ଅନୁଗୁଳ : ଅନୁଗୁଳ ଜିଲ୍ଲାର ବଅଁରପାଳ ଥାନା ମହିଧରପୁର ଫାଣ୍ଡି ଅନ୍ତର୍ଗତ ଫୁଲପଡ଼ା ଛକ ନିକଟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଥିବା ଜଣାପଡିଛି । ୫ ଜଣ ଆହତ ହୋଇଥିବା ବେଳେ ସେଥି ମଧ୍ୟରୁ ଦୁଇ ଜଣ ଗୁରୁତର ଆହତ ହୋଇଛନ୍ତି । ସୂଚନା ଅନୁଯାୟୀ ମହିଧରପୁର ଆଡୁ ଏକ କାର ଅନୁଗୁଳ ଆଡକୁ ଯାଉଥିବା ସମୟରେ ଫୁଲପଡ଼ା ଛକ ନିକଟରେ ଥିବା ବିରେନ ଦାସଙ୍କ ଜଳଖିଆ ଦୋକାନ ସହ ଦୁର୍ଘଟଣା ହୋଇଥିଲା । ଜଳଖିଆ ଦୋକାନରେ ୪ ଜଣ ଖାଉଥିବା ବେଳେ ଜଣେ ପରସୁଥିଲେ । ହଠାତ ଦୃତଗତିରେ ଆସୁଥିବା କାରଟି ସେମାନଙ୍କୁ ଧକ୍କା ଦେଇଥିଲା । ଫଳରେ ଦୋକାନ ସମ୍ମୁଖରେ ଜଳଖିଆ ଖାଉଥିବା ଲୋକମାନେ ଆହତ ହୋଇଥିଲେ । ଦୋକାନୀ ମାଲିକଙ୍କ ଏକ ସ୍କୁଟି, ଠିଆ ହୋଇଥିବା ଗୋଟିଏ ସାଇକେଲ ଏବଂ ଦୋକାନର ଆସବାବପତ୍ର ନଷ୍ଟ ହୋଇଯାଇଥିଲା । ସ୍ଥାନୀୟ ଲୋକଙ୍କ ସହାୟତାରେ ଆହତ ବ୍ୟକ୍ତି ଏବଂ ଗୁରୁତର ଆହତ ହୋଇଥିବା ଜଣେ ମହିଳା ଓ ଛୋଟ ପିଲାଙ୍କୁ ଉଦ୍ଧାର କରି ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଏଣେ ଘଟଣା ସ୍ଥଳରେ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି । ଦୁର୍ଘଟଣା ଘଟାଇଥିବା କାର ଚାଳକ କଣିହାଁ ସ୍ଥିତ ଡେରେଙ୍ଗ ଗ୍ରାମର ବୋଲି ସୂଚନା ମିଳିଛି ।