ମାଛ ଧରିବାକୁ ଯାଇ ମୃତ୍ୟୁବରଣ କରିଥିବା ଗୁଲେଖଙ୍କ ପରିବାର ବର୍ଗଙ୍କୁ ଭେଟି ସମବେଦନା ଜଣାଇଲେ ଲୋଇସିଂହା ବିଧାୟକ ଡଃ. ମୁକେଶ ମହାଲିଙ୍ଗ
ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ଜିଲ୍ଲା ଆଗଲପୁର ବ୍ଲକ ଭରସୂଜା ପଂଚାୟତର ରେଢ଼ା ଚେକ ଡେମକୁ ଗତକାଲି ପୂର୍ବାହ୍ନରେ ପିପିଲି ଗ୍ରାମର ୩ ଜଣ ମାଛ ମାରିବାକୁ ଯାଇ ଅଘଟଣର ଶିକାର ହୋଇଥିଲେ । ୩ ଜଣ ଯାକ ମାଛଧରା ଜାଲ ନେଇ ରେଢା ଚେକ୍ଡେମ୍କୁ ମାଛ ଧରିବାକୁ ଯାଇଥିଲେ । ଜାଲ ପକାଇ ମାଛ ଧରୁଥିବା ସମୟରେ ପ୍ରଖର ସ୍ରୋତରେ ଭାସି ଯାଇଥିଲେ । ଏହି ଘଟଣାରେ ଗୁଲେଖ ପୋଢ଼ଙ୍କ ମୃତ୍ୟୁ ଘଟିଥିବା ବେଳେ ଜଣେ ଜୀବିତ ଭାବରେ ଉଦ୍ଧାର ହୋଇଥିଲେ । ଅନ୍ୟ ଜଣେ ନିଖୋଜ ଥିଲେ । ତେବେ ଆଜି ଗୁଲେଖ ପୋଢ଼ଙ୍କ ମୃତ୍ୟୁ ଖବର ପାଇବା ପରେ ତୁରନ୍ତ ତାଙ୍କ ଘରକୁ ଯାଇ ପରିବାର ବର୍ଗଙ୍କୁ ଭେଟି ସମବେଦନା ଜଣାଇଛନ୍ତି ଲୋଇସିଂହା ବିଧାୟକ ଡଃ. ମୁକେଶ ମହାଲିଙ୍ଗ । ଏହି ଦୁର୍ଘଟଣାର ଶିକାର ହୋଇଥିବା ଆଉ ଦୁଇଜଣ ବ୍ୟକ୍ତିଙ୍କ ମଧ୍ୟରୁ ରଜନୀ ପୋଢ଼ ନାମକ ବ୍ୟକ୍ତିଙ୍କୁ ଓଡ୍ରାଫ୍ ଟିମ୍ ଦ୍ଵାରା ଉଦ୍ଧାର କରାଯାଇଥିବା ବେଳେ ନିଖୋଜ ଥିବା ପ୍ରମୋଦ ପୋଢ଼ଙ୍କୁ ଏବେ ଖୋଜିବା ଜାରି ରହିଥିବା ଜଣାପଡ଼ିଛି ।