ବଲାଙ୍ଗିର, (ଦେବାଶିଷ ମିଶ୍ର) : ଭୀମଭୋଇ ମେଡିକାଲରୁ ଶବ ବୋହିଲେ ସ୍ତ୍ରୀ ଓ ପୁଅ । ଆଜି ଭୀମଭୋଇ ମେଡିକାଲରେ ପୁଣି ଏକ ହୃଦୟ ବିଦାରକ ଘଟଣା ଦେଖିବାକୁ ମିଳିଛି । ଜଣେ ରୋଗୀଙ୍କ ମୃତ୍ୟୁ ହୋଇଥିବା ବେଳେ ମେଡିକାଲ ପକ୍ଷରୁ ଶବ ବ୍ୟବଚ୍ଛେଦ କରିବା ପାଇଁ କୁହାଯାଇଥିଲା । କୌଣସି ହସ୍ପିଟାଲ କର୍ମଚାରୀ କର୍ମଚାରୀ ଶବକୁ ବ୍ୟବଚ୍ଛେଦ ଗୃହକୁ ନେଇ ନଥିବା ବେଳେ ମୃତକଙ୍କ ସ୍ତ୍ରୀ କାନ୍ଦିକାନ୍ଦି ଶବକୁ ବ୍ୟବଚ୍ଛେଦ ଗୃହ ପର୍ଯ୍ୟନ୍ତ ବୋହି ନେଇଥିଲେ । ଏହି ହୃଦୟ ବିଦାରକ ଦୃଶ୍ୟ ଘଟଣାସ୍ଥଳର ଲୋକଙ୍କୁ ଦୁଃଖିତ କରିଥିଲା । ଯାହାର ଭିଡିଓ ଏବେ ଭାଇରାଲ ହେବାରେ ଲାଗିଛି । ଅନ୍ୟପଟେ ଭୀମଭୋଇ ମେଡିକାଲ କର୍ମଚାରୀଙ୍କ ଏପରି ଅମାନବିକତା ଓ ଦାୟିତ୍ୱହୀନତାକୁ ନେଇ ସାଧାରଣରେ ପ୍ରଶ୍ନବାଚି ସୃଷ୍ଟି ହୋଇଛି । ସୂଚନାଯୋଗ୍ୟ ଯେ, ଗଡ଼ଗଡ଼ ବାହାଲ ତୁରେକେଲା ଅଞ୍ଚଳର ରୁଷି କୁମ୍ଭାରଙ୍କୁ ଗୁରୁତର ଅବସ୍ଥାରେ ପରିବାର ବର୍ଗ ପ୍ରଥମେ କଣ୍ଟାବାଞ୍ଜି ଡାକ୍ତରଖାନା ଓ ପରେ ଭୀମଭୋଇ ମେଡିକାଲକୁ ଆଣିଥିଲେ । ମେଡିକାଲରେ ପହଁଛିବା ଠିକ୍ ପୂର୍ବରୁ ରୁଷିଙ୍କ ମୃତ୍ୟୁ ହୋଇଥିଲା । ଡାକ୍ତର ରୁଷିଙ୍କୁ ମୃତ ଘୋଷଣା କରିବା ସହ ଶବ ବ୍ୟବଚ୍ଛେଦ ପାଇଁ କହିଥିଲେ । କିନ୍ତୁ ଶୋକ ସନ୍ତପ୍ତ ପରିବାର ବର୍ଗଙ୍କୁ କୌଣସି କର୍ମଚାରୀ ସାହାଯ୍ୟ କରିନଥିବା ବେଳେ ମୃତକଙ୍କ ପତ୍ନୀ ଓ ପୁଅ କାନ୍ଦି ବୋବାଳି ଶବକୁ ବ୍ୟବଚ୍ଛେଦ ଗୃହ ପର୍ଯ୍ୟନ୍ତ ବୋହି ନେଇଥିଲେ ।
