ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ସଦରଥାନା ଅନ୍ତର୍ଗତ ପଥରଚେପା ଗାଁରେ ଗୋଷ୍ଠୀ ସଂଘର୍ଷ । ସାମାନ୍ୟ ଗଞ୍ଜେଇ ଟାଣିବାକୁ କେନ୍ଦ୍ର କରି ହୋଇଥିଲା ଏହି ଗୋଷ୍ଠୀ ସଂଘର୍ଷ । ଗୋଷ୍ଠୀ ସଂଘର୍ଷରେ ଦୁଇପକ୍ଷର ୫ଜଣ ଆହତ ହୋଇଛନ୍ତି । ଆହତମାନଙ୍କ ମଧ୍ୟରୁ ଜଣଙ୍କ ଅବସ୍ଥା ଗୁରୁତର ହେବାରୁ ବିଳମ୍ବିତ ରାତିରେ ତାଙ୍କୁ ବୁର୍ଲା ସ୍ଥାନାନ୍ତର କରାଯାଇଛି । ତେବେ ଆକ୍ରମଣକାରୀ ଏବଂ ଆହତମାନେ ସ୍ଥାନୀୟ ଅଞ୍ଚଳର ହୋଇଥିବା ବେଳେ ଆହତଙ୍କ ମଧ୍ୟରେ ଅଜିତ ମିର୍ଦ୍ଧା, ରମାକାନ୍ତ ମିର୍ଦ୍ଧା, ହୀରାଲାଲ ଜଗଦଲା, ମମତା ଜଗଦଲା ଏବଂ ସୁନୀଲ ଜଗଦଲା ରହିଥିବା ଜଣାପଡ଼ିଛି । ସଚୂନା ଅନୁସାରେ କିଛି ଯୁବକ ଗତକାଲି ରାତିରେ ଜଗଦଲା ପରିବାରଙ୍କ ଚାଲ ଘର ନିକଟରେ ବସି ଗଞ୍ଜେଇ ଟାଣୁଥିଲେ । ନିଆଁ କାଳେ ଲାଗିଯିବ କହି ଜଗଦଲା ପରିବାରର ମହିଳାମାନେ ଯୁବକମାନଙ୍କୁ ମନା କରିଥିବା ବେଳେ ଏତିକିରେ ପାଟିତୁଣ୍ଡ ଆରମ୍ଭ ହୋଇଯାଇଥିଲା । ଆଉ ପାଟି ତୁଣ୍ଡରୁ ହିିଁ ଗୋଷ୍ଠୀ ସଂଘର୍ଷ ପରିସ୍ଥିତି ଉପୁଜୁଥିଲା । ଗଞ୍ଜେଇ ଟାଣୁଥିବା ଯୁବକମାନେ ମାରଣାସ୍ତ୍ରରେ ଆଖିବୁଜା ଆକ୍ରମଣ କରିଥିଲେ । ଏଥିରେ ଜଣେ ଶିଶୁ, ବୃଦ୍ଧା ସହ ସମୁଦାୟ ୫ଜଣ ଲହୁଲୁହାଣ ହୋଇଥିଲେ । ଉଭୟ ପଟରୁ ମାରପିଟ ହେବାପରେ ନିଶାଶକ୍ତ ଆକ୍ରମଣକାରୀମାନେ ଘରେ ନିଆଁ ଲଗାଇଦେଇ ସେଠାରୁ ଫେରାର ମାରିଥିଲେ । ସ୍ଥାନୀୟ ଲୋକଙ୍କ ସହଯୋଗରେ ଆହତମାନଙ୍କୁ ଉଦ୍ଧାର କରି ଭୀମ ଭୋଇ ମେଡ଼ିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ଗୋଷ୍ଠୀ ସଂଘର୍ଷ ସମ୍ପର୍କରେ ଖବରପାଇ ବଲାଙ୍ଗିର ସଦର ଥାନା ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଅଗ୍ନିଶମ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିଥିବା ସୂଚନା ରହିଛି ।