- ପରିବର୍ତ୍ତନଶୀଳ ଗଣମାଧ୍ୟମରେ ମିଥ୍ୟା ଖବରର ସ୍ଥାନ ନାହିଁ – ଡା.ଶର୍ବଣା ବିବେକ ଏମ୍.
ବ୍ରହ୍ମପୁର, (କେ. ସତ୍ୟନାରାୟଣ ରେଡ୍ଡୀ) : ଜାତୀୟ ପ୍ରେସ ଦିବସ ଅବସରରେ ବ୍ରହ୍ମପୁର ସହରର ଡାଇମଣ୍ଡ ଜୁବୁଲି ଟାଉନ୍ ହଲ୍ ପରିସରରେ ଗଞ୍ଜାମ ଜିଲ୍ଲାସ୍ତରୀୟ ପ୍ରେସ୍ ଦିବସ ସମାରୋହ, ଆଲୋଚନା ଚକ୍ର ଓ ବନ୍ଧୁମିଳନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଗଞ୍ଜାମ ଜିଲ୍ଲା ସୂଚନା ଓ ଲୋକସମ୍ପର୍କ ବିଭାଗ (ଛତ୍ରପୁର) ଆନୁକୂଲ୍ୟରେ ଏବଂ ବ୍ରହ୍ମପୁର ପ୍ରେସ୍ କ୍ଲବ ସହଯୋଗରେ ଆୟୋଜିତ ଏହି ଉତ୍ସବର ପ୍ରାରମ୍ଭରେ ପ୍ରଦୀପ ପ୍ରଜଳ୍ଳନ ପୂର୍ବକ ଅତିଥିମାନଙ୍କ ଦ୍ଵାରା ଏହାକୁ ଆନୁଷ୍ଠାନିକ ଭାବେ ଉଦ୍ଘାଟନ ହୋଇଥିଲା । ବ୍ରହ୍ମପୁର ନୀଳକଣ୍ଠନଗରର ସରସ୍ୱତୀ ଶିଶୁ ବିଦ୍ୟା ମନ୍ଦିର ଅନୁଷ୍ଠାନର ବିଦ୍ୟାର୍ଥୀଙ୍କ ଦ୍ୱାରା ବନ୍ଦେ ଉତ୍କଳ ଜନନୀ ସଙ୍ଗୀତ ପରିବେଷଣ କରାଯାଇଥିଲା । ଆୟୋଜିତ କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ବ୍ରହ୍ମପୁର ଆରକ୍ଷୀ ଅଧିକ୍ଷକ ଡା. ଶର୍ବଣା ବିବେକ ଏମ୍. ଯୋଗଦେଇ ସମୟ ସହିତ ତାଳ ଦେଇ ଗଣମାଧ୍ୟମ ପ୍ରକୃତି ପରିବର୍ତ୍ତନ ହୋଇ ଚାଲିଛି, ତାହାରି ଉପରେ ଗୁରୁତ୍ୱରୋପ କରିଥିଲେ । ଦେଶରେ ଗଣମାଧ୍ୟମ ମଧ୍ୟ ସାମ୍ୱାଦିକଙ୍କ ରୁଚି ଅନୁଯାୟୀ ଖବର ପରିବେଷଣର ବିଭିନ୍ନ ବିଭକ୍ତିକରଣ ଉପରେ ଆଲୋକପାତ କରିବା ସହ ସ୍ୱାଧିନତା ପୂର୍ବରୁ ଗଣମାଧ୍ୟମକୁ କିଭଳି କଣ୍ଠରୋଧ କରିବାକୁ ପ୍ରୟାସ ହୋଇଥିଲା ଏବଂ ସେହି ସମୟର କାର୍ଯ୍ୟ ଉପରେ ବ୍ୟାଖ୍ୟା କରିବା ସହ ସାମାଜିକ ଗଣମାଧ୍ୟମରେ ମିଥ୍ୟା ଖବର ପ୍ରସାରିତ ହେବା ଏବଂ ତାହାର ପ୍ରଭାବ ଉପରେ ତଥ୍ୟଭିତ୍ତିକ ଉପସ୍ଥାପନା କରିଥିଲେ । ଏଥିସହ ପରିବର୍ତ୍ତନଶୀଳ ଗଣମାଧ୍ୟମରେ ମିଥ୍ୟା ଖବରର ସ୍ଥାନ ନାହିଁ ବୋଲି କହିଥିଲେ । ଏଥିସହ ପ୍ରତିକୂଳ ବ୍ୟବସ୍ଥା ସତ୍ତ୍ୱେ ସାମ୍ୱାଦିକ କାର୍ଯ୍ୟ ଏବଂ ସାମ୍ୱାଦିକର ମୌଳିକ ନୀତିକୁ ଆଧାର କରି ଜନସାଧାରଣଙ୍କ ନିକଟରେ ଯେପରି ସତ୍ୟ, ବସ୍ତୁନିଷ୍ଠ, ସଠିକ୍ ଓ ନିରପେକ୍ଷ ସୂଚନା ପହଞ୍ଚାଇବାକୁ ଆହ୍ୱାନ କରିଥିଲେ । କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ବ୍ରହ୍ମପୁର ଉପଜିଲ୍ଲାପାଳ ଦୀନା ଦସ୍ତାଗୀର ଯୋଗଦେଇ ସମୟ ପରିବର୍ତ୍ତନ ସହ ଗଣମାଧ୍ୟମର ମଧ୍ୟ ପରିବର୍ତ୍ତନ ଘଟିବା ଏବଂ ଏପରି ଜାତୀୟ ପ୍ରେସ୍ ଦିବସ ପାଳନର ଅନେକ ଗୁରୁତ୍ୱ ବହନ କରୁଥିବା ନିଜର ବକ୍ତବ୍ୟରେ ଜଣାଇଥିଲେ । ଦକ୍ଷିଣାଞ୍ଚଳ ଭାରପ୍ରାପ୍ତ ଉପ-ନିର୍ଦ୍ଦେଶକ ତଥା ଗଞ୍ଜାମ ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ରବି ନାରାୟଣ ବେହେରା କାର୍ଯ୍ୟକ୍ରମରେ ସ୍ୱାଗତ ଭାଷଣ ପ୍ରଦାନ କରିବା ସହ ଏହି ଦିବସର ତାତ୍ପର୍ଯ୍ୟ ସଂପର୍କରେ ଆଲୋକପାତ କରିଥିଲେ । ସେ ତାଙ୍କ ବକ୍ତବ୍ୟରେ କହିଥିଲେ ଯେ’ ସ୍ୱାଧିନ ଓ ମୁକ୍ତ ଗଣମାଧ୍ୟମ ହେଉଛି ଶକ୍ତିଶାଳୀ ଗଣତନ୍ତ୍ରର ଚାରୋଟି ସ୍ତମ୍ଭ ମଧ୍ୟରୁ ଅନ୍ୟତମ । ଗଣମାଧ୍ୟମ ଚତୁର୍ଥସ୍ତମ୍ଭ ସତର୍କ ପ୍ରହରୀ ଭାବରେ କାର୍ଯ୍ୟ କରୁଛି । ବ୍ରହ୍ମପୁର ପ୍ରେସ୍ କ୍ଲବର ସଭାପତି ଅଶୋକ କୁମାର ବ୍ରହ୍ମା କାର୍ଯ୍ୟକ୍ରମକୁ ପରିଚାଳନା କରିବା ସହିତ ନିଜ ବକ୍ତବ୍ୟରେ ସମାଜକୁ ଦିଗ୍ଦର୍ଶନ ଦେବା ସମସ୍ତ ଗଣମାଧ୍ୟମର ଲକ୍ଷ୍ୟ ହେବା ଉଚିତ । ଯୁଗ ସହିତ ତାଳ ଦେଇ ଗଣମାଧ୍ୟମ ପରିବର୍ତ୍ତନ ହେଉଛି ଏଣୁ ଜନସାଧାରଣଙ୍କ ଚିନ୍ତାଧାରକୁ ପାଥେୟ କରି ଗଣମାଧ୍ୟମର ମଧ୍ୟ ପରିବର୍ତ୍ତନ ଘଟୁଥିବା କହିଥିଲେ । କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ବରିଷ୍ଠ ସାମ୍ୱାଦିକ ଶକ୍ତିଧର ରାଜଗୁରୁ ନିଜର ଅଭିଭାଷଣରେ ନିର୍ଭକ ଓ ନିରପେକ୍ଷ ସାମ୍ୱାଦିକତା ଆଜିର ଦିନର ପ୍ରାୟ ଦୁର୍ଲଭ । ଗଣମାଧ୍ୟମ ଯେତେ ସ୍ୱାଧୀନ ହେବ ଗଣତନ୍ତ୍ର ସେତେ ସୁଦୃଢ ହେବ କହିବା ସହ ସାମ୍ୱାଦିକଙ୍କ ପାଇଁ ସୁରକ୍ଷା ଆଇନ ବ୍ୟବସ୍ଥା କରିବାକୁ ପ୍ରସ୍ତାବ ଦେଇଥିଲେ । ଇଟିଭି ଭାରତ ବରିଷ୍ଠ ସାମ୍ୱାଦିକ ତାଙ୍କ ଅଭିଭାଷଣରେ ଦେବର୍ଷି ନାରଦଙ୍କ ଠାରୁ ବର୍ତ୍ତମାନ ପର୍ଯ୍ୟନ୍ତ ଗଣମାଧ୍ୟମରେ ଅନେକ ପରିବର୍ତ୍ତନ ଘଟିଛି । ଆଜିର ଇଣ୍ଟରନେଟ୍ ଯୁଗରେ ଗଣମାଧ୍ୟମ ସମସ୍ତଙ୍କର ଉନ୍ନତି ନିମନ୍ତେ ସଠିକ୍ ଖବର ପ୍ରସାରଣ ଉପରେ ଗୁରୁତ୍ୱାରୋପ କରିବା ସହ ଚତୁର୍ଥସମ୍ଭ ଭାବେ ଗଣମାଧ୍ୟମର ଉତ୍ତରଦାୟିତ୍ୱ ସବୁଠାରୁ ଗୁରୁତ୍ୱପୂର୍ଣ୍ଣ ବୋଲି କହିଥିଲେ । ଏପରିକି ଶାସନ ବ୍ୟବସ୍ଥାରେ ସ୍ୱସ୍ଥତା, ସମାଜରେ ନୈତିକତା ବଜାୟ ରଖିବା ଗଣମାଧ୍ୟମର ବଡ କର୍ତ୍ତବ୍ୟ ବୋଲି କହିଥିଲେ । ବ୍ରହ୍ମପୁର ବିଶ୍ୱବିଦ୍ୟାଳୟର ସାମ୍ୱାଦିକ ଓ ଗଣଯୋଗାଯୋଗ ବିଭାଗୀୟ ମୁଖ୍ୟ ବନ୍ଦିତା ପଣ୍ଡା ନିଜର ବକ୍ତବ୍ୟରେ ଆଜିର ପିଢି ସ୍ୱଳ୍ପ ସମୟରେ ସଂକ୍ଷିପ୍ତ ଆକାରରେ ଖବର ପାଇବାକୁ ଇଛୁକ । ଏଣୁ ଡିଜିଟାଲ ନ୍ୟୁଜ୍ ଉପରେ ଗୁରୁତ୍ୱଦେବାକୁ ସେ କହିଥିଲେ । କାର୍ଯ୍ୟକ୍ରମରେ ମୁଖ୍ୟବକ୍ତା ଭାବରେ ବରିଷ୍ଠ ଶିକ୍ଷାବିତ ଅମର ପ୍ରସାଦ ବିଷୋୟୀ ଯୋଗଦେଇ ନିଜର ବକ୍ତବ୍ୟରେ ପ୍ରତେକ ଦେଶରେ ଗଣମାଧ୍ୟମ ହେଉଛି ପଚ୍ଛଦ ପଟ୍ଟର ନାୟକ । ଗଣମାଧ୍ୟମ ଗଣତନ୍ତ୍ରର ଚତୁର୍ଥସ୍ତମ୍ଭ । ଆମେରିକାର ରାଷ୍ଟ୍ରପତି ମାତ୍ର ୪ ବର୍ଷ ପାଇଁ ଶାସନ କରନ୍ତି କିନ୍ତୁ ସେଠାକାର ଗଣମାଧ୍ୟମ ସାରା ଜୀବନ ଶାସନ କରିଥାଏ ବୋଲି କହିବା ସହିତ ସାଧାରଣ ଜନତା ଓ ସରକାରଙ୍କ ମଧ୍ୟରେ ସମସ୍ତ କାର୍ଯ୍ୟରେ ଯେ ମଧ୍ୟସ୍ଥତା କରିଥାନ୍ତି ସେ ହିଁ ଗଣମାଧ୍ୟମ ବୁଝାଏ ବୋଲି କହିଥିଲେ । ବର୍ତ୍ତମାନର ପରିବେଶ ଓ ପରିସ୍ଥିତିକୁ ନେଇ ଗଣମାଧ୍ୟମର ମଧ୍ୟ ପରିବର୍ତ୍ତନ ଘଟିଛି । ଗଣମାଧ୍ୟମର ଯେତେ ପରିବର୍ତ୍ତନ ହେଲେ ମଧ୍ୟ ଆମ ସମସ୍ତଙ୍କର ଲକ୍ଷ୍ୟ ଏକ ହେବା ଉଚିତ ବୋଲି ମତବ୍ୟକ୍ତ କରିଥିଲେ ।
ଅନ୍ୟମାନଙ୍କ ମଧ୍ୟରେ ସମାଜସେବୀ ସୁଶାନ୍ତ ସାବତ ନିଜର କଲମ ମୁନକୁ ଦେଶ ଓ ଜାତିର କଲ୍ୟାଣ ପାଇଁ ବ୍ୟବହାର କରିବାକୁ ଆହ୍ୱାନ ଦେଇଥିଲେ । ସୁସ୍ଥ ଗଣତନ୍ତ୍ର ପ୍ରତିଷ୍ଠା କରିବାରେ ସମସ୍ତେ ନିଜକୁ ସାମିଲ କରିବା ଉଚିତ୍ ବୋଲି ନିଜର ମତ ରଖିଥିଲେ । ବରିଷ୍ଠ ଆଇନଜୀବୀ ନିର୍ମଳ ସାହୁ ଏହି ଅବସରରେ ଗଣତନ୍ତ୍ରର ସୁଦୃଢ ପାଇଁ ଜନସାଧାରଣଙ୍କ ସମସ୍ୟା ସମସ୍ତଙ୍କ ପାଖରେ ପହଞ୍ଚାଇବା ପାଇଁ ଗଣମାଧ୍ୟମ କାର୍ଯ୍ୟ କରୁଥିବା ଏବଂ ସାମାଜିକ ସୁରକ୍ଷା ଦେବାରେ ଗଣମାଧ୍ୟମର ପ୍ରମୁଖ ଭୂମିକା ରହିଛି ବୋଲି ଆଲୋକପାତ କରିଥିଲେ । ଜିଲ୍ଲାସ୍ତରୀୟ ଜାତୀୟ ପ୍ରେସ୍ ଦିବସ ପାଳନ ଅବସରରେ ଦୀର୍ଘ ବର୍ଷ ଧରି ଗଣମାଧ୍ୟମରେ କାର୍ଯ୍ୟ କରି ଆସୁଥିବା ବରିଷ୍ଠ ସାମ୍ୱାଦିକ ନରସିଂହ ସାହୁ, ଏ. ରାଜା ରାଓ, ସୁନୀଲ ମୋହନ ପଟ୍ଟନାୟକ ଓ ହୃଷିକେଶ ମହାନ୍ତିଙ୍କୁ ଉପଢୌକନ ସହିତ ମାନପତ୍ର ଦେଇ ସମ୍ୱର୍ଦ୍ଧିତ କରାଯାଇଥିଲା । ଏଥିସହ ପୂର୍ବରୁ ଛତ୍ରପୁର ପ୍ରେସ୍ କ୍ଲବ ଏବଂ ବ୍ରହ୍ମପୁର ପ୍ରେସ୍ କ୍ଲବ ମଧ୍ୟରେ ଆୟୋଜିତ ହୋଇସାରିଥିବା ବନ୍ଧୁତ୍ୱପୂର୍ଣ୍ଣ କ୍ରିକେଟମ୍ୟାଚ୍ରେ ବିଜୟ କରିଥିବା ଛତ୍ରପୁର ପ୍ରେସ୍ କ୍ଲବକୁ ଏବଂ ରନର ଭାବରେ ବ୍ରହ୍ମପୁର ପ୍ରେସ୍ କ୍ଲବକୁ ପୁରସ୍କୃତ କରାଯାଇଥିଲା । ଶେଷରେ ପ୍ରେସ୍ କ୍ଲବ ବ୍ରହ୍ମପୁରର ସମ୍ପାଦକ ପ୍ରହଲ୍ଲାଦ ସାହୁ ଧନ୍ୟବାଦ ଅର୍ପଣ କରିଥିବା ବେଳେ ଯୁଗ୍ମ ସମ୍ପାଦକ ଡି. ଗୋପାଳକୃଷ୍ଣ ରେଡ୍ଡୀ, କୋଷାଧ୍ୟକ୍ଷ ଶିବନାରାୟଣ ପଣ୍ଡା, ଛତ୍ରପୁର ପ୍ରେସ୍ କ୍ଲବର ସଭାପତି ରବିନ୍ଦ୍ର ନାଥ ପଣ୍ଡା ପ୍ରମୁଖ ମଞ୍ଚାସୀନ ରହିଥିଲେ । ଏହି କାର୍ଯ୍ୟକ୍ରମରେ ସହରର ବହୁ ଗଣ୍ୟମାନ୍ୟ ବୁଦ୍ଧିଜୀବି, ଶିକ୍ଷାବିତ, ଗଣମାଧ୍ୟମ ପ୍ରତିନିଧିଗଣ ଏବଂ ବହୁ ଗଣ୍ୟମାନ୍ୟ ବ୍ୟକ୍ତି ଯୋଗଦେଇ ଏହାକୁ ସାଫଲ୍ୟ ମଣ୍ଡିତ କରିଥିଲେ ।