ବଲାଙ୍ଗିର, (କେପିଏନ୍ଏସ୍) : ବୁଧବାର ଦିନ ସ୍ଥାନୀୟ କାମାକ୍ଷାନଗର ନିକଟସ୍ଥ ଗାୟତ୍ରୀ ମନ୍ଦରି ପ୍ରାଙ୍ଗଣରେ ବସନ୍ତ ପଞ୍ଚମୀ ପର୍ବ ବା ସରସ୍ୱତୀ ପୂଜା ମହାସମାରୋହରେ ପାଳିତ ହୋଇଯାଇଛି । ଗାୟତ୍ରୀ ପରିବାର ଟ୍ରଷ୍ଟ, ବଲାଙ୍ଗିର ଆନୁକୁଲ୍ୟରେ ଆୟୋଜିତ ଏହି କାର୍ଯ୍ୟକ୍ରମରେ ଆକାଶବାଣୀ ବଲାଙ୍ଗିରର କେନ୍ଦ୍ରମୁଖ୍ୟ ମନୋଜ କୁମାର ପୂଜାରୀ ମୁଖ୍ୟ ଅତିଥି ଭାବେ ଯୋଗଦେଇଥିଲେ । ସମ୍ମାନିତ ଅତିଥି ରୂପେ ବିଜୟ କୁମାର ପୁରୋହିତ, ସୁଧାଂଶୁ ଶେଖର ବଳିୟାରସିଂ ଉପସ୍ଥିତ ରହି ସମସ୍ତ ଭକ୍ତମାନଙ୍କ ଉତ୍ସାହ ବର୍ଦ୍ଧନ କରିଥିଲେ । ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ ଗାୟତ୍ରୀ ଯଜ୍ଞ, ସରସ୍ୱତୀ ପୂଜା, ପରମ ପୂଜ୍ୟ ଗୁରୁଦେବଙ୍କ (ପଣ୍ଟିତ ଶ୍ରୀରାମ ଶର୍ମା ଆଚାର୍ଯ୍ୟ) ଆଧ୍ୟାତ୍ମିକ ଜନ୍ମ ଦିବସ, ବିଦ୍ୟାରମ୍ଭ ସଂସ୍କାର ଆଦି କାର୍ଯ୍ୟକ୍ରମ ଶ୍ରଦ୍ଧା, ନିଷ୍ଠାର ସହ ସମ୍ପନ୍ନ ହୋଇଥିଲା । ଟ୍ରଷ୍ଟ ଦ୍ୱାରା ନିର୍ମାଣ କରାଯାଉଥିବା ଗାୟତ୍ରୀ ଶକ୍ତିପୀଠର ପ୍ରଗତି, ଖର୍ଚ୍ଚର ଏବଂ ଦାନ ସ୍ୱରୂପ ପାଇଥିବା ସହଯୋଗର ବିବରଣୀ ସମୀକ୍ଷା କରାଯାଇ ଭବିଷ୍ୟତ କାର୍ଯ୍ୟପନ୍ଥା ନିର୍ଦ୍ଧାରଣ କରାଗଲା । ଆଗାମୀ ବସନ୍ତ ପଞ୍ଚମୀ ସୁଦ୍ଧା ଏକବର୍ଷ ମଧ୍ୟରେ ମନ୍ଦିର ପ୍ରତିଷ୍ଠା କାର୍ଯ୍ୟ ସମ୍ପନ୍ନ କରି ବଲାଙ୍ଗିରର ଜନସାଧାରଣଙ୍କୁ ସମର୍ପିତ କରାଯିବ ବୋଲି ଟ୍ରଷ୍ଠ ତରଫରୁ ସୂଚନା ଦିଆଯାଇଛି । ସମସ୍ତଙ୍କୁ ସାହାଯ୍ୟ ସହଯୋଗ କରିବା ପାଇଁ ନିବେଦନ କରିଛନ୍ତି । ଶେଷରେ ପ୍ରସାଦ ସେବନର କାର୍ଯ୍ୟ ସମ୍ପନ୍ନ ହୋଇଥିଲା ।