- ମହାରାଣୀ ସାଗର, ଇନ୍ଦିରାନଗର ଓ ଲକ୍ଷ୍ମୀଯୋର କଡରେ ରହୁଥିବା ଲୋକଙ୍କୁ ଜମିପଟ୍ଟା ପ୍ରଦାନର ହେବ ବ୍ୟବସ୍ଥା : ନରସିଂହ
- ଉପସ୍ଥିତ ବିଭାଗୀୟ ଅଧିକାରୀଙ୍କ ସହମତି, ଜମି ଜବରଦଖଲକାରୀ ପାଇବେ ଜମି
ବଲାଙ୍ଗିର, (ଦେବାଶିଷ ମିଶ୍ର) : ଭୁବନେଶ୍ୱର ବିଧାନସଭା ପରିସର ସଭାଗୃହ ନଗର ଉନ୍ନୟନ ବିଭାଗ ଗୃହ କମିଟିର ସବ୍ କମିଟି-୨ର ଏକ ବୈଠକ ଏହାର ଅଧ୍ୟକ୍ଷ ତଥା ବଲାଙ୍ଗିର ବିଧାୟକ ନରସିଂହ ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ବୈଠକରେ ନଗର ଉନ୍ନୟନ ବିଭାଗ ଅଧିନରେ ଥିବା ବିଭିନ୍ନ ଗୁରୁତ୍ୱପୂର୍ଣ୍ଣ ବିଷୟକୁ ନେଇ କିଛି ଲୋକାଭିମୁଖୀ ଆଲୋଚନା ହୋଇଥିଲା । ବିଶେଷ କରି ବଲାଙ୍ଗିର ସହରର ମହାରାଣୀ ସାଗର, ଇନ୍ଦିରାନଗର, ଲକ୍ଷ୍ମୀଯୋର କଡରେ ରହୁଥିବା ଭୂମିହୀନ ଗରିବମାନଙ୍କୁ କିଭଳି ସେହି ଜାଗାରେ ଥଇଥାନ କରାଯିବ ସେ ଉପରେ ଅଧ୍ୟକ୍ଷ ନରସିଂହ ମିଶ୍ର ଗୁରୁତ୍ୱାରୋପ କରିଥିଲେ । ସେ କହିଥିଲେ ବର୍ତ୍ତମାନ ଏସ୍ଏଚ୍ଜିମାନଙ୍କ ଦ୍ୱାରା ମହାରାଣୀ ସାଗରରେ ହେଉଥିବା ଉନ୍ନୟନ କାମ ଯେହେତୁ କେବଳ ପାଣି ଥିବା ଏରିଆରେ ହେଉଛି ତେଣୁ ବାକି ପାଖାପାଖି ୨୦ ଏକର ଜାଗାକୁ ସେଠାରେ ଘର କରି ରହୁଥିବା ଲୋକଙ୍କ ନାଁରେ ତୁରନ୍ତ ପଟ୍ଟା ଦିଆଯାଉ । ଯାହାକି ଗ୍ରାମ୍ୟ ଉନ୍ନୟନ ବିଭାଗର ବରିଷ୍ଠ ଅଧିକାରୀମାନେ ମଧ୍ୟ ଏହା ଉପରେ ସହମତି ପ୍ରକାଶ କରିଥିଲେ । ଅଧ୍ୟକ୍ଷ ଶ୍ରୀ ମିଶ୍ରଙ୍କ ନିର୍ଦ୍ଦେଶ ମୁତାବକ ଇନ୍ଦିରାନଗର ଅଂଚଳରେ ମଧ୍ୟ ପୂର୍ବରୁ ସରକାରଙ୍କ ଦ୍ୱାରା ପ୍ରସ୍ତାବିତ ଜିଲ୍ଲାପାଳ କାର୍ଯ୍ୟାଳୟ ଓ ସିଭିଲକୋର୍ଟ ନିର୍ମାଣ ହେବାର ନାହିଁ ତେଣୁ ସେଠାରେ ମଧ୍ୟ ଗରିବ ଜବରଦଖଲକାରୀଙ୍କ କବଜାରେ ଥିବା ସରକାରୀ ଜମିକୁ ଯିଏ ଯେଉଁଠାରେ ଘର କରି ରହୁଛି ତା’ ନାମରେ ସେଟେଲମେଣ୍ଟ କରି ଦେବା ପାଇଁ ଶ୍ରୀ ମିଶ୍ର ସରକାର ଓ ବିଭାଗୀୟ ଅଧିକାରୀଙ୍କୁ ରାଜି କରିଥିଲେ । ଠିକ୍ ସେହିପରି ଲକ୍ଷ୍ମୀଯୋରର ଉଭୟ କଡରୁ ବିସ୍ତାପିତ ହେବାକୁ ଥିବା ଲୋକଙ୍କୁ ଆଉ ବିସ୍ଥାପିତ ନ କରି ସେହିଠାରେ ହିଁ ତାଙ୍କୁ ଘର ଓ ଜମିର ପଟ୍ଟା ପ୍ରଦାନ କରାଯିବ । ସରକାରଙ୍କ ନଗର ଉନ୍ନୟନ ବିଭାଗର ନିର୍ଦ୍ଦେଶକ ଉପସ୍ଥିତ ଥିବା ଏହି ଗୃହ କମିଟି ବୈଠକରେ ଜଳଚର ଏରିଆରେ ଥିବା ଜବରଦଖଲକାରୀଙ୍କୁ ଜାଗା ମିଶନ ମାଧ୍ୟମରେ ଜାଗା ଓ ଘର ଦିଆଯିବାର ବ୍ୟବସ୍ଥା ଶୀଘ୍ର କରାଯିବା ସହ ଇନ୍ଦିରାନଗର ଓ ଅନ୍ୟାନ୍ୟ ଅଂଚଳର ଜବରଦଖଲକାରୀଙ୍କୁ ରାଜସ୍ୱ ବିଭାଗ ଜମି ଓ ପଟ୍ଟା ପ୍ରଦାନ କରିବେ ବୋଲି ସହମତି ପ୍ରକାଶ ପାଇଥିଲା । ଏଠାରେ ସୂଚନାଯୋଗ୍ୟ ଯେ, ଜାନୁୟାରୀ ୯ ତାରିଖରେ ବିଧାୟକଙ୍କ ଦ୍ୱାରା ମ୍ୟୁନିସିପାଲିଟିର ଏକ ସମୀକ୍ଷା ବୈଠକରେ ବିଧାୟକ ନରସିଂହ ମିଶ୍ର ପୌର ନିର୍ବାହୀ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ ଯେ, ଯେହେତୁ ଗରିବ ଲୋକ ଜବରଦଖଲ କରିବା ଜାଗାରେ କୌଣସି ଉନ୍ନୟନମୂଳକ ପ୍ରକଳ୍ପ ହେବାର ନାହିଁ ତେଣୁ ମୁଖ୍ୟତଃ ମହାରାଣୀସାଗର, ଇନ୍ଦିରାନଗର ଓ ଲକ୍ଷ୍ମୀଯୋର ଉଭୟ କଡରେ ରହୁଥିବା ଲୋକଙ୍କୁ ଜମିପଟ୍ଟା ପ୍ରଦାନ କରିବା ପାଇଁ ବିଭାଗ ବ୍ୟବସ୍ଥା କରୁ । ଆଜିର ଏହି ଗୃହ କମିଟି ବୈଠକର ନିଷ୍ପତ୍ତି ଶୀଘ୍ର କାର୍ଯ୍ୟକାରୀ ହେଲେ ବଲାଙ୍ଗିରର ଜବରଦଖଲ କରିଥିବା ଜମିରେ ବସବାସ କରୁଥିବା ଲୋକଙ୍କୁ ଏକ ବଡ ଆଶ୍ୱସ୍ତି ହେବ ବୋଲି ବିଧାୟକ ଶ୍ରୀ ମିଶ୍ର କହିଛନ୍ତି ।