ ଟଣ୍ଡନ । ଜଷ୍ଟିସ ହରିଶ୍ ଟଣ୍ଡନଙ୍କୁ ଶପଥପାଠ କରାଇବେ ରାଜ୍ୟପାଳ ହରିବାବୁ କମ୍ଭମ୍ ପାଟି । ହାଇକୋର୍ଟ ପରିସରରେ ହେବ ଶପଥ ଗ୍ରହଣ ଉତ୍ସବ । କଲିକତା ହାଇକୋର୍ଟର ବରିଷ୍ଠ ବିଚାରପତି ଜଷ୍ଟିସ୍ ହରିଶ୍ ଟଣ୍ଡନ ଆଜି ଓଡ଼ିଶା ହାଇକୋର୍ଟର ନୂଆ ମୁଖ୍ୟ ବିଚାରପତି ଭାବେ ଶପଥ ଗ୍ରହଣ କରିବେ । ଏଥିପାଇଁ ସମସ୍ତ ପ୍ରସ୍ତୁତି ହୋଇଛି । ହାଇକୋର୍ଟ ପରିସରରେ ଏହି ଶପଥଗ୍ରହଣ ଉତ୍ସବ ଅନୁଷ୍ଠିତ ହେବ । ଓଡ଼ିଶା ହାଇକୋର୍ଟର ମୁଖ୍ୟ ବିଚାରପତି ପଦରେ ଥିବା ଜଷ୍ଟିସ୍ ଚକ୍ରଧାରୀ ଶରଣ ସିଂ ଗତ ଜାନୁଆରୀ ୧୯ ତାରିଖରେ ଅବସର ଗ୍ରହଣ କରିବା ପରେ ଏହି ପଦ ପୂରଣ ହୋଇପାରିନଥିଲା । ୨୦୧୦ ମସିହା ଏପ୍ରିଲ ୧୩ ତାରିଖରେ ଜଷ୍ଟିସ୍ ଟଣ୍ଡନ କଲିକତା ହାଇକୋର୍ଟରେ ବିଚାରପତି ଭାବେ ନିଯୁକ୍ତ ପାଇଥିଲେ । ସର୍ବଭାରତୀୟ ସ୍ତରରେ ସମସ୍ତ ହାଇକୋର୍ଟର ବିଚାରପତିଙ୍କ ବରିଷ୍ଠତା ଆଧାରରେ ଜଷ୍ଟିସ୍ ଟଣ୍ଡନ ୭ତମ ସ୍ଥାନରେ ଅଛନ୍ତି ।