- ମୋ ସ୍ୱାମୀଙ୍କୁ ଗିରଫ କର, ଦଣ୍ଡ ଦିଅ : ମୁସ୍କାନ ଜୈନ
- ପରକୀୟା ପ୍ରୀତି ଉଜାଡି ଦେଲା ସୁନା ସଂସାର
ବଲାଙ୍ଗିର, (ଦେବାଶିଷ ମିଶ୍ର) : ପରକୀୟା ପ୍ରୀତି କେତେ ଯେ ସୁନାର ସଂସାର ଉଜାଡି ଦେଇଛି ତାହାର ହିସାବ ନାହିଁ । ସାମାନ୍ୟ କିଛି ସମୟର ଉନ୍ମାଦନା ବର୍ଷ ବର୍ଷର ମଧୁର ସଂପର୍କକୁ ଉଜାଡି ଦିଏ । ପିଲାଛୁଆ, ସ୍ତ୍ରୀ ଛାଡି ବନ୍ଧୁ ପତ୍ନୀର ମାୟାଜାଲରେ ପଡି ଉଭୟ ପରିବାର ଓ ବନ୍ଧୁତ୍ୱର ବିଶ୍ୱାସରେ ବିଷ ଦିଏ ଉନ୍ମତ୍ତ ବନ୍ଧୁ । ସବୁ କିଛି ଭୁଲି ବନ୍ଧୁପତ୍ନୀକୁ ନେଇ ଫେରାର୍ ମାରେ । ଆଉ ପରିତ୍ୟକ୍ତା ସ୍ତ୍ରୀ ନିଜ ହକ୍ ପାଇଁ ଥାନାର ଦ୍ୱାରସ୍ତ ହୋଇ ଗୁହାରି କରେ – ମୋ’ ସ୍ୱାମୀଙ୍କୁ ଖୋଜ, ଗିରଫ କର, ଦଣ୍ଡ ଦିଅ । ମୋ ସ୍ୱାମୀର ପରକୀୟା ପ୍ରୀତି ଉଜାଡି ଦେଲା ମୋ’ ସୁନା ସଂସାର । କୋହ ଭରା ସ୍ୱରରେ ପଚାରେ, ଏବେ ମୋର ଆଉ ମୋ ଛୁଆମାନଙ୍କ କ’ଣ ହେବ ? କିଏ ଆମକୁ ନ୍ୟାୟ ଦେବ ? ଏଭଳି ଏକ ଘଟଣାକୁ ନେଇ ଏବେ ସହରରେ ଚର୍ଚ୍ଚା ଜୋର ଧରିଛି ।
ସ୍ଥାନୀୟ ଖଦାଲପଡା ନିବାସୀ ତଥା ଜଣାଶୁଣା ଜମି ବେପାରୀ ବିକାଶ ଜୈନ ନିଜ ବନ୍ଧୁପତ୍ନୀ ସୁନୀତାଙ୍କୁ ନେଇ ଫେରାର୍ ମାରିଥିବା ନେଇ ଖୋଦ୍ ବିକାଶର ପତ୍ନୀ ମୁସ୍କାନ୍ ଥାନାରେ ଏତଲା ଦେବା ସହ ଉଭୟଙ୍କୁ ଗିରଫ କରି ଦଣ୍ଡ ଦେବାକୁ ଦାବୀ କରିଛନ୍ତି । ପତ୍ନୀ ମୁସ୍କାନ୍ କହିଛନ୍ନ୍ତି ଯେ, ପ୍ରାୟ ଏକ ବର୍ଷ ହେବ ବିକାଶ ନିଜ ବନ୍ଧୁପତ୍ନୀର ପ୍ରେମରେ ପଡି ନିଜ ସ୍ତ୍ରୀ ଓ ଛୁଆପିଲା ଛାଡି ବନ୍ଧୁପତ୍ନୀଙ୍କୁ ବାହା ହେବା ପାଇଁ ପାଗଳ ପରି ମାତିଛନ୍ତି । ଏହାକୁ ବାରଣ କଲେ ସ୍ତ୍ରୀ ଓ ଛୁଆ ପିଲା ଉପରେ ମାର୍ ପିଟ୍ କରୁଛନ୍ତି । କିଛି ଦିନ ତଳେ ବିକାଶ ବନ୍ଧୁପତ୍ନୀକୁ ନେଇ ଫେରାର୍ ମାରିଥିଲେ । କିଛି ଦିନ ବାହାରେ ରହିବା ପରେ ଘରକୁ ଫେରି ଏଭଳି ଆଉ ନକରିବା ପ୍ରତିଶୃତି ଦେବା ସହ ସ୍ତ୍ରୀଙ୍କୁ ଭୁଲ ମାଗିଥିଲେ । ହେଲେ ପନ୍ଦର ଦିନ ନଯାଉଣୁ ତାଙ୍କ ମୁଣ୍ଡକୁ ପୁଣି ସୈତାନ ଚଢିଥିଲା । ପତ୍ନୀଙ୍କୁ ଅକଥନୀୟ ଅତ୍ୟାଚାର କରିବା ସହ ପତ୍ନୀଙ୍କ ହାତ ଭାଙ୍ଗି ଦେଇଥିଲେ । ତେବେ ଗତ ଗୁରୁବାର ୨୩ ତାରିଖ ଦିନ ଘରୁ ଟଙ୍କା ସୁନା ଜମି କାଗଜପତ୍ର ନେଇ ବିକାଶ ନିଜ ବନ୍ଧୁପତ୍ନୀଙ୍କ ସହ ପୁଣି ଥରେ ଫେରାର୍ ମାରିଥିବା ଅଭିଯୋଗ କରିଛନ୍ତି ପତ୍ନୀ ମୁସ୍କାନ୍ ।
ତେବେ ଏ ସମ୍ପର୍କରେ ସୁନୀତାଙ୍କ ସ୍ୱାମୀ ଅକ୍ଷୟ ରାଉତଙ୍କୁ ପଚରା ଯିବାରୁ ମୋର ସ୍ତ୍ରୀ ସୁନିତା ସହିତ ଆଉ ମୋର କୌଣସି ସମ୍ପର୍କ ନାହିଁ, ଗତ ଗୁରୁବାର ଠାରୁ ଉଭୟଙ୍କର କୌଣସି ଖୋଜ୍ ଖବର୍ ନାହିଁ ବୋଲି ସେ କହିଛନ୍ତି । ଅନ୍ୟପଟେ ବିକାଶ ଜୈନ ନିଜ ନମ୍ବର ବନ୍ଦ ରଖିଥିବା ଓ କୌଣସି ବ୍ୟାଙ୍କ ଦେନ ନେଣ କରୁ ନଥିବା ସ୍ଥଳେ ତାଙ୍କୁ ଖୋଜିବା କଷ୍ଟକର ହୋଇ ପଡିଛି । ତା’ ସତ୍ୱେ ବଲାଙ୍ଗିର ପୋଲିସ ବିକାଶ ଜୈନଙ୍କୁ ଖୋଜାଖୋଜି ଜାରି ରଖିଥିବା ଟାଉନ ଥାନା ପକ୍ଷରୁ କୁହାଯାଇଛି । ତେବେ ଏ ଘଟଣା ସମ୍ବନ୍ଧରେ ବିକାଶ ଓ ସୁନୀତାଙ୍କ ମତାମତ ମିଳି ପାରିନାହିଁ । ସେମାନେ ଧର ପଡ଼ିଲା ପରେ ଯାଇ ଘଟଣାର ସତ୍ୟାସତ୍ୟ ଜଣା ପଡିବ ବୋଲି ଅଂଚଳରେ ଚର୍ଚ୍ଚା ଜୋର ଧରିଛି ।