ପୁରୀ : ପୁରୀ ସାକ୍ଷୀଗୋପାଳ ଅଞ୍ଚଳର ତିଳୋତ୍ତମା ପ୍ରଧାନ । ୫ ବର୍ଷ ହେବ ସେ ଲୋନ ନାଁରେ ଲୋକଙ୍କୁ ମାରୁଥିଲେ ଚୂନ । ଟଙ୍କା ଲୋଭ ଦେଖାଇ ନେଇଯାଉଥିଲେ ଟଙ୍କା । ଲୋନ୍ କରାଇଦେବି କହି ସ୍ଥାନୀୟ ଅଞ୍ଚଳର ଲୋକଙ୍କୁ ବିଭିନ୍ନ ପ୍ରଲୋଭନ ଦେଖାଉଥିଲେ । ୫ ହଜାର ଟଙ୍କା ଦେଲେ ୫୦ ହଜାର ଟଙ୍କା ଲୋନ୍ ମିଳିବ ବୋଲି କହୁଥିଲେ । ଲୋକେ ମଧ୍ୟ ଠକ ମହିଳାଙ୍କ ଲୋଭନୀୟ ଅଫରରେ ରାଜି ହୋଇଯାଉଥିଲେ । ଲୋନ୍ ନେବା ପାଇଁ ୫ ହଜାର ଟଙ୍କା ଦେଉଥିଲେ । ଏପରି କି ମହିଳା ଜଣଙ୍କ ତାଙ୍କ ନିକଟରେ ସୁଟ୍କେସ୍ ଭର୍ତ୍ତି ୫୦୦ଟଙ୍କିଆ ନୋଟ୍, ୨୦କେଜିରୁ ଊର୍ଦ୍ଧ ସୁନା ଅଳଙ୍କାର ଏବଂ ଆର୍ବିଆଇରେ ବଣ୍ଡ ରହିଥିବା ଲୋକମାନଙ୍କୁ କହିବା ସହ ଟଙ୍କା ଓ ସୁନା ଅଳଙ୍କାରର ଏକାଧିକ ଫଟୋ ଦେଖାଉଥିଲେ । ଆଉ ଲୋକେ ବି ତାଙ୍କ କଥାରେ ବିଶ୍ୱାସ କରି ଋଣ ନେବା ପାଇଁ ତାଙ୍କୁ ବଢ଼ାଇ ଦେଉଥିଲେ ଟଙ୍କା । ତା’ପରେ ଲୋକଙ୍କୁ ମିଳୁନଥିଲା ଲୋନ୍ । ଆଜି ମିଳିବ, କାଲି ମିଳିବ ବୋଲି କହି ଠକୁଥିଲେ । ଫେବ୍ରୁଆରୀ ୨୯ ତାରିଖରେ ଏନେଇ ହନ୍ତୁକ ଗାଁର ଅଭିମନ୍ୟୁ ଜେନା ଅଭିଯୋଗ ଆଣିଥିଲେ । ତାଙ୍କଠାରୁ ବି ସମ୍ପୃକ୍ତ ମହିଳା ୧୨ ଲକ୍ଷ ଟଙ୍କା ଠକି ନେଇଥିବା କହିଛନ୍ତି ଅଭିମନ୍ୟୁ । ଅଭିଯୋଗ ଆଧାରରେ ପୋଲିସ ପୁରୀର ବାଲିଘାଟ ଶ୍ରୀରାମ ନଗରରେ ତିଳୋତ୍ତମାଙ୍କ ଭଡ଼ାଘରେ ଚଢାଉ କରିଥିଲା ।