କଣ୍ଟାବାଞ୍ଜି, (ଗୁରୁଦୟାଲ ହଂସ) : ଗାଧୋଇ ସାରି ଘରକୁ ଫେରୁ ଥିବାବେଳେ ଜଣେ ଯୁବକଙ୍କ ମୃତ୍ୟୁ ହୋଇଛି । ମୃତ ଯୁବକ ଜଣକ ହେଲେ କଣ୍ଟାବାଞ୍ଜି ଥାନା କୁକୁଡାହାଡ ଗାଁର ଗୋବିନ୍ଦ କୁଅଁର (୨୬) । ସୂଚନାଯୋଗ୍ୟ ଯେ, କୁକୁଡାହାଡ ଗାଁରେ ରହୁଥିବା ଗୋବିନ୍ଦ କୁଅଁର ଗତ କିଛି ମାସ ଆଗରୁ ପେଟ ବ୍ୟଥା ଯୋଗୁଁ ଅପ୍ରେସନ୍ ହୋଇଥିଲେ । ପରେ ସୁସ୍ଥ ହେଲା ପରେ ଗାଁକୁ ଫେରି ଘରେ ରହୁଥିଲେ । ଆଜି ଗୁରୁବାର ସକାଳୁ ନିଜ ଚାଷ ଜମିରେ କାମ ଓ ଗାଧୋଇ ସାରି ଚାଲି ଚାଲି ସେ ଘରକୁ ଫେରିବା ସମୟରେ ତଳେ ପଡି ଯାଇଥିଲେ । ସ୍ଥାନୀୟ ଲୋକ ଉଦ୍ଧାର କରି କଣ୍ଟାବାଞ୍ଜି ଡାକ୍ତର ଖାନାକୁ ନେଲା ପରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । କଣ୍ଟାବାଞ୍ଜି ପୁଲିସ ଏନେଇ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ କରୁଥିବା ବେଳେ ଶବ ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର କାରଣ ଜଣାପଡିବ ବୋଲି କହିଥିଲେ । ତେବେ ଗୋବିନ୍ଦଙ୍କ ଏଭଳି ଅକାଳ ବିୟୋଗ ହୋଇଥିବାରୁ କୁକୁଡାହାଡ ଗାଁରେ ଶୋକର ଛାୟା ଖେଳିଯାଇଛି ।