ମୁରିବାହାଲ, (ଦୁର୍ଗାନନ୍ଦ ମହାକୁର) : ବଲାଙ୍ଗିର ଜିଲ୍ଲା ମୁରିବାହାଲ ଥାନା ଲଖନା ପଞ୍ଚାୟତ ବିଜଘାଟ ଗ୍ରାମର ମାନସିଂ ସାହୁଙ୍କ ପୁଅ ଅଜୟ ସାହୁ (୩୧) ନାମକ ଜଣେ କୁଖ୍ୟାତ ମୋବାଇଲ ଚୋରକୁ ପୁଲିସ୍ ଗିରଫ କରି ସୋମବାର କୋର୍ଟ ଚାଲାଣ କରିଥିବା ଜଣାପଡିଛି । ପୁଲିସ୍ ସୂତ୍ରରୁ ପ୍ରକାଶ ଯେ, ଦେବଙ୍ଗ ଗ୍ରାମର ଭୂତେଶ୍ୱର ରଣାଙ୍କ ପୁଅ ଲିଲୁ ରଣା (୨୪) ପତ୍ରାପାଲି (କ) ଗ୍ରାମର ମନୋଜ ପୁଟେଲଙ୍କ ଔଷଧ ଦୋକାନରେ କାମ କରନ୍ତି । ସେ ରବିବାର ଦିନ ୩.୪୫ସମୟରେ ନିଜର ଏକ ମୋବାଇଲକୁ ଦୋକାନରେ ଚାର୍ଜରେ ବସାଇଥିଲେ । ଏହି ସମୟରେ ଅଭିଯୁକ୍ତ ଅଜୟ ଔଷଧ କିଣିବା ବାହାନାରେ ଆସି ଦୋକାନରୁ ମୋବାଇଲକୁ ଚୋରୀ କରି ନେଇଯାଇଥିଲା । ବହୁ ଖୋଜାଖୋଜି କରିବା ପରେ ମଧ୍ୟ ଲିଲୁ ମୋବାଇଲ ନ ପାଇବାରୁ ସିସିଟିଭି ସାହାଯ୍ୟରେ ଅଭିଯୁକ୍ତ ଅଜୟ ମୋବାଇଲ ଚୋରୀ କରୁଥିବା ଜାଣିପାରିଥିଲେ । ସେ ଏ ସମ୍ପର୍କରେ ଥାନାରେ ଲିଖିତ ଏତଲା ଦେଇଥିଲେ । ପୋଲିସ କେସ ନଂ. ୩୬୪/୨୪ ରୁଜ୍ଜୁ କରି ଏଏସଆଇ ରବୀନ୍ଦ୍ର କୁମ୍ଭାର ମାମଲାର ତଦନ୍ତ କରି ଅଭିଯୁକ୍ତ ଅଜୟଙ୍କୁ ଗିରଫ କରିଥିଲେ । ଅଜୟ ପୂର୍ବରୁ ମଧ୍ୟ ବହୁ ମୋବାଇଲ ଚୋରୀ କରିଥିବା ପୋଲିସ ସୂତ୍ରରୁ ଜଣାପଡିଛି । ଅଧିକ ତଦନ୍ତ ପରେ କୁଖ୍ୟାତ ମୋବାଇଲ ଚୋର ଅଜୟ ସାହୁଙ୍କୁ କୋର୍ଟ ଚାଲାଣ କରାଯାଇଥିବା ବେଳେ ଜାମିନ ଆବେଦନ ଖାରଜ ହେବାରୁ ତାଙ୍କୁ ଜେଲ ହାଜତକୁ ପଠାଇ ଦିଆଯାଇଛି ବୋଲି ଥାନା ଆଇଆଇସି ସିପୋରା ସରାୟ ଲୁଗୁନ ପ୍ରକାଶ କରିଛନ୍ତି ।