
ଡୁଙ୍ଗୁରିପାଲି, (କେପିଏନ୍ଏସ୍) : ସୁବର୍ଣ୍ଣପୁର ଜିଲ୍ଲା ଡ଼ୁଙ୍ଗୁରିପାଲି ବ୍ଲକ ଗଜବନ୍ଧ ଉଚ୍ଚ ପ୍ରାଥମିକ ବିଦ୍ୟାଳୟରେ ମୌଳିକ ସଂଖ୍ୟା ଜ୍ଞାନ ଷ୍ଟେସନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ପ୍ରଧାନ ଶିକ୍ଷକ ହେମସାଗର ବାଘଙ୍କ ତତ୍ତ୍ୱାବଧାନରେ ଅନୁଷ୍ଠିତ କାର୍ଯ୍ୟକ୍ରମରେ ଏବିଇଓ ତଥା ବିଆର୍ସିସି ଗଞ୍ଜଲୁ ମିର୍ଧା ମୁଖ୍ୟ ଅତିଥିଭାବେ ଯୋଗଦେଇ ବାଳ ବାଟିକା ଓ ପ୍ରଥମ ଶ୍ରେଣୀ ଛାତ୍ରଛାତ୍ରୀଙ୍କୁ ଖଡ଼ି ଛୁଆଁଇଥିଲେ । ସ୍ଥାନୀୟ ସରପଞ୍ଚ ଗୋବିନ୍ଦ ସେଟ, ଏସ୍ଏମ୍ସି ଚେୟାରପର୍ସନ ସତ୍ୟନାରାୟଣ ପଧାନ ସମ୍ମାନିତ ଅତିଥିଭାବେ ଯୋଗଦେଇ ସମସ୍ତ ଯୋଗ୍ୟ ଛାତ୍ରଛାତ୍ରୀଙ୍କ ନାମ ଲେଖାଇବା, ପ୍ରତିଦିନ ବିଦ୍ୟାଳୟକୁ ଆସିବା, ବିଦ୍ୟାଳୟର ବିଭିନ୍ନ କାର୍ଯ୍ୟକ୍ରମରେ ସକ୍ରିୟ ଭାବେ ଯୋଗ ଦେବାପାଇଁ ସମସ୍ତ ଛାତ୍ରଛାତ୍ରୀ, ଅବିଭାବକ ଓ ଶିକ୍ଷକ ଶିକ୍ଷୟିତ୍ରୀଙ୍କୁ ଆହ୍ୱାନ ଦେଇଥିଲେ । ଛାତ୍ରଛାତ୍ରୀମାନେ ଜନ ସଚେତନତା ଶୋଭାଯାତ୍ରାରେ ସଭିଏଁ ପଢିବା ସଭିଏଁ ବଢିବା, ସମସ୍ତେ ଶିଖିବା ସମସ୍ତଙ୍କୁ ଶିଖାଇବା, ଆଜିର ଆହ୍ୱାନ ସମସ୍ତଙ୍କୁ ଶିକ୍ଷାଦାନ ପରି ସ୍ଲୋଗାନ ଦେଇ ପ୍ଲାକାର୍ଡ ସହ ଗ୍ରାମ ପରିକ୍ରମା କରିଥିଲେ । ଏହି ଅବସରରେ ନୂତନ ଛାତ୍ରଛାତ୍ରୀଙ୍କୁ ଫୁଲ ଚନ୍ଦନ ଓ ଶିକ୍ଷଣ ସାମଗ୍ରୀ, ଚକ୍ଲେଟ୍ ପ୍ରଦାନ କରି ସ୍ୱାଗତ କରାଯାଇଥିଲା । ଶିକ୍ଷକ ଦେବରାଜ ଭୋଇ, ଅଶ୍ୱିନୀ ପଧାନ, ହେମନ୍ତ ବାରିକ, ଖେଳ ଶିକ୍ଷକ ସାନନ୍ଦ ବାରିକ , ଶିକ୍ଷୟିତ୍ରୀ ରିତା ମେହେର, ତପସ୍ୱିନୀ ଦାଶ ସହଯୋଗ କରିଥିଲେ । ଛାତ୍ରଛାତ୍ରୀମାନେ ମୌଳିକ ସଂଖ୍ୟା ଜ୍ଞାନ ଷ୍ଟେସନ କାର୍ଯ୍ୟକ୍ରମରେ ଭାଗନେଇ ଗଣିତ ଧନ୍ଦା, ଗଣିତ ମଜା ଓ ଗଣିତ ଖେଳ ମାଧ୍ୟମରେ ଗଣିତ ଶିଖିବାକୁ ଆଗ୍ରହୀ ହୋଇଥିଲେ । ଶେଷରେ ଶିଶୁ ବାଟିକା ଶିକ୍ଷୟିତ୍ରୀ ଜାହ୍ନବୀ ଭୋଇ ଧନ୍ୟବାଦ ଅର୍ପଣ କରିଥିଲେ । ସମସ୍ତ ଅବିଭାବକ ଓ ଛାତ୍ରଛାତ୍ରୀ ସହଯୋଗ କରିଥିଲେ ।