ବଲାଙ୍ଗିର, (କେପିଏନ୍ଏସ୍) : ଆଜି ବଲାଙ୍ଗିର-ଟିଟିଲାଗଡ ରାସ୍ତାର ସିନଖମନ ଛକଠାରେ ବାଇକ୍କୁ ହାଇୱା ଧକ୍କା ଦେବା ଫଳରେ ଦମ୍ପତ୍ତି ମୃତ ହୋଇଥିବା ଜଣାପଡିଛି । ସୂଚନା ଅନୁସାରେ, ବାଇକ୍ରେ ବଲାଙ୍ଗିରରୁ କଳାହାଣ୍ଡି ଯାଉଥିବା ସମୟରେ ହାଇୱା ଧକ୍କା ଦେଇଥିଲା । ଘଟଣାସ୍ଥଳରେ ସ୍ତ୍ରୀ ପ୍ରତିମା ସାହୁଙ୍କ ମୃତ୍ୟୁ ହୋଇଥିବା ବେଳେ, ଭୀମଭୋଇ ମେଡିକାଲ କଲେଜ ଓ ହସ୍ପିଟାଲରେ ସ୍ୱାମୀ ପ୍ରେମାନନ୍ଦ ସାହୁଙ୍କ ମୃତ୍ୟୁ ଘଟିଛି । ଦଶହରାରେ ଭାଇ ଜିଉଁନ୍ତିଆ ଓଷା କରିବା ପାଇଁ ବଲାଙ୍ଗିର ରାମେଶ୍ୱର ନଗରପଡାରେ ରହୁଥିବା ନିଜ ଭାଇ ଘରକୁ ଆସିଥିଲେ । ମଙ୍ଗଳବାର ସ୍ତ୍ରୀଙ୍କୁ ଧରି ନିଜ ଗାଁ କଳାହାଣ୍ଡି ଜିଲ୍ଲା ଜରାଡୁଗୁରାକୁ ଯାଉଥିଲେ ପ୍ରେମାନନ୍ଦ । ଅଧା ବାଟରେ ଜଗି ବସିଥିଲା ମୃତ୍ୟୁ । ସିନଖମନଛକ ଠାରେ ଦୃତ ଗତିରେ ଆସୁଥିବା ହାଇୱା ଧକ୍କାରେ ସ୍ୱାମୀ-ସ୍ତ୍ରୀଙ୍କ ଜୀବନ ଚାଲିଯାଇଛି । ଦୁର୍ଘଟଣା ଘଟାଇଥିବା ଡ୍ରାଇଭର ଥାନାରେ ଆତ୍ମସମର୍ପଣ କରିଛି । ପୋଲିସ ମାମଲା ରୁଜୁ କରି ତଦନ୍ତ ଚଳାଇଛି ।