ଲୋଇସିଂହା, (କେପିଏନ୍ଏସ୍) : ଲୋଇସିଂହା ଜଡ଼ାମୁଣ୍ଡା ବାସିନ୍ଦା ଜୀବନଜ୍ୟୋତି ବାଗ ଓ ମାତା ବି. ନିବେଦିତାଙ୍କ ଝିଅ ବି. ଇଫ୍ରାତ ଜୋଏଲ୍ ମିସ୍ ଲିଟିଲ୍ ଇଣ୍ଡିଆ ଭାବେ ସମ୍ମାନିତ ହୋଇଛନ୍ତି । ଏହି ଖବର ପ୍ରଚାରିତ ହେବାପରେ ଅଞ୍ଚଳରେ ଖୁସିର ଲହରି ଖେଳିଯାଇଛି ।ଆଜି ସେ ନିଜ ଘରକୁ ଫେରିଥିବା ଜଣାଯାଇଛି । ସୂଚନା ଗତ ଯେ, ଗତ ନଭେମ୍ବର ୧୦ରେ ଭୁବନେଶ୍ୱର ଠାରେ “ଗ୍ଲୋବାଲ ମୋଡେଲ ଇଣ୍ଡିଆ” ତରଫରୁ ଅଡିସନ କରାଯାଇଥିଲା । ସେଥିରେ ଇଫ୍ରାତ୍ ପ୍ରଥମ ସ୍ଥାନ ଅଧିକାର କରି ମହାରାଷ୍ଟ୍ରର ପୁନେସ୍ଥିତ ଏଲୋରା ସିଟି ମଲରେ ଜାତୀୟସ୍ତରୀୟ ପ୍ରତିଯୋଗିତାରେ ଓଡ଼ିଶାରୁ ପ୍ରତିନିଧିତ୍ଵ କରିବା ପାଇଁ ସୁଯୋଗ ପାଇଥିଲେ । ସର୍ବଭାରତୀୟ ସ୍ତରରେ ମୋଟ୍ ୨୯ ଜଣ ପ୍ରତିଯୋଗୀଙ୍କ ମଧ୍ୟରୁ ଇଫ୍ରାତ୍ ପ୍ରଥମ ସ୍ଥାନ ଅଧିକାର କରିଛନ୍ତି । ଆସନ୍ତା ଫେବୃଆରୀ ମାସରେ ନେପାଳର କାଠମାଣ୍ଡୁ ଠାରେ ହେବାକୁ ଥିବା ଆନ୍ତର୍ଜାତୀୟ ପ୍ରତିଯୋଗିତାରେ ଇଫ୍ରାତ୍ ଭାରତରୁ ପ୍ରତିନିଧିତ୍ୱ କରିବାର ସୁଯୋଗ ପାଇଥିବା ତାଙ୍କ ବାପା ଜୀବନଜ୍ୟୋତି ସୂଚନା ଦେଇଛନ୍ତି । ସୂଚନାଯୋଗ୍ୟ ଯେ ଇଫ୍ରାତ୍ ଝାରମୁଣ୍ଡା ସ୍ଥିତ ବେଥାନି କନଭେଣ୍ଟ ସ୍କୁଲର ଚତୁର୍ଥ ଶ୍ରେଣୀ ଛାତ୍ରୀ । ତାଙ୍କର ଏହି ସଫଳତା ଖବର ମିଳିବା ପରେ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି ।