ବାରିପଦା : ଶିମିଳିପାଳର କୋର ଅଞ୍ଚଳରେ ଶିକାରୀ ସହ ବନ ବିଭାଗର ସୁରକ୍ଷା କର୍ମୀ ମୁହାଁମୁହିଁ ହୋଇଥିବା ଜଣାପଡିଛି । ବନ ବିଭାଗର କର୍ମଚାରୀଙ୍କ ଉପରକୁ ଶିକାରୀ ଗୁଳି ଚଳାଇଥିବା ବେଳେ ଅଳ୍ପକେ ଜଣେ ବନ ସୁରକ୍ଷା ସହାୟକ ବର୍ତ୍ତି ଯାଇଥିବା ସୂଚନା ମିଳିଛି । ସୂଚନା ମୁତାବକ ବୁଧବାର ପୂର୍ବାହ୍ନରେ ପୋଡାଡିହା ରେଞ୍ଜ ଅନ୍ତର୍ଗତ ଅନନ୍ତପୁରର ଖଣ୍ଡା ଚିରା ନିକଟରେ ଶିକାରୀ ପଶିଥିବା ଖବରପାଇ ବନ ବିଭାଗ ସର୍ଚ୍ଚ ଅପରେସନରେ ଯାଇଥିଲା । ବନ ବିଭାଗର କର୍ମଚାରୀଙ୍କୁ ଦେଖି ଶିକାରୀ ଜଣକ ଦେଶୀ ଠୁସା ବନ୍ଧୁକ ସାହାଯ୍ୟରେ ଜଣେ ବନ ସୁରକ୍ଷା ସହାୟକଙ୍କୁ ଲକ୍ଷ୍ୟ କରି ଗୁଳି ଚଲାଇଥିଲେ । ତେବେ ବନ ସୁରକ୍ଷା ସହାୟକ ଜଣକ ଉପସ୍ଥିତ ବୁଦ୍ଧି ଯୋଗୁଁ ତଳେ ପେଟେଇ ପଡିବାରୁ ଗୁଳି ବିଦ୍ଧରୁ ମୁକ୍ତି ପାଇ ଯାଇଥିଲେ । ଏହାପରେ ସର୍ଚ୍ଚ ଅପରେସନରେ ଥିବା ବନ କର୍ମଚାରୀମାନେ ଶିକାରୀକୁ ଘେରିଯାଇ ମାଡ଼ି ବସି କାବୁ କରିଥିଲେ । ପରେ ଶିକାରୀକୁ ଆଣି ଡୁକୁରା ରେଞ୍ଜରେ ରଖି ପଚରାଉଚରା ଜାରି ରହିଥିବା ବିଶେଷ ସୂତ୍ରରୁ ସୂଚନା ମିଳିଥିବା ବେଳେ ଶିମିଳିପାଳ ବ୍ୟାଘ୍ର ପ୍ରକଳ୍ପ ପକ୍ଷରୁ ଏ ନେଇ କୌଣସି ସୂଚନା ଦିଆଯାଇ ନାହିଁ ।