ଭୁବନେଶ୍ୱର : ରୋଷେୟାକୁ କଟୁରିରେ ହାଣି ହତ୍ୟା ଉଦ୍ୟମ କରିବା ଅଭିଯୋଗରେ ଭରତପୁର ଥାନା ପୁଲିସ ହୋଟେଲ୍ ମାଲିକଙ୍କୁ ଗିରଫ କରିଛି । ତାଙ୍କ ନାମ ସୁଶାନ୍ତ ପାତାଳସିଂହ (୪୨) ଘର ପୁରୀ ଜିଲ୍ଲା ଡେଲାଙ୍ଗ । ସେ କଳିଙ୍ଗନଗର କେ -୪ରେ ରହୁଥିଲେ । ସୂଚନା ଅନୁଯାୟୀ, ସୁଶାନ୍ତ ଘାଟିକିଆ ଆଇଜିକେସି ହସ୍ପିଟାଲ୍ ନିକଟରେ ଏକ ହୋଟେଲ୍ ଖୋଲିଛି । ତାଙ୍କ ହୋଟେଲରେ ଏସ୍.କେ ସୁଜିତ ରୋଷେୟା ଭାବେ କାମ କରନ୍ତି । ସବୁବେଳେ ସୁଶାନ୍ତ ନିଶାଖାଇ ନିଜ ପତ୍ନୀଙ୍କୁ ମାର୍ଧର କରନ୍ତି । ଗତକାଲି ରାତିରେ ସୁଶାନ୍ତ ପତ୍ନୀଙ୍କୁ ଏକ କଟୁରିରେ ହାଣିବା ସମୟରେ ସୁଜିତ ପ୍ରତିବାଦ କରିଥିଲେ । ଏଥିରେ ଉତ୍କ୍ଷିପ୍ତ ହୋଇ ସୁଶାନ୍ତ ସୁଜିତଙ୍କ ମୁଣ୍ଡକୁ କଟୁରି ଚୋଟ ପକାଇଥିଲେ । ଫଳରେ ରକ୍ତ ଜୁଡୁବୁଡୁ ହୋଇ ସୁଜିତ ତଳେ ପଡ଼ିଯାଇଥିଲେ । ତାଙ୍କୁ ଗୁରୁତର ଅବସ୍ଥାରେ ଅନ୍ୟମାନେ ଉଦ୍ଧାର କରି ହସ୍ପିଟାଲ୍ ନେଇଥିଲେ । ଏନେଇ ଥାନାରେ ଅଭିଯୋଗ ହେବାପରେ ପୁଲିସ ଏକ ହତ୍ୟା ଉଦ୍ୟମ ମାମଲା ରୁଜୁକରି ତଦନ୍ତ ଚଳାଇଥିଲା । ସକାଳେ ପୁଲିସ ସୁଶାନ୍ତଙ୍କୁ ଗିରଫ କରିବା ସହ ତାଙ୍କଠାରୁ କଟୁରି ଜବତ କରିଥିଲା । ପରେ ସୁଶାନ୍ତଙ୍କୁ କୋର୍ଟ ଚାଲାଣ କରାଯାଇଥିଲା ।