ପୁରୀ, (ଦିଲ୍ଲୀପ କୁମାର ଧାଉଡିଆ) : ଆଜି ପୂର୍ବାହ୍ନରେ ତାଳବଣିଆ ସ୍ଥିତ ସ୍ପୋର୍ଟ୍ସ ଷ୍ଟାଡିୟମ ଠାରେ ଜିଲ୍ଲା ଆଇନ ସେବା ପ୍ରାଧିକରଣ ଓ ଜିଲ୍ଲା ପ୍ରଶାସନ ପକ୍ଷରୁ ବିଶାଳ ଆଇନ ସେବା ଓ ସଚେତନତା ଶିବିର ଅନୁଷ୍ଠିତ ହୋଇଯାଇଛି । ଅଧିକାର ଓ କର୍ତ୍ତବ୍ୟ ଗୋଟିଏ ମୁଦ୍ରାର ଦୁଇ ପାର୍ଶ୍ଵ ସଦୃଶ୍ୟ । ତେଣୁ ନିଜର ଅଧିକାର ସହ ସାମାଜିକ କର୍ତ୍ତବ୍ୟ ପ୍ରତି ସଚେତନ ହୋଇ କାର୍ଯ୍ୟ କରିବାକୁ ଜିଲ୍ଲା ଓ ଦୌରା ଜଜ୍ ଜଷ୍ଟିସ୍ ଧନେଶ୍ୱର ମଲ୍ଲିକ ଆହ୍ବାନ ଦେଇଛନ୍ତି । ଏଥିରେ ଯୋଗ ଦେଇ ଜିଲ୍ଲା ଜଜ୍ ମଲ୍ଲିକ ମନ ଓ ବିବେକ ମଧ୍ୟରେ ଚାଲୁଥିବା ସଂଘର୍ଷ ଭିତରେ ଯଦି ବିବେକ ହାରିଯାଏ ତେବେ ଚରିତ୍ର ଓ ଶୃଙ୍ଖଳା ନଷ୍ଟ ହୋଇ ସାମାଜିକ ସ୍ଥିତି ଦୁର୍ବଳ ହୁଏ, ଯାହା ଫଳରେ ଅବକ୍ଷୟ ଘଟେ ବୋଲି କହିଥିଲେ । ଏହି ଶିବିରର ମୁଖ୍ୟ ଉଦ୍ଦେଶ୍ୟ ଲୋକଙ୍କୁ ଆଇନ ସମ୍ପର୍କରେ ସଚେତନ କରାଇ ମାମଲାର ତ୍ୱରିତ ସମାଧାନ କରିବା ବୋଲି ସେ କହିଥିଲେ । ଅତିରିକ୍ତ ଜିଲ୍ଲାପାଳ ପ୍ରଶାସନ ପ୍ରଦୀପ କୁମାର ସାହୁ ବିଶ୍ୱର ସର୍ବ ବୃହତ ଗଣତାନ୍ତ୍ରିକ ରାଷ୍ଟ୍ର ଭାବେ ଭାରତ ଯେତିକି ପରିଚିତ ତାହାର ସମ୍ବିଧାନ ମଧ୍ୟ ସେତିକି ସମୃଦ୍ଧ । ସମସ୍ତଙ୍କୁ ନ୍ୟାୟ ଆମ ସମ୍ବିଧାନର ମୂଳ ତତ୍ତ୍ୱ । ଏହାର ମର୍ଯ୍ୟାଦାକୁ ପ୍ରତ୍ୟେକ ଅକ୍ଷୂର୍ଣ୍ଣ ରଖିବା ଆମର କର୍ତ୍ତବ୍ୟ ବୋଲି କହିବା ସହ ଶିବିରରେ ବିଭିନ୍ନ ଜନ କଲ୍ୟାଣକାରୀ ଯୋଜନାର ହିତାଧିକାରୀଙ୍କୁ ସହାୟତା ପ୍ରଦାନର ବ୍ୟବସ୍ଥା ହୋଇଛି ବୋଲି କହିଥିଲେ । ଅତିରିକ୍ତ ଏସ୍ପି ମିହିର ପ୍ରସାଦ ପଣ୍ଡା ଆମ ସମ୍ବିଧାନର ବ୍ୟବସ୍ଥା ଅନୁଯାୟୀ ସବା ଶେଷରେ ଥିବା ଲୋକ ପର୍ଯ୍ୟନ୍ତ ଆଇନ ସେବା ଉପଲବ୍ଧ କରାଇବା । ଶୃଙ୍ଖଳା ଗୋଟିଏ ରାଷ୍ଟ୍ରର ସବୁଠୁ ବଡ ପରିଚୟ ଯାହା ଦ୍ୱାରା ସବୁ ସେବା ସହଜ ହୋଇପାରେ ବୋଲି ସେ କହିଥିଲେ । ଜିଲ୍ଲା ଆଇନ ସେବା ପ୍ରାଧିକରଣର ସମ୍ପାଦକ ଦେବାଶିଷ ଦାଶ ଆଜି ସମଗ୍ର ଦେଶରେ ଏହି ଶିବିର ଆୟୋଜନ କରାଯାଉଛି ବୋଲି କହିବା ସହ ଲୋକ ମାନଙ୍କୁ ସେମାନଙ୍କ ପାଇଁ ଥିବା ଆଇନ, ଅଧିକାର ଓ ସେମାନଙ୍କର କର୍ତ୍ତବ୍ୟ ସମ୍ପର୍କରେ ସଚେତନ କରାଇବା ଏବଂ ଲୋକମାନଙ୍କ ନିକଟରେ ଆଇନ ସେବା ପହଞ୍ଚାଇବା ଶିବିରର ଆଭିମୁଖ୍ୟ ବୋଲି କହିଥିଲେ । ଅନ୍ୟ ମାନଙ୍କ ମଧ୍ୟରେ ସି ଡ଼ି ଏମ ଓ ଡା ସୁଜାତା ମିଶ୍ର, ପୁରୀ ବାର ଆସୋସିଏସନର ସଭାପତି ଜୟରାମ ବସ୍ତିଆ ଶିବିରର ଆଭିମୁଖ୍ୟ ଓ ଜନସଚେତନତା ସମ୍ପର୍କରେ ଆଲୋକପାତ କରିଥିଲେ । ଜେଏମ୍ଏଫ୍ସି କ୍ରୀଷ୍ଣା ସୁବୁଦ୍ଧି କାର୍ଯ୍ୟକ୍ରମ ପରିଚାଳନା କରିଥିଲେ । ପ୍ରାରମ୍ଭରେ ଶ୍ରୀ ଜଗନ୍ନାଥଙ୍କ ପ୍ରତମୂର୍ତ୍ତିରେ ମାଲ୍ୟାର୍ପଣ, ପ୍ରଦୀପ ପ୍ରଜ୍ଜଳନ ସହ ବନ୍ଦେ ଉତ୍କଳ ଜନନୀ ସଂଗୀତ ପରିବେଷଣ କରାଯାଇଥିଲା । ବିଭିନ୍ନ ଯୋଜନାର ହିତାଧିକାରୀଙ୍କୁ ଅତିଥି ମାନେ ସହାୟତା ପ୍ରଦାନ କରିଥିଲେ । ଶେଷରେ ସିଭିଲ କୋର୍ଟର ରେଜିଷ୍ଟ୍ରାର ନିଖିଲ ଭରତ ମହାନ୍ତି ଧନ୍ୟବାଦ ଅର୍ପଣ କରିଥିଲେ । ଅନ୍ୟମାନଙ୍କ ମଧ୍ୟରେ ଉପଜିଲ୍ଲାପାଳ ଭବତାରଣ ସାହୁ, ଜଜ୍ ଫାମିଲି କୋର୍ଟ ଅରୁଣ ମଲ୍ଲିକ, ଏଡିଜେ ରାଜ କିଶୋର ଲେଙ୍କା, ଏଡିଜେ ଅମିୟ ରଞ୍ଜନ ଜେନା, ସିଜେଏମ ପ୍ରିତିଶ କୁମାର ରାଉତରାୟ, ସବ ଜଜ ରାଣା ଘୋଷ, ମୁନସିଫ ପ୍ରତ୍ୟୁଷ କୁମାର ଚାନ୍ଦ, ଏସଡିଜେଏମ ଜିତେନ୍ଦ୍ର ଦାସ, ଗ୍ରାମ ନ୍ୟାୟାଳୟ ଜଜ ନର୍ମଦା କର, ଜେଏମ୍ଏଫସି ପଲ୍ଲବୀ ଦାସ, ଜେଏମ୍ଏଫ୍ସି ଦେବମାଳିନୀ ଐଶ୍ୱର୍ଯ୍ୟ, କୋର୍ଟ ମ୍ୟାନେଜର ମଳୟ କୁମାର ଗିରି, ବିଭିନ୍ନ ବିଭାଗର ଅଧିକାରୀ, କର୍ମଚାରୀ ପ୍ରମୁଖ ଯୋଗ ଦେଇଥିଲେ । ଜିଲ୍ଲା ଆଇନ ସେବା ପ୍ରାଧିକରଣ, ଶିଶୁ ସୁରକ୍ଷା ୟୁନିଟ, ସ୍ୱାସ୍ଥ୍ୟ, ପ୍ରାଥମିକ ଚିକିତ୍ସା, ସାମାଜିକ ସୁରକ୍ଷା, ସମାଜ କଲ୍ୟାଣ, ସମାଜ ମଗଂଳ, ଶ୍ରମ, ଶିଳ୍ପ, ନିୟୋଜନ, ସଂସ୍କୃତି, ପରିବହନ, ପୁରୀ ପୌରପାଳିକା, ଜରୁରୀ କାଳୀନ ବିଭାଗ ଇତ୍ୟାଦି ଷ୍ଟଲ ମାଧ୍ୟମରେ ସେମାନଙ୍କ କାର୍ଯ୍ୟକ୍ରମ ଓ ଯୋଜନାର ପ୍ରଦର୍ଶନ କରିଥିଲେ ।