centurian jitm

ଚଳଚ୍ଚିତ୍ର ପ୍ରଯୋଜକ, ନିର୍ଦ୍ଦେଶକ ଓ ଟେକ୍ନିସିଆନଙ୍କୁ ୱେଭ୍ସ ୨୦୨୫ରେ ଯୋଗଦେବାକୁ ନିବେଦନ କଲେ କେନ୍ଦ୍ର ମନ୍ତ୍ରୀ ଡକ୍ଟର ଏଲ. ମୁରୁଗନ

  • ଦକ୍ଷିଣ ଭାରତୀୟ ଚଳଚ୍ଚିତ୍ର ସଂଘଗୁଡ଼ିକ ସହିତ କେନ୍ଦ୍ର ସୂଚନା ଓ ପ୍ରସାରଣ ରାଷ୍ଟ୍ର ମନ୍ତ୍ରୀଙ୍କ ଭର୍ଚୁଆଲ ବୈଠକ
  • ପ୍ରଧାନମନ୍ତ୍ରୀ ମୋଦୀଙ୍କ ଦୂରଦୃଷ୍ଟି ଅନୁରୂପ ୱେଭସ୍ ୨୦୨୫ର ଲକ୍ଷ୍ୟ ହେଉଛି ଗଣମାଧ୍ୟମ କ୍ଷେତ୍ରକୁ ଏକଜୁଟ କରିବା
  • ଦୃଢ଼ ଦକ୍ଷିଣ ଭାରତୀୟ ପ୍ରତିନିଧିତ୍ୱ ପାଇଁ କେନ୍ଦ୍ର ରାଷ୍ଟ୍ରମନ୍ତ୍ରୀ ଡଃ. ଏଲ. ମୁରୁଗନଙ୍କ ଆହ୍ୱାନ
  • ଅଗ୍ରଣୀ ପ୍ରଯୋଜନା ସଂସ୍ଥାଗୁଡ଼ିକୁ ନେଇ ଦକ୍ଷିଣ ଭାରତୀୟ ଚଳଚ୍ଚିତ୍ର ଶିଳ୍ପ ପାଇଁ ସ୍ୱତନ୍ତ୍ର ପାଭିଲିଅନ୍ ପାଇଁ ଆହ୍ୱାନ ଦେଲେ କେନ୍ଦ୍ର ମନ୍ତ୍ରୀ

ନୂଆଦିଲ୍ଲୀ, (ପିଆଇବି) : କେନ୍ଦ୍ର ସୂଚନା ଓ ପ୍ରସାରଣ ଏବଂ ସଂସଦୀୟ ବ୍ୟାପାର ରାଷ୍ଟ୍ରମନ୍ତ୍ରୀ ଡକ୍ଟର ଏଲ. ମୁରୁଗନ ଆଜି ତାମିଲନାଡ଼ୁ, କେରଳ, କର୍ଣ୍ଣାଟକ, ତେଲଙ୍ଗାନା ଏବଂ ଆନ୍ଧ୍ର ପ୍ରଦେଶର ପ୍ରତିନିଧିତ୍ୱ କରୁଥିବା ଚଳଚ୍ଚିତ୍ର ସଂଘର ପଦାଧିକାରୀମାନଙ୍କ ସହ ଏକ ଭର୍ଚୁଆଲ ବୈଠକରେ ଆଲୋଚନା କରିଛନ୍ତି । ବୈଠକରେ ସୂଚନା ଏବଂ ପ୍ରସାରଣ ମନ୍ତ୍ରଣାଳୟର ସଚିବ ସଞ୍ଜୟ ଜାଜୁ, ଯୁଗ୍ମ ସଚିବ (ଆଇ.ପି.) ସି. ସେନ୍ତିଲ ରାଜନ ଏବଂ ଯୁଗ୍ମ ସଚିବ (ଚଳଚ୍ଚିତ୍ର) ଡଃ. ଅଜୟ ନାଗଭୂଷଣ ଏମ୍.ଏନ୍ ମଧ୍ୟ ଉପସ୍ଥିତ ଥିଲେ । ମଇ ୧ରୁ ୪, ୨୦୨୫ ପର୍ଯ୍ୟନ୍ତ ମୁମ୍ବାଇରେ ହେବାକୁ ଥିବା ଆଗାମୀ ବିଶ୍ୱ ଅଡିଓ ଭିଜୁଆଲ୍ ଏବଂ ମନୋରଞ୍ଜନ ସମ୍ମିଳନୀ (ୱେଭ୍)ର ଅଗ୍ରଗତି ଉପରେ ମୁଖ୍ୟତଃ ବୈଠକରେ ଆଲୋଚନା କରାଯାଇଥିଲା । ଟେକ୍ନିସିଆନ୍, ନିର୍ମାତା, ନିର୍ଦ୍ଦେଶକ ଏବଂ ଅଭିନେତାଙ୍କ ସମେତ ଦକ୍ଷିଣ ଭାରତୀୟ ଚଳଚ୍ଚିତ୍ର ଶିଳ୍ପର ସର୍ବାଧିକ ଅଂଶଗ୍ରହଣର ଆବଶ୍ୟକତା ଉପରେ ବୈଠକ ଗୁରୁତ୍ୱାରୋପ କରିଥିଲା । ଏହା ଅଗ୍ରଣୀ ପ୍ରଯୋଜନା ସଂସ୍ଥାଗୁଡ଼ିକର ଅଂଶଗ୍ରହଣ ଏବଂ ୱେଭ୍ ପ୍ରଦର୍ଶନୀ ସ୍ଥାନରେ ଏକ ଉତ୍ସର୍ଗୀକୃତ ପ୍ୟାଭିଲିୟନ କିମ୍ବା ବୁଥ ପ୍ରତିଷ୍ଠା ବିଷୟରେ ମଧ୍ୟ ଆଲୋଚନା ହୋଇଥିଲା । ବୈଠକ ଶେଷରେ ଡଃ.ଏଲ. ମୁରୁଗନ ଗୁରୁତ୍ୱାରୋପ କରି କହିଥିଲେ ଯେ, ୱେଭ୍ସର ଲକ୍ଷ୍ୟ ହେଉଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ସହିତ ତାଳ ଦେଇ ସମସ୍ତ ଗଣମାଧ୍ୟମ କ୍ଷେତ୍ରକୁ ଗୋଟିଏ ମଞ୍ଚ ତଳେ ଏକତ୍ର କରିବା । ସୃଜନଶୀଳ ଉଦ୍ୟୋଗ କ୍ଷେତ୍ରରେ ଭାରତକୁ ଏକ ବିଶ୍ୱସ୍ତରୀୟ ନେତୃତ୍ୱ ପ୍ରଦାନ କରିବା ଦିଗରେ ଏହି ପଦକ୍ଷେପ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ସେ କହିଥିଲେ । ଭାରତ ସରକାରଙ୍କ ଦ୍ୱାରା ଆୟୋଜିତ ହେଉଥିବା ଐତିହାସିକ ୱେଭ୍ସ ସମ୍ମିଳନୀର ପ୍ରଥମ ସଂସ୍କରଣରେ ବିଶ୍ୱ ଗଣମାଧ୍ୟମ ଓ ମନୋରଞ୍ଜନ ଜଗତର ପ୍ରମୁଖ ବ୍ୟକ୍ତିବିଶେଷ, ପେସାଦାର, କଳାକାର, ନୀତି ନିର୍ଦ୍ଧାରକ ଓ ଶିଳ୍ପ ଅଂଶୀଦାରମାନେ ଏକାଠି ହେବେ । ଏହା ନୂଆ ପ୍ରତିଭା ଏବଂ ଗଣମାଧ୍ୟମ ଉଦ୍ୟୋଗକୁ ଏକାଠି କରିବା ସହିତ ଆପୋସ ବିକାଶକୁ ପ୍ରୋତ୍ସାହନ ଦେବ ।

Leave A Reply

Your email address will not be published.