କଂଟାବାଂଜି, (ଗୁରୁଦୟାଲ ହଂସ) : ବଲାଙ୍ଗିର ଜିଲ୍ଲା କଂଟାବାଂଜି ସ୍ଥିତ ଭୋକେସ୍ନାଲ କଲେଜରେ ମୋ କଲେଜ ଅଭିଯାନ ଯୋଜନାରେ ତିନି ମହାପୁରୁଷଙ୍କ ପ୍ରତିମୂର୍ତ୍ତି ସୋମବାର ଦିନ ଶୁଭ ଉଦ୍ଘାଟିତ ହୋଇଯାଇଛି । ଏହି ଅବସରରେ କଲେଜର ପୁରାତନ ଛାତ୍ର ଆଲୁମିନି ତଥା ଆଇଏସ(ଡାଇରେକ୍ଟର, ପରିବାର ମଂଗଲ ବିଭାଗ ଓଡିଶା) ଅରବିନ୍ଦ ଅଗ୍ରଫ୍ୱାଲ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । କଲେଜ ମୁଖ୍ୟ ଫାଟକରୁ ଶତାଧିକ ଛାତ୍ରଛାତ୍ରୀ ଦୁଇ ପଟେ ଛିଡା ହୋଇ କରତାଳିରେ ଭବ୍ୟ ସ୍ୱାଗତ କରିବା ସହିତ ତାଙ୍କୁ ପୁଷ୍ପମାଲ୍ୟ ଦେଇ ସମ୍ବର୍ଦ୍ଧନା ଦେଇଥିଲେ । କଲେଜ ପରିସରରେ ମହାତ୍ମା ଗାନ୍ଧୀ, ସୁବାଷ ଚନ୍ଦ୍ର ବୋଷ, ବୀର ସୁରେନ୍ଦ୍ର ସାଏଙ୍କ ପ୍ରତିମୂର୍ତ୍ତି ଅନାବରଣ କରିବା ସହ ଏଡମିନିଷ୍ଟ୍ରେଟିଭ ବିଲ୍ଡିଂଗ ପରିସରରେ ସ୍ୱଭାବ କବି ଗଙ୍ଗାଧର ମେହେର ଓ ଭୀମ ଭୋଇଙ୍କ ପ୍ରତିମୂର୍ତ୍ତି ଅନାବରଣ କରିଥିଲେ । କଲେଜର ଅନ୍ୟ ଆଲୁମିନି ତଥା ପ୍ରଥମ ଓଡିଶା ପ୍ରଶାସନିକ ଅଧିକାରୀ ଭାବେ ତପିରାମ ମାଝି ସମ୍ମାନିତ ଅତିଥି ଭାବେ ନିମନ୍ତ୍ରିତ ଥିଲେ ସୁଦ୍ଧା କୌଣସି କାରଣରୁ ଯୋଗ ଦେଇ ପାରି ନଥିଲେ । ଏହି କାର୍ଯ୍ୟକ୍ରମରେ କଲେଜର ଅଧ୍ୟକ୍ଷ ସତ୍ୟବ୍ରତ ମିଶ୍ର ସହ ସମସ୍ତ ଅଧ୍ୟାପିକା, ଅଧ୍ୟାପକ ଏବଂ ଛାତ୍ରଛାତ୍ରୀ ସାମିଲ ଥିଲେ । କଲେଜର ପୁରାତନ ଛାତ୍ର ହିସାବରେ ବିଭିନ୍ନ ଉନ୍ନୟନମୂଳକ କାର୍ଯ୍ୟ ପ୍ରତି ଧ୍ୟାନ ଦେବେ ବୋଲି ଶ୍ରୀ ଅଗ୍ରୱାଲ ନିଜର ମତ ରଖିଥିଲେ ।