
ବଲାଙ୍ଗିର, (ଦେବାଶିଷ ମିଶ୍ର) : ବଲାଙ୍ଗିରର ସର୍ବ ପୁରାତନ ପୃଥ୍ୱୀରାଜ ହାଇସ୍କୁଲର ୧୯୯୪ ବେଚ୍ର ବନ୍ଧୁ ମିଳନ ଆଜି ସ୍ଥାନୀୟ କଦଳୀ ମୁଣ୍ଡା ନର୍ସରୀରେ ଆୟୋଜିତ ହୋଇଯାଇଛି । ତେବେ ଏହି ଅବସରରେ ପ୍ରଥମ କରି ତିରିଶ ବର୍ଷ ପରେ ଏଠିକାର ପୂର୍ବତନ ଶିକ୍ଷକ ଓ ଛାତ୍ରମାନଙ୍କର ମିଳନ ହୋଇଥିଲା । ଯେଉଁଥିରେ ପୃଥ୍ୱୀରାଜ ହାଇସ୍କୁଲର ପୂର୍ବତନ ୧୩ଜଣ ଶିକ୍ଷକଙ୍କୁ ବିଶେଷ ଭାବରେ ଆମନ୍ତ୍ରିତ କରା ଯାଇଥିଲା । ତେବେ ଏଥିରେ ଶିକ୍ଷକ ବାଳ ମୁକୁନ୍ଦ ତ୍ରିପାଠୀ, କପିଳ ପତି, ଜଗଦାନନ୍ଦ ଛୁରିଆ, ଜଗନ୍ନାଥ ବେଜ, ଶ୍ୟାମ ଉଦଗାତା, ପ୍ରେମାନନ୍ଦ ବିଶ୍ଵାଳ, ଘାସିରାମ ବିଶ୍ଵାଳ, ସୁରଜ ଖମାରୀ, ଭାବଗ୍ରାହୀ ରଥ, ଆଦିକାନ୍ତ ଷଡ଼ଙ୍ଗୀ, ପ୍ରଶାନ୍ତ ଯୋଶୀ, ଅର୍ଜୁନ ସାହୁ ଓ ତୀର୍ଥ ରାଜ ପଟେଲ ପ୍ରମୁଖ ଏଥିରେ ଅତିଥି ଭାବରେ ସାମିଲ ହୋଇଥିଲେ । ଏବଂ ସମସ୍ତଙ୍କୁ ୧୯୯୪ ବେଚ୍ ଛାତ୍ରମାନେ ପାଛୋଟି ନେବା ସହ ସମସ୍ତଙ୍କୁ ଉପଢୌକନ ଓ ଉତ୍ତରୀୟ ଦେଇ ସମ୍ମାନିତ କରିଥିଲେ । ସେହିପରି ଉପସ୍ଥିତ ସବୁ ପୂର୍ବତନ ଶିକ୍ଷକମାନେ ତାଙ୍କ ପୁରୁଣା ଶିଷ୍ୟଙ୍କୁ ନିଜ ଗହଣରେ ପାଇ ଭାବ ବିହ୍ୱଳ ହୋଇଥିଲେ । ଏହି ଆୟୋଜନକୁ ସେ ସମୟର ପୃଥ୍ୱୀରାଜ ହାଇସ୍କୁଲର ସ୍ୱର୍ଣିମ ସ୍ମୃତି ଉଦ୍ଜୀବିତ ହୋଇଥିବାର କହିଥିଲେ । ସମସ୍ତଙ୍କୁ ସେମାନଙ୍କ ଜୀବନରେ ସଫଳ ଓ ଉନ୍ନତି ପାଇଁ ଆଶୀର୍ବାଦ କରିଥିଲେ । ସେପଟେ ୧୯୯୪ ବେଚ୍ର ସେ ସମୟର ସବୁ ଛାତ୍ର ଏଠି ସମ୍ମିଳିତ ହୋଇଥିଲେ । ନିଜ ବାଲ୍ୟକାଳର ଗୁରୁଙ୍କୁ ପାଖରେ ପାଇ ତାଙ୍କ ସହ ସେ ସ୍ମୁତି ବାଣ୍ଟି ଖୁବ ଉତ୍ସାହିତ ହୋଇଥିଲେ । ସେହିପରି ଆମ ସ୍କୁଲ ଆମର ଗର୍ବ ବୋଲି ସମସ୍ତେ ନାରା ଦେଇଥିଲେ । ତେବେ ସୂଚନା ଅନୁସାରେ ତିରିଶ ବର୍ଷ ବିତି ଥିଲେ ସୁଦ୍ଧା ସମସ୍ତ ବାଲ୍ୟ ସ୍କୁଲ ବନ୍ଧୁ ଏକାଠି ହେବା ଓ ତାଙ୍କ ସହ ତାଙ୍କ ଶିକ୍ଷକମାନଙ୍କୁ ମଧ୍ୟ ସାଙ୍ଗରେ ପାଇବା ସମସ୍ତଙ୍କୁ ଏକ ନିଆରା ଖୁସି ଆଣି ଦେଇଥିଲା ।