ମୁନିଗୁଡ଼ା, (ରମାକାନ୍ତ ପଡ଼ାଲ୍) : ବିଧବାରୁ ହେଲେ ସଧବା । ମୃତ ସ୍ୱାମୀଙ୍କୁ ପୁଣି ଜୀବନ୍ତ କରିଦେଲେ ସ୍ତ୍ରୀ । ଏମିତି ଜଣେ ମହିଳା ହେଉଛନ୍ତି ରାୟଗଡ଼ ଜିଲ୍ଲା ମୁନିଗୁଡ଼ା ସଦରର ସାଗରୀକା ରାୟ । ସାଗରୀକାଙ୍କ ତାଙ୍କ ସ୍ୱାମୀ ପ୍ରତି ଥିବା ଅନାବିଳ ଶାଶ୍ଵତ ଓ ଚିରନ୍ତନ ପ୍ରେମର ଦୃଶ୍ୟ ଦେଖିବାକୁ ମିଳିଛି ଅଞ୍ଚଳରେ । ସୂଚନା ଯୋଗ୍ୟ ଯେ, ୨୦୦୧ ମସିହାରେ କଲିକତା ଠାରେ ସାଗରୀକା ରାୟ ଓ ସମୀର ରାୟଙ୍କ ବୈଦିକ ରୀତିନୀତି ଅନୁଯାୟୀ ବାହାଘର ହୋଇଥିଲା । ଦୀର୍ଘ ୨୨ବର୍ଷ ପର୍ଯ୍ୟନ୍ତ ପରିବାରର ଦୁଇ ପିଲାଙ୍କ ଦାୟିତ୍ୱ ସହ ଖୁସିରେ ସଂସାର ରଥ ଗଢ଼ିଚାଳିଥିଲେ । ଗତ ଦୁଇ ବର୍ଷରେ ରୋଗରେ ପଡି ସମୀର ରାୟଙ୍କ ମୃତ୍ୟୁ ଘଟିଥିଲା । ଫଳରେ ସାଗରୀକା ଭାଙ୍ଗିପଡି ସ୍ୱାମୀଙ୍କ ଗ୍ରହଣ କରିପାରିନଥିଲେ କିନ୍ତୁ ଜଣେ ପୁଅ ଆଉ ଜଣେ ଝିଅର ମାଁ ହିସାବରେ ତାଙ୍କ ଉପରେ ଥିଲା ଅନେକ କର୍ତ୍ତବ୍ୟ ଓ ଦାୟିତ୍ୱ । ଏନେଇ କଲିକତାରେ ସ୍ୱାମୀ ସମୀରଙ୍କ ସିଲିକନ୍ ପ୍ରତିମୂର୍ତ୍ତି ତିଆରି କରି ମୁନିଗୁଡା ବାସଭବନରେ ସ୍ଥାପନା କରି ପୁରୋହିତଙ୍କ ଉପସ୍ଥିତିରେ ହୋମ ଯଜ୍ଞ ସହ ମୂର୍ତ୍ତିର ପ୍ରାଣ ପ୍ରତିଷ୍ଠା କରି ପୁନର୍ବାର ହିନ୍ଦୁ ରୀତିନୀତି ଅନୁଯାୟୀ ଶଙ୍ଖା ସିନ୍ଦୁର ଧାରଣ କରିଛନ୍ତି ସାଗରୀକା । ବାପାଙ୍କ ମୂର୍ତ୍ତି ଉପସ୍ଥିତିରେ ବେଶ ଖୁସିରେ ଅଛନ୍ତି ପିଲାମାନେ । ସାତଜନ୍ମର ସାଥିଙ୍କୁ ଗୋଟେ ଜନ୍ମରେ ଅଧାରୁ ଛାଡନ୍ତେ ବା କେମିତି ସ୍ତ୍ରୀ । ଏହା ବୋଧେ ସ୍ୱାମୀ ସ୍ତ୍ରୀଙ୍କର ପ୍ରକୃତ ଶାଶ୍ଵତ ଚିରନ୍ତନ ସମ୍ପର୍କ ବୋଲି ଜନ ସାଧାରଣରେ ଚର୍ଚ୍ଚାର ପାଳଟିଛି ।