ସକ୍ରିୟ ଏବଂ ପ୍ରଯୁକ୍ତି ଆଧାରିତ ପ୍ରଶାସନକୁ ଅଧିକ ଦକ୍ଷ ଓ ସୁଦୃଢ଼ କରିଛି ‘ପ୍ରଗତି’

ନୂଆଦିଲ୍ଲୀ, (ପିଆଇବି) : କେନ୍ଦ୍ର କ୍ୟାବିନେଟ୍ ସଚିବ ଏବଂ ଅନ୍ୟ ବିଭାଗୀୟ ସଚିବମାନେ ଆଜି ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ପ୍ରଗତି ବ୍ୟବସ୍ଥା (ପ୍ରୋ ଆକ୍ଟିଭ୍ ଗଭର୍ଣ୍ଣାନ୍ସ ଏଣ୍ଡ ଟାଇମ୍ଲି ଇମ୍ପ୍ଲିମେଣ୍ଟେସନ୍ ବା ସକ୍ରିୟ ପ୍ରଶାସନ ଏବଂ ସମୟୋଚିତ କାର୍ଯ୍ୟକାରିତା)ର ଫଳାଫଳ ବିଷୟରେ ଗଣମାଧ୍ୟମକୁ ସୂଚନା ଦେଇଛନ୍ତି ।
କ୍ୟାବିନେଟ୍ ସଚିବ କହିଥିଲେ, ପ୍ରଗତି ଇକୋସିଷ୍ଟମ ଅଧୀନରେ ପ୍ରକଳ୍ପଗୁଡ଼ିକୁ ପ୍ରଭାବୀ ଢଙ୍ଗରେ କାର୍ଯ୍ୟକାରୀ କରାଯାଉଛି । ଏହା ବିଭିନ୍ନ ପ୍ରସଙ୍ଗର ତ୍ୱରିତ ସମାଧାନ କରୁଥିବା ସେ କହିଥିଲେ । ପ୍ରଗତି ବ୍ୟବସ୍ଥା ବିଭିନ୍ନ ସ୍ତର ଏବଂ ରାଜ୍ୟ ସରକାରଙ୍କ ମଧ୍ୟରେ ପ୍ରସଙ୍ଗଗୁଡ଼ିକର ବ୍ୟବସ୍ଥିତ ତଦାରଖ ଏବଂ ସେଗୁଡ଼ିକର ସମାଧାନକୁ ସକ୍ଷମ କରିଥାଏ ବୋଲି ସେ କହିଥିଲେ ।
କ୍ୟାବିନେଟ ସଚିବ କହିଥିଲେ, ପ୍ରାରମ୍ଭରେ ମନ୍ତ୍ରଣାଳୟ ସ୍ତରରେ ସମସ୍ୟାଗୁଡ଼ିକର ସମାଧାନ ହେଉଥିଲେ ମଧ୍ୟ ଉଚ୍ଚସ୍ତରୀୟ ସମୀକ୍ଷା ପାଇଁ ପ୍ରତିଷ୍ଠିତ ସଂସ୍ଥାଗତ ବ୍ୟବସ୍ଥା ମାଧ୍ୟମରେ ଜଟିଳ ଏବଂ ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡ଼ିକୁ ଆଗକୁ ବଢ଼ାଯାଏ । ସେଗୁଡ଼ିକ ଶେଷରେ ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ପ୍ରଗତି ବୈଠକରେ ସମାଧାନ କରାଯାଏ ।
ଏହି ପର୍ଯ୍ୟାୟକ୍ରମିକ ଅଗ୍ରଗତି ବ୍ୟବସ୍ଥା ଆନ୍ତଃମନ୍ତ୍ରଣାଳୟ ସମନ୍ୱୟ, ସମୟବଦ୍ଧ ନିଷ୍ପତ୍ତି ଗ୍ରହଣ ଏବଂ ଜାତୀୟ ଗୁରୁତ୍ୱ ବହନ କରୁଥିବା ପ୍ରକଳ୍ପର କାର୍ଯ୍ୟକାରିତା ସହ ଜଡ଼ିତ ବାଧାଗୁଡ଼ିକର ସମାଧାନ ସୁନିଶ୍ଚିତ କରିଥାଏ । ‘ପ୍ରଗତି’ ଉଚ୍ଚତମ ସ୍ତରରେ ନିରନ୍ତର ତଦାରଖ ଏବଂ ସମୀକ୍ଷା ମାଧ୍ୟମରେ ଉତ୍ତରଦାୟିତ୍ୱ ନିର୍ଦ୍ଧାରଣ କରିଥାଏ ଏବଂ ପ୍ରକଳ୍ପ କାର୍ଯ୍ୟକାରିତାର ଗତି ବଢ଼ାଇବା ଲାଗି ଏକ ପ୍ରଭାବୀ ମଞ୍ଚ ରୂପରେ କାର୍ଯ୍ୟ କରିଥାଏ ବୋଲି କ୍ୟାବିନେଟ୍ ସଚିବ ଗୁରୁତ୍ୱାରୋପ କରି କହିଥିଲେ ।