ରାଉରକେଲା, (ସସ୍ମିତା ପ୍ରଧାନ) : ଗତ ତିନି ତାରିଖ ଦିନ ଫାଇଭ-ଟି ଅଧ୍ୟକ୍ଷ ଭି. କେ. ପାଣ୍ଡିଆନଙ୍କ ସୁନ୍ଦରଗଡ଼ ଜିଲ୍ଲା ଗସ୍ତ ସମୟରେ ରାଉରକେଲା ବିକାଶ ମଞ୍ଚର ଆବାହକ ଡଃ ସୁମନ ଦତ୍ତଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଜିଲ୍ଲା କଲେକ୍ଟରିଏଟଠାରେ ଭେଟି ରାଉରକେଲାର ଉନ୍ନତି ପାଇଁ ବିସ୍ତୃତ ଆଲୋଚନା କରିଥିଲେ । ଆଲୋଚନା ବେଳେ ରାଉରକେଲା ବିମାନ ବନ୍ଦରରେ ବିଗତ କିଛି ଦିନ ଧରି ବିମାନ ଚଳାଚଳରେ ଦେଖାଦେଉଥିବା ଅନିମିୟତାରେ ସୁଧାର ଆଣିବା, ୪ସି ଲାଇସେନ୍ସ ପ୍ରଦାନ ସହ, ଆଇଏଲ୍ଏସ୍ ସ୍ଥାପନ, ଦେଶର ଅନ୍ୟ ସ୍ଥାନକୁ ନିୟମିତ ବିମାନ ଉଡାଣ ଆରମ୍ଭ କରିବାକୁ ଦାବି ଉପସ୍ଥାପନ କରିଥିଲେ । ଯଦି ବେସାମାରିକ ବିମାନ ଚଳାଚଳ ବିଭାଗ ଆଇଏଲ୍ଏସ୍ ସ୍ଥାପନ ନ କରେ ତେବେ ଯାତ୍ରୀମାନଙ୍କର ସୁବିଧାକୁ ଲକ୍ଷ୍ୟ ରଖି ଅମୃତ ଯୋଜନା କିମ୍ବା ସ୍ମାର୍ଟ ସିଟି ଫଣ୍ଡ କିମ୍ବା ଡ଼ିଏମ୍ଏଫ୍ ଫଣ୍ଡକୁ ଉପଯୋଗ କରି ଆଇଏଲ୍ଏସ୍ ସ୍ଥାପନ କରାଯିବା ପାଇଁ ପ୍ରସ୍ତାବ ଦେଇଥିଲେ । ବନ୍ଧମୁଣ୍ଡାଠାରେ ଇଷ୍ଟକୋଷ୍ଟ ରେଳବାଇ ଅଧୀନରେ ଏକ ନୂଆ ରେଳ ଡିଭିଜନ ପ୍ରତିଷ୍ଠା କରିବା, ସରକାରୀ ମହାବିଦ୍ୟାଳୟକୁ ଏକକ ବିଶ୍ୱବିଦ୍ୟାଳୟରେ ପରିବର୍ତ୍ତନ କରାଇବା, ରାଉରକେଲା ଓ ବଣାଇ ସବଡିଭିଜନକୁ ମିଶାଇ ଏକ ନୂତନ ଜିଲ୍ଲା ପ୍ରତିଷ୍ଠା କରିବା, ହମିରପୁର, ଲୁଆକେରା ଓ ପାର୍ଶ୍ୱବର୍ତ୍ତି ବସ୍ତି ଅଂଚଳକୁ ମହାନଗରରେ ସାମିଲ କରାଇ ସାମଗ୍ରିକ ଉନ୍ନତି କରିବା ପାଇଁ ଦାବି ମାନ ଉପସ୍ଥାପନ କରିଥିଲେ । ଏହି ସବୁ ଦାବି ବିଷୟରେ ସେ ଅବଗତ ଅଛନ୍ତି ଓ ଯଥାଶୀଘ୍ର ଏହାର ସମାଧାନ ହେବ ବୋଲି ଶ୍ରୀ ପାଣ୍ଡିଆନ ସୂଚାଇ ଥିଲେ । ଏହି ଆଲୋଚନା ସମୟରେ ସୁନ୍ଦରଗଡ଼ ଜିଲ୍ଲାପାଳ ଡଃ ପରାଗ ହର୍ଷଦ ଗାଭାଲି, ଅତିରିକ୍ତ ଜିଲ୍ଲାପାଳ ରବିନାରାୟଣ ସାହୁ ସମେତ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ । ଆଲୋଚନା ସମୟରେ ପୂର୍ବତନ ବିଧାୟକ ରବି ଦେହୁରୀ, ବିକାଶ ମଞ୍ଚର ଉପଦେଷ୍ଟା ଅଭୟ ଦାସ, ଅଶ୍ୱିନୀ ସ୍ୱାଇଁ, ଅମୂଲ୍ୟ ବରାଳ, ସୁପ୍ରତିକ ମିଶ୍ର, ନିରଞ୍ଜନ ଦାସ, କୁଞ୍ଜ ବିହାରୀ ରାଉତ, ରାଜୀବ ପାଣି, ଅଶୋକ ପଟ୍ଟନାୟକ, ଭଜହରି ରାଉତ ଓ ଅନ୍ୟମାନେ ଉପସ୍ଥିତ ଥିଲେ ।