ଡେଲାଙ୍ଗ, (ଦିଲ୍ଲୀପ କୁମାର ଧାଉଡିଆ) : ପୁରୀ ଜିଲ୍ଲା ଡେଲାଙ୍ଗ ପଞ୍ଚାୟତ ସମିତିର ନିର୍ବାଚିତ ସମିତି ସଭ୍ୟମାନଙ୍କୁ ନେଇ ପୂର୍ବରୁ ଗଠିତ ୭ଟି ଯାକ ଷ୍ଟାଣ୍ଡିଂ କମିଟିର ଅଧ୍ୟକ୍ଷ/ଅଧ୍ୟକ୍ଷା ନିର୍ବାଚନ ବୈଠକ ଡେଲାଙ୍ଗ ପଞ୍ଚାୟତ ସମିତି କାର୍ଯ୍ୟାଳୟ ସ୍ଥିତ ବିଜୁ ପଟ୍ଟନାୟକ ସମ୍ମିଳନୀ କକ୍ଷରେ ସୋମବାର ଅନୁଷ୍ଠିତ ହୋଇଯାଇଛି । ମଣ୍ଡଳ ଉନ୍ନୟନ ଅଧିକାରୀ ଦିଲ୍ଲୀପ କୁମାର ଷଡଙ୍ଗୀ, ଏବିଡିଓ ପ୍ରଦୀପ୍ତ କୁମାର ନାୟକ, ଜିପିଓ ରତିକାନ୍ତ ସାହୁ ନିର୍ବାଚନ ପରିଚାଳନା କରିଥିଲେ । ୧. ଅର୍ଥ, ଯୋଜନା, ଦାରିଦ୍ର୍ୟ ନିରୋଧ ଯୋଜନା, ସମନ୍ୱୟ କମିଟିର ଅଧ୍ୟକ୍ଷ ଭାବେ ଗଡମୋଟରି ପଞ୍ଚାୟତ ସମିତି ସଭ୍ୟ ଲଲାଟେନ୍ଦୁ ସାମନ୍ତରାୟ ହୋଇଛନ୍ତି । ସେହିପରି ୨. କୃଷି, ପଶୁପାଳନ, ମୃତ୍ତିକା ସଂରକ୍ଷଣ, ଉଦ୍ୟାନ କୃଷି, ମତ୍ସ୍ୟ ଚାଷ ବିକାଶ କମିଟିର ଅଧ୍ୟକ୍ଷ ଭାବେ ଖେଲାଉରି ପଞ୍ଚାୟତ ସମିତି ସଭ୍ୟ ଭୀମସେନ ପ୍ରଧାନ ହୋଇଛନ୍ତି । ୩. କାର୍ଯ୍ୟ, ଜଳସେଚନ, ବିଦ୍ୟୁତ, ଗ୍ରାମ୍ୟ ପାନୀୟଜଳ ଯୋଗାଣ କମିଟିର ଅଧ୍ୟକ୍ଷ ରୂପେ ଗୋଡିପୁଟ ମାଟିଆପଡା ପଞ୍ଚାୟତ ସମିତି ସଭ୍ୟ ଦୁର୍ବାଷା ନିଶଂକ ନିର୍ବାଚିତ ହୋଇଛନ୍ତି । ୪. ସ୍ୱାସ୍ଥ୍ୟ, ମହିଳା ଓ ଶିଶୁ ବିକାଶ, ସାମାଜିକ କଲ୍ୟାଣ କମିଟିର ଅଧ୍ୟକ୍ଷା ରୂପେ ହରିରାଜପୁର ପଞ୍ଚାୟତ ସମିତି ସଭ୍ୟା ବାସନ୍ତୀ ସାହୁ ନିର୍ବାଚିତ ହୋଇଛନ୍ତି । ୫. ସାଧାରଣ ବଣ୍ଟନ ବ୍ୟବସ୍ଥା, ଦୁର୍ବଳ ଶ୍ରେଣୀର କଲ୍ୟାଣ, ଜଙ୍ଗଲ, ଜାଳେଣି, ଗୋ ଖାଦ୍ୟ କମିଟିର ଅଧ୍ୟକ୍ଷ ଭାବେ ସିଂହବ୍ରହ୍ମପୁର ପଞ୍ଚାୟତ ସମିତି ସଭ୍ୟ ନରେନ୍ଦ୍ର ପ୍ରଧାନ ନିର୍ବାଚିତ ହୋଇଛନ୍ତି । ୬. କୁଟୀର ଶିଳ୍ପ, ଖଦି ଗ୍ରାମୋଦ୍ୟୋଗ କମିଟିର ଅଧ୍ୟକ୍ଷ ଭାବେ କଲ୍ୟାଣପୁର ପଞ୍ଚାୟତ ସମିତି ସଭ୍ୟ ସୁଶାନ୍ତ କୁମାର ଦାଶ ନିର୍ବାଚିତ ହୋଇଛନ୍ତି । ୭. ଶିକ୍ଷା, କ୍ରୀଡ଼ା ଓ ସଂସ୍କୃତି କମିଟିର ଅଧ୍ୟକ୍ଷା ଭାବେ ଅରିଶଲ ପଞ୍ଚାୟତ ସମିତି ସଭ୍ୟା ରିତାଞ୍ଜଳି ପ୍ରଧାନ ନିର୍ବାଚିତ ହୋଇଛନ୍ତି । ପ୍ରତ୍ୟେକ ଷ୍ଟାଣ୍ଡିଂ କମିଟି ୫ ଜଣ ସମିତି ସଭ୍ୟ/ସଭ୍ୟା ନେଇ ଗଠିତ । ତେବେ ଷ୍ଟାଣ୍ଡିଂ କମିଟି ଗଠନ ଓ ଏହାର ଅଧ୍ୟକ୍ଷ ନିର୍ବାଚନରେ ରାଜନୈତିକ ପକ୍ଷପାତିତା ହୋଇଥିବା ନେଇ କେତକ ବିରୋଧୀ ସଭ୍ୟ ଆରୋପ କରିବା ସହ ସୂଜନପୁର ପଞ୍ଚାୟତ ସମିତି ସଭ୍ୟ ଅଜୟ କୁମାର ରାଉତରାୟ ଏବଂ ଡେଲାଙ୍ଗ କୋଠାବାଡ଼ ପଞ୍ଚାୟତ ସମିତି ସଭ୍ୟା ରମାଦେବୀ ରାଉତରାୟ ଅସନ୍ତୋଷ ପ୍ରକାଶ କରିଛନ୍ତି ।