ଆନ୍ଧ୍ରପ୍ରଦେଶର କର୍ଣ୍ଣୁଲରେ 13,430 କୋଟି ଟଙ୍କାର ବିକାଶମୂଳକପ୍ରକଳ୍ପର ଶିଳାନ୍ୟାସ, ଉଦଘାଟନ ଏବଂ ଲୋକାର୍ପଣ କଲେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ

• ସୋମନାଥଙ୍କ ଭୂମି ଗୁଜରାଟରେ ଜନ୍ମ ନେଇ, ବାବା ବିଶ୍ୱନାଥଙ୍କ ଭୂମି କାଶୀରେ ସେବା କରି ଏବଂ ଆଜି ଶ୍ରୀଶୈଳମଙ୍କ ଆଶୀର୍ବାଦ ପାଇ ମୁଁନିଜକୁ ଧନ୍ୟ ମନେ କରୁଛି: ପ୍ରଧାନମନ୍ତ୍ରୀ
• ଶ୍ରୀ ଶିବାଜୀ ସ୍ପୂର୍ତ୍ତି କେନ୍ଦ୍ରରେ ଶ୍ରଦ୍ଧାଞ୍ଜଳି ଅର୍ପଣ କରିବାର ସୁଯୋଗ ମୋତେ ମିଳିଛି ଏବଂ ମୁଁ ଛତ୍ରପତି ଶିବାଜୀ ମହାରାଜଙ୍କୁ ପ୍ରଣାମ କରୁଛି: ପ୍ରଧାନମନ୍ତ୍ରୀ
• ଆନ୍ଧ୍ର ପ୍ରଦେଶ ‘ସ୍ୱାଭିମାନ’ଏବଂ ‘ସଂସ୍କୃତି’ର ଭୂମି, ଏହା ବିଜ୍ଞାନ ଏବଂ ନବସୃଜନର ଏକ କେନ୍ଦ୍ରମଧ୍ୟ: ପ୍ରଧାନମନ୍ତ୍ରୀ
• ଆଜି, ସ୍ୱଚ୍ଛ ଶକ୍ତି ଠାରୁ ଆରମ୍ଭ କରି ସାମଗ୍ରିକ ଶକ୍ତି ଉତ୍ପାଦନ ପର୍ଯ୍ୟନ୍ତ, ଭାରତ ପ୍ରତ୍ୟେକ କ୍ଷେତ୍ରରେ ନୂତନ ରେକର୍ଡ ସ୍ଥାପନ କରୁଛି: ପ୍ରଧାନମନ୍ତ୍ରୀ
• ସାରା ଦେଶରେ ବହୁମୁଖୀ ଭିତ୍ତିଭୂମି ଦ୍ରୁତ ଗତିରେ ବିକାଶ ହେଉଛି ଏବଂ ଆମେ ଗ୍ରାମରୁ ସହର ଏବଂ ସହରରୁ ବନ୍ଦର ପର୍ଯ୍ୟନ୍ତ ସଂଯୋଗୀକରଣ ଉପରେ ଦୃଢ଼ ଧ୍ୟାନ ଦେଉଛୁ: ପ୍ରଧାନମନ୍ତ୍ରୀ
• ଆଜି ଭାରତ ଏବଂ ଆନ୍ଧ୍ରପ୍ରଦେଶ ଉଭୟରଦ୍ରୁତ ଏବଂ ବ୍ୟାପକ ବିକାଶବିଶ୍ୱ ଦେଖିପାରୁଛି; ଗୁଗୁଲ୍ ଆନ୍ଧ୍ରପ୍ରଦେଶରେ ଭାରତର ପ୍ରଥମ କୃତ୍ରିମ ବୁଦ୍ଧିମତ୍ତା ହବ୍ ପ୍ରତିଷ୍ଠା କରିବାକୁ ପ୍ରସ୍ତୁତ: ପ୍ରଧାନମନ୍ତ୍ରୀ
• ଆଜି, ବିଶ୍ୱ ଭାରତକୁ ଏକବିଂଶ ଶତାବ୍ଦୀର ନୂତନ ଉତ୍ପାଦନ କେନ୍ଦ୍ର ଭାବରେ ଦେଖୁଛି: ପ୍ରଧାନମନ୍ତ୍ରୀ
• ଆମ ସରକାରଙ୍କ ସଂକଳ୍ପ ହେଉଛି ନାଗରିକ-କୈନ୍ଦ୍ରିକ ବିକାଶ, ନିରନ୍ତର ସଂସ୍କାର ମାଧ୍ୟମରେ ଆମେ ଲୋକଙ୍କ ଜୀବନକୁ ସହଜ କରୁଛୁ: ପ୍ରଧାନମନ୍ତ୍ରୀ

ନୂଆଦିଲ୍ଲୀ, (ପିଆଇବି) : ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ଆନ୍ଧ୍ରପ୍ରଦେଶର କର୍ଣ୍ଣୁଲଠାରେ ପ୍ରାୟ 13,430 କୋଟି ଟଙ୍କାର ଏକାଧିକ ଉନ୍ନୟନମୂଳକ ପ୍ରକଳ୍ପର ଶିଳାନ୍ୟାସ, ଉଦଘାଟନ ଏବଂ ଲୋକାର୍ପଣ କରିଛନ୍ତି। ଏହି ଅବସରରେ ଉପସ୍ଥିତ ଜନତାଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ଅହୋବିଲମର ଭଗବାନ ନରସିଂହ ସ୍ୱାମୀ ଏବଂ ମହାନନ୍ଦିର ଶ୍ରୀ ମହାନନ୍ଦିଶ୍ୱର ସ୍ୱାମୀଙ୍କୁ ପ୍ରଣାମ କରିଥିଲେ। ସେ ସମସ୍ତଙ୍କ ମଙ୍ଗଳ ପାଇଁ ମନ୍ତ୍ରାଳୟମର ଗୁରୁ ଶ୍ରୀ ରାଘବେନ୍ଦ୍ର ସ୍ୱାମୀଙ୍କଠାରୁ ଆଶୀର୍ବାଦ ମଧ୍ୟ ଲୋଡ଼ିଥିଲେ।
ଦ୍ୱାଦଶ ଜ୍ୟୋତିର୍ଲିଙ୍ଗ ସ୍ତୋତ୍ର –‘‘ସୌରାଷ୍ଟ୍ରେ ସୋମନାଥମ୍ ଚ ଶ୍ରୀଶୈଳେ ମଲ୍ଲିକାର୍ଜୁନମ୍’’ର ଏକ ଶ୍ଳୋକ ପାଠ କରି ଶ୍ରୀ ମୋଦୀ ଆଲୋକପାତ କରିଥିଲେ, ଦ୍ୱାଦଶ ଜ୍ୟୋତିର୍ଲିଙ୍ଗ ମଧ୍ୟରେ ଭଗବାନ ସୋମନାଥ ଏବଂ ଭଗବାନ ମଲ୍ଲିକାର୍ଜୁନଙ୍କ ନାମକୁ ଆରମ୍ଭରେ ଏକତ୍ର ଦେଖାଯାଏ। ସେ କହିଥିଲେ, ଗୁଜରାଟର ପବିତ୍ର ସୋମନାଥ ଭୂମିରେ ଜନ୍ମଗ୍ରହଣ କରିବା, କାଶୀରେ ବାବା ବିଶ୍ୱନାଥଙ୍କ ଭୂମିର ସେବା କରିବାର ସୁଯୋଗ ପାଇବା ଏବଂ ଏବେ ଶ୍ରୀଶୈଳମରେ ଆଶୀର୍ବାଦ ପାଇବା ମୋର ସୌଭାଗ୍ୟ। ଶ୍ରୀଶୈଳମ ଗସ୍ତ ପରେ, ପ୍ରଧାନମନ୍ତ୍ରୀ ଶିବାଜୀ ସ୍ପୂର୍ତ୍ତି କେନ୍ଦ୍ରରେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ଏବଂ ମଞ୍ଚରୁ ଛତ୍ରପତି ମହାରାଜଙ୍କୁ ସମ୍ମାନ ଜଣାଇଥିଲେ। ସେ ଅଲ୍ଲମା ପ୍ରଭୁ ଏବଂ ଅକ୍କାମହାଦେବୀଙ୍କ ଭଳି ପୂଜ୍ୟ ଶୈବ ସନ୍ଥମାନଙ୍କୁ ପ୍ରଣାମ କରିଥିଲେ। ସେ ଶ୍ରୀ ଉୟଲାୱାଡା ନରସିଂହ ରେଡ୍ଡୀ ଗାରୁ ଏବଂ ଶ୍ରୀ ହରି ସର୍ବୋତ୍ତମ ରାଓଙ୍କ ସମେତ ମହାନ ସ୍ୱାଧୀନତା ସଂଗ୍ରାମୀଙ୍କୁ ମଧ୍ୟ ଶ୍ରଦ୍ଧାଞ୍ଜଳି ଦେଇଥିଲେ।
‘‘ଆନ୍ଧ୍ର ପ୍ରଦେଶ ଗୌରବମୟ ଏବଂ ସମୃଦ୍ଧ ସଂସ୍କୃତିର ଭୂମି।ଏହା ବିଜ୍ଞାନ ଏବଂ ନବସୃଜନର ଏକ କେନ୍ଦ୍ର’’, ପ୍ରଧାନମନ୍ତ୍ରୀ ଦୃଢ଼ ଭାବରେ କହିଥିଲେ।ରାଜ୍ୟର ଅସୀମ ସମ୍ଭାବନା ଏବଂ ଏହାର ଯୁବପିଢ଼ିଙ୍କ ଅସୀମ କ୍ଷମତା ଉପରେ ସେ ଗୁରୁତ୍ୱାରୋପ କରିଥିଲେ। ସେ କହିଥିଲେ ଯେ ଆନ୍ଧ୍ର ପ୍ରଦେଶକୁ ଯାହା ଆବଶ୍ୟକ ତାହା ହେଉଛି ସଠିକ୍ ଦୃଷ୍ଟିକୋଣ ଏବଂ ନେତୃତ୍ୱ। ଆଜି, ଚନ୍ଦ୍ରବାବୁ ନାଇଡୁ ଗାରୁ ଏବଂ ପବନ କଲ୍ୟାଣ ଗାରୁଙ୍କ ଭଳି ନେତାଙ୍କୁ ନେଇ ଆନ୍ଧ୍ର ପ୍ରଦେଶ କେନ୍ଦ୍ର ସରକାରଙ୍କ ପୂର୍ଣ୍ଣ ସମର୍ଥନ ସହିତ ଦୂରଦୃଷ୍ଟିସମ୍ପନ୍ନ ନେତୃତ୍ୱ ପାଇଛି ।
ଗତ ଷୋହଳ ମାସ ମଧ୍ୟରେ ଆନ୍ଧ୍ରପ୍ରଦେଶ ଦ୍ରୁତ ପ୍ରଗତି ହାସଲ କରିଛି ଏବଂ କେନ୍ଦ୍ର ଓ ରାଜ୍ୟରେ ସେମାନଙ୍କର ସରକାରଙ୍କ ଅଧୀନରେ ଅଭୂତପୂର୍ବ ବିକାଶ ଘଟିଛି ବୋଲି ଶ୍ରୀ ମୋଦୀ ଉଲ୍ଲେଖ କରିଛନ୍ତି ।ସେ କହିଛନ୍ତି, ଦିଲ୍ଲୀ ଏବଂ ଅମରାବତୀ ତ୍ୱରିତ ବିକାଶ ପାଇଁ ଏକାଠି କାମ କରୁଛନ୍ତି। 2047 ସୁଦ୍ଧା ଭାରତ ନିଶ୍ଚିତ ଭାବରେ ଏକ ବିକଶିତ ରାଷ୍ଟ୍ର ହେବ।ଏକବିଂଶ ଶତାବ୍ଦୀ ଭାରତର ଏବଂ ଏହାର 140 କୋଟି ନାଗରିକଙ୍କର ବୋଲି ସେ ଦୃଢ଼ ଭାବେ କହିଛନ୍ତି । ସେ ରାସ୍ତା, ବିଦ୍ୟୁତ୍, ରେଳପଥ, ରାଜପଥ ଏବଂ ବାଣିଜ୍ୟ ସହିତ ଜଡିତ ଅନେକ ପ୍ରକଳ୍ପର ଉଦଘାଟନ ଏବଂ ଭିତ୍ତିପ୍ରସ୍ତର ସ୍ଥାପନ ଘୋଷଣା କରିଛନ୍ତି। ଏହି ପଦକ୍ଷେପଗୁଡ଼ିକ ରାଜ୍ୟ ସାରା ଯୋଗାଯୋଗ ବ୍ୟବସ୍ଥାକୁ ସୁଦୃଢ଼ କରିବ, ଶିଳ୍ପ ଅଭିବୃଦ୍ଧିକୁ ବୃଦ୍ଧି କରିବ ଏବଂ ନାଗରିକମାନଙ୍କ ପାଇଁ ସହଜ ଜୀବନଯାପନକୁ ଉନ୍ନତ କରିବ। ଏହି ପ୍ରକଳ୍ପଗୁଡ଼ିକ କର୍ଣ୍ଣୁଲ୍ ଏବଂ ଆଖପାଖ ଅଞ୍ଚଳକୁ ବହୁ ଲାଭ ପ୍ରଦାନ କରିବ ବୋଲି କହିବା ସହିତ ପ୍ରଧାନମନ୍ତ୍ରୀ ରାଜ୍ୟବାସୀଙ୍କୁ ଅଭିନନ୍ଦନ ଜଣାଇଥିଲେ।
ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଥିଲେ, ଯେକୌଣସି ଦେଶ କିମ୍ବା ରାଜ୍ୟର ବିକାଶ ପାଇଁ ଶକ୍ତି ସୁରକ୍ଷା ଅତ୍ୟାବଶ୍ୟକ। ସେଥିପାଇଁ ଆଜି ସେ ବିଦ୍ୟୁତ୍ କ୍ଷେତ୍ରରେ ପ୍ରାୟ 3,000 କୋଟି ଟଙ୍କାର ଏକ ପ୍ରକଳ୍ପ ଆରମ୍ଭ କରିବାକୁ ଘୋଷଣା କରିଥିଲେ, ଯାହା ଦେଶର ଶକ୍ତି କ୍ଷମତାକୁ ଆହୁରି ବୃଦ୍ଧି କରିବ। ଦ୍ରୁତ ବିକାଶ ମଧ୍ୟରେ ଅତୀତର ପରିସ୍ଥିତିକୁ ଭୁଲି ନଯିବା ପାଇଁ ସେ ନାଗରିକମାନଙ୍କୁ ଅନୁରୋଧ କରିଥିଲେ। ଶ୍ରୀ ମୋଦୀ କହିଥିଲେ,ଏଗାର ବର୍ଷ ପୂର୍ବେ ବିରୋଧୀ ନେତୃତ୍ୱାଧୀନ କେନ୍ଦ୍ର ସରକାରଙ୍କ ଅଧୀନରେ, ମୁଣ୍ଡପିଛା ବିଦ୍ୟୁତ୍ ବ୍ୟବହାର 1,000 ୟୁନିଟ୍ ରୁ କମ୍ ଥିଲା ଏବଂ ଦେଶ ବିଦ୍ୟୁତ୍ କାଟ ଭଳି ଗମ୍ଭୀର ସମସ୍ୟାର ସମ୍ମୁଖୀନ ହେଉଥିଲା। ହଜାର ହଜାର ଗାଁରେ ମୌଳିକ ବିଦ୍ୟୁତ୍ ଖୁଣ୍ଟ ମଧ୍ୟ ନଥିଲା। ଆଜି, ସ୍ୱଚ୍ଛ ଶକ୍ତିଠାରୁ ଆରମ୍ଭ କରି ସାମଗ୍ରିକ ଶକ୍ତି ଉତ୍ପାଦନ ପର୍ଯ୍ୟନ୍ତ, ଭାରତ ସମସ୍ତ କ୍ଷେତ୍ରରେ ନୂତନ ରେକର୍ଡ ସ୍ଥାପନ କରୁଛି। ପ୍ରତ୍ୟେକ ଗାଁରେ ବିଦ୍ୟୁତ୍ ପହଞ୍ଚିଛି, ମୁଣ୍ଡପିଛା ବିଦ୍ୟୁତ ଉପଯୋଗ 1,400 ୟୁନିଟକୁ ବୃଦ୍ଧି ପାଇଛିଏବଂ ଶିଳ୍ପ ଏବଂ ସାଧାରଣ ପରିବାର ଉଭୟ ପର୍ଯ୍ୟାପ୍ତ ବିଦ୍ୟୁତ୍ ଯୋଗାଣ ପାଉଛନ୍ତି ବୋଲିପ୍ରଧାନମନ୍ତ୍ରୀ କହିଥିଲେ।
ଆନ୍ଧ୍ର ପ୍ରଦେଶକୁ ଭାରତର ଊର୍ଜା ବିପ୍ଳବର ଏକ ପ୍ରମୁଖ କେନ୍ଦ୍ର ବୋଲି ଅଭିହିତ କରି ସେ ଶ୍ରୀକାକୁଲମରୁ ଅନୁଗୁଳ ପର୍ଯ୍ୟନ୍ତ ପ୍ରାକୃତିକ ବାଷ୍ପ ପାଇପଲାଇନ୍ ପ୍ରକଳ୍ପ ଆରମ୍ଭ ଘୋଷଣା କରିଥିଲେ। ଏହା ପ୍ରାୟ ପନ୍ଦର ଲକ୍ଷ ପରିବାରକୁ ବାଷ୍ପଯୋଗାଣ କରିବ। ସେ ଚିତ୍ତୁରରେ ଏକ ଏଲପିଜି ବଟଲିଂ ପ୍ଲାଣ୍ଟକୁ ମଧ୍ୟ ଉଦଘାଟନ କରିଥିଲେ। ଦୈନିକ କୋଡ଼ିଏ ହଜାର ସିଲିଣ୍ଡର ପୂରଣ କରିବାର କ୍ଷମତା ଏହି ପ୍ଲାଣ୍ଟରେ ରହିଛି। ଏହି ସୁବିଧା ସ୍ଥାନୀୟ ପରିବହନ ଏବଂ ସଂରକ୍ଷଣ କ୍ଷେତ୍ରରେ ନିଯୁକ୍ତି ସୃଷ୍ଟି କରିବ ଏବଂ ଯୁବବର୍ଗଙ୍କ ପାଇଁ ନୂତନ ସୁଯୋଗ ସୃଷ୍ଟି କରିବ ବୋଲି ଆଶା କରାଯାଉଛି।
‘‘ସାରା ଦେଶରେ ବହୁମୁଖୀ ଭିତ୍ତିଭୂମି ଦ୍ରୁତ ଗତିରେ ବିକାଶ ହେଉଛି ଏବଂ ଆମେ ଗ୍ରାମରୁ ସହର ଏବଂ ସହରରୁ ବନ୍ଦର ପର୍ଯ୍ୟନ୍ତ ସଂଯୋଗୀକରଣ ଉପରେ ଦୃଢ଼ ଧ୍ୟାନ ଦେଉଛୁ’’, ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଥିଲେ। ସେ ଆହୁରି ଘୋଷଣା କରିଥିଲେ ଯେ ସବାଭରମ୍ ଏବଂ ଶୀଳାନଗର ମଧ୍ୟରେ ନବନିର୍ମିତ ରାଜପଥ ଯୋଗାଯୋଗକୁ ଆହୁରି ବୃଦ୍ଧି କରିବ। ସେ କହିଥିଲେ, ନୂତନ ରେଳ ଲାଇନ ଏବଂ ରେଳ ଫ୍ଲାଏଓଭର ନିର୍ମାଣ ସହିତ ଏକ ନୂତନ ଯୁଗ ଆରମ୍ଭ ହୋଇଛି, ଯାହା ଯାତ୍ରୀ ସୁବିଧାକୁ ଉନ୍ନତ କରିବ ଏବଂ ଏହି ଅଞ୍ଚଳର ଶିଳ୍ପଗୁଡ଼ିକୁ ନୂତନ ଗତି ପ୍ରଦାନ କରିବ।
2047 ସୁଦ୍ଧା ଦେଶ ଏକ ବିକଶିତ ଭାରତର ଲକ୍ଷ୍ୟ ପ୍ରତି ସଂକଳ୍ପବଦ୍ଧ ଏବଂ ସ୍ୱର୍ଣ୍ଣ ଆନ୍ଧ୍ରର ଦୃଷ୍ଟିକୋଣ ଦ୍ୱାରା ଏହି ସଂକଳ୍ପକୁ ସଶକ୍ତ କରାଯାଉଛି ବୋଲି ପ୍ରଧାନମନ୍ତ୍ରୀ କହିଥିଲେ। ସେ ଆହୁରି କହିଥିଲେ, ଆନ୍ଧ୍ର ପ୍ରଦେଶ ଏବଂ ଏହାର ଯୁବପିଢ଼ି ସର୍ବଦା ପ୍ରଯୁକ୍ତିବିଦ୍ୟାରେ ଆଗରେ ରହିଛନ୍ତି ଏବଂ କେନ୍ଦ୍ର ଓ ରାଜ୍ୟରେ ସେମାନଙ୍କ ସରକାର ଅଧୀନରେ, ଏହି ସମ୍ଭାବନାକୁ ଆହୁରି ଉପଯୋଗ ଏବଂ ବିସ୍ତାର କରାଯାଉଛି।
ଶ୍ରୀ ମୋଦୀ କହିଥିଲେ, ବିଶ୍ୱଆଜିଭାରତ ଏବଂ ଆନ୍ଧ୍ର ପ୍ରଦେଶରେ ଦ୍ରୁତ ଏବଂ ବ୍ୟାପକ ପ୍ରଗତି ଦେଖିପାରୁଛି । ମାତ୍ର ଦୁଇ ଦିନ ପୂର୍ବେ ଗୁଗଲ୍ ଆନ୍ଧ୍ର ପ୍ରଦେଶରେ ଏକ ପ୍ରମୁଖ ନିବେଶ ଘୋଷଣା କରିଥିଲା। ଗୁଗୁଲ୍ ରାଜ୍ୟରେ ଭାରତର ପ୍ରଥମ କୃତ୍ରିମ ବୁଦ୍ଧିମତ୍ତା (ଏଆଇ) ହବ୍ ପ୍ରତିଷ୍ଠା କରିବାକୁ ଯାଉଛି। ଏହି ନୂତନ ଏଆଇହବ୍‌ରେ ଶକ୍ତିଶାଳୀ ଏଆଇଭିତ୍ତିଭୂମି, ଡାଟା ସେଣ୍ଟର କ୍ଷମତା, ବୃହତ ଶକ୍ତି ଉତ୍ସ ଏବଂ ଏକ ବିସ୍ତାରିତ ଫାଇବର-ଅପ୍ଟିକ୍ ନେଟୱାର୍କ ରହିବ, ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ।
ଗୁଗୁଲ୍‌ର ଏଆଇହବ୍ ନିବେଶରେ ଏକ ନୂତନ ଅନ୍ତର୍ଜାତୀୟ ଉପସାଗର ପ୍ରବେଶପଥର ବିକାଶ ଅନ୍ତର୍ଭୁକ୍ତ ହେବ ବୋଲି ପ୍ରଧାନମନ୍ତ୍ରୀଘୋଷଣା କରିଥିଲେ । ସେ କହିଥିଲେ, ଏହି ପ୍ରବେଶପଥରେ ବିଶାଖାପାଟଣାରେ ଭାରତର ପୂର୍ବ ଉପକୂଳରେ ପହଞ୍ଚିବା ପାଇଁ ବହୁ ଅନ୍ତର୍ଜାତୀୟ ଉପସାଗର କେବୁଲ୍ ସାମିଲ ହେବ। ଏହି ପ୍ରକଳ୍ପ ବିଶାଖାପାଟଣାକୁ ଏଆଇଏବଂ ବିଶ୍ୱ ଯୋଗାଯୋଗର ଏକ ପ୍ରମୁଖ କେନ୍ଦ୍ର ଭାବରେ ପ୍ରତିଷ୍ଠା କରିବ, ଯାହା କେବଳ ଭାରତ ନୁହେଁ ବରଂ ସମଗ୍ର ବିଶ୍ୱକୁ ସେବା କରିବ। ଏହି ସଫଳତା ପାଇଁ ସେ ଆନ୍ଧ୍ର ପ୍ରଦେଶର ଲୋକମାନଙ୍କୁ ବିଶେଷ ଅଭିନନ୍ଦନ ଜଣାଇଛନ୍ତି।
ଭାରତର ପ୍ରଗତି ପାଇଁ ଆନ୍ଧ୍ର ପ୍ରଦେଶର ବିକାଶ ଅପରିହାର୍ଯ୍ୟ ଏବଂ ରାୟଲସୀମାର ଅଭିବୃଦ୍ଧି ଆନ୍ଧ୍ରର ପ୍ରଗତି ନିମନ୍ତେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ଶ୍ରୀ ମୋଦୀ ଦୃଢ଼ ଭାବେ କହିଥିଲେ। ସେ କହିଥିଲେ, କର୍ଣ୍ଣୁଲ୍ ମାଟିରେ ଆଜି ଆରମ୍ଭ ହୋଇଥିବା ପ୍ରକଳ୍ପଗୁଡ଼ିକ ରାୟଲସୀମାର ପ୍ରତ୍ୟେକ ଜିଲ୍ଲାରେ ନିଯୁକ୍ତି ଏବଂ ସମୃଦ୍ଧିର ନୂତନ ଦ୍ୱାର ଖୋଲିବା ସହିତଏହି କ୍ଷେତ୍ରରେ ଶିଳ୍ପ ବିକାଶକୁ ତ୍ୱରାନ୍ୱିତ କରିବ।
ଆନ୍ଧ୍ରପ୍ରଦେଶର ବିକାଶକୁ ତ୍ୱରାନ୍ୱିତ କରିବା ପାଇଁ ନୂତନ ଶିଳ୍ପ କରିଡର ଏବଂ ହବ୍ ପ୍ରତିଷ୍ଠା କରିବାର ଆବଶ୍ୟକତା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ସେ କହିଥିଲେ, ସରକାର ଓରଭକଲ ଏବଂ କୋପାର୍ତିକୁ ରାଜ୍ୟର ନୂତନ ଶିଳ୍ପ କେନ୍ଦ୍ର ଭାବରେ ବିକଶିତ କରୁଛନ୍ତି। ଏହି ଅଞ୍ଚଳଗୁଡ଼ିକରେ ବର୍ଦ୍ଧିତ ନିବେଶ ନିରନ୍ତର ନୂତନ ନିଯୁକ୍ତି ସୁଯୋଗ ସୃଷ୍ଟି କରୁଛି।
‘‘ଆଜି ବିଶ୍ୱ ଭାରତକୁ ଏକବିଂଶ ଶତାବ୍ଦୀର ନୂତନ ଉତ୍ପାଦନ କେନ୍ଦ୍ର ଭାବରେ ଦେଖୁଛି, ଆତ୍ମନିର୍ଭର ଭାରତ ଦୃଷ୍ଟିକୋଣ ଏହି ସଫଳତାର ମୂଳଦୁଆ ପାଲଟିଛି’’, ପ୍ରଧାନମନ୍ତ୍ରୀ କହିଥିଲେ।ଆତ୍ମନିର୍ଭର ଭାରତର ସଫଳତାରେ ଆନ୍ଧ୍ର ପ୍ରଦେଶ ଏକ ପ୍ରମୁଖ ଅବଦାନକାରୀ ଭାବରେ ଉଭା ହେଉଛି ବୋଲି ସେ କହିଥିଲେ । ପ୍ରଧାନମନ୍ତ୍ରୀ ଆହୁରି କହିଥିଲେ, ପୂର୍ବ ସରକାରଗୁଡ଼ିକ ଆନ୍ଧ୍ର ପ୍ରଦେଶର କ୍ଷମତାକୁ ଅଣଦେଖା କରିଥିଲେ, ଯାହା ସମଗ୍ର ଦେଶ ପାଇଁ ଏକ ବିପର୍ଯ୍ୟୟ ସୃଷ୍ଟି କରିଥିଲା। ଯେଉଁ ରାଜ୍ୟ ଜାତୀୟ ପ୍ରଗତିକୁ ଆଗେଇ ନେଇପାରିଥାନ୍ତା, ତାକୁ ନିଜ ବିକାଶ ପାଇଁ ସଂଘର୍ଷ କରିବାକୁ ପଡ଼ିଥିଲା। ସେମାନଙ୍କ ସରକାରଙ୍କ ଅଧୀନରେ, ଆନ୍ଧ୍ର ପ୍ରଦେଶର ଗତିପଥ ପରିବର୍ତ୍ତନ ହେଉଛି, ଉତ୍ପାଦନରେ ଦ୍ରୁତ ଅଭିବୃଦ୍ଧି ହେଉଛି ବୋଲି ପ୍ରଧାନମନ୍ତ୍ରୀ ସନ୍ତୋଷ ପ୍ରକାଶ କରିଥିଲେ । ସେ ନିମ୍ମାଲୁରୁରେ ଏକ ଆଡଭାନ୍ସଡ୍ ନାଇଟ୍ ଭିଜନ୍ କାରଖାନା ଆରମ୍ଭ କରିବାର ଘୋଷଣା କରିଥିଲେ, ଯାହା ପ୍ରତିରକ୍ଷା କ୍ଷେତ୍ରରେ ଆତ୍ମନିର୍ଭରଶୀଳତା ଦିଗରେ ଆଉ ଏକ ପଦକ୍ଷେପ। ସେ ଆହୁରି ମଧ୍ୟ କହିଥିଲେ ଯେ ଏହି ସୁବିଧା ନାଇଟ୍ ଭିଜନ୍ ଉପକରଣ, କ୍ଷେପଣାସ୍ତ୍ର ସେନ୍ସର ଏବଂ ଡ୍ରୋନ୍ ଗାର୍ଡ ସିଷ୍ଟମ ଉତ୍ପାଦନ କରିବାର ଭାରତର କ୍ଷମତାକୁ ବୃଦ୍ଧି କରିବ ଏବଂ ଦେଶର ପ୍ରତିରକ୍ଷା ରପ୍ତାନିକୁ ନୂତନ ଉଚ୍ଚତାକୁ ନେଇଯିବ। ସେ ଆହୁରି ମଧ୍ୟ ମନ୍ତବ୍ୟ ଦେଇଥିଲେ ଯେ ଅପରେସନ୍ ସିନ୍ଦୂର ସମୟରେ ସମଗ୍ର ବିଶ୍ୱ ସ୍ୱଦେଶୀ ଅସ୍ତ୍ରଶସ୍ତ୍ର ପ୍ରଣାଳୀର ସଫଳତା ଦେଖିଛି।
ଆନ୍ଧ୍ର ପ୍ରଦେଶ ସରକାର କର୍ଣ୍ଣୁଲକୁ ଭାରତର ଡ୍ରୋନ ହବ୍ ଭାବରେ ବିକଶିତ କରିବାକୁ ସଂକଳ୍ପ ନେଇଥିବାରୁ ସନ୍ତୋଷ ପ୍ରକାଶ କରି ପ୍ରଧାନମନ୍ତ୍ରୀ କହିଥିଲେ ଯେ ଡ୍ରୋନ ଶିଳ୍ପ ମାଧ୍ୟମରେକର୍ଣ୍ଣୁଲ ଏବଂ ସମଗ୍ର ଆନ୍ଧ୍ରରେ ଭବିଷ୍ୟତ ପ୍ରଯୁକ୍ତିବିଦ୍ୟା ସହ ଜଡିତ ଅନେକ ନୂତନ କ୍ଷେତ୍ର ଉଭା ହେବ। ସେ ଅପରେସନ ସିନ୍ଦୁରରେ ଡ୍ରୋନର ସଫଳତା ବିଷୟରେ ଉଲ୍ଲେଖ କରିଥିଲେ । ଆଗାମୀ ବର୍ଷଗୁଡ଼ିକରେ କର୍ଣ୍ଣୁଲ ଡ୍ରୋନ କ୍ଷେତ୍ରରେ ଏକ ଜାତୀୟ ଶକ୍ତି ପାଲଟିବ ବୋଲି ସେ କହିଥିଲେ। ଶ୍ରୀ ମୋଦୀ ନାଗରିକ-କୈନ୍ଦ୍ରିକ ବିକାଶର ସରକାରଙ୍କ ଦୃଷ୍ଟିକୋଣକୁ ଦୋହରାଇଥିଲେ, ନାଗରିକଙ୍କ ଜୀବନକୁ ସରଳ କରିବା ପାଇଁ ଲକ୍ଷ୍ୟ ରଖାଯାଇଥିବା ସଂସ୍କାର ଉପରେ ଆଲୋକପାତ କରିଥିଲେ। ସେ କହିଥିଲେ, 12 ଲକ୍ଷ ଟଙ୍କା ପର୍ଯ୍ୟନ୍ତ ଆୟ ବର୍ତ୍ତମାନ ସମ୍ପୂର୍ଣ୍ଣ ଟିକସମୁକ୍ତ କରାଯାଇଛି । ସୁଲଭ ଔଷଧ, କମ ମୂଲ୍ୟରେ ସ୍ୱାସ୍ଥ୍ୟସେବା ଏବଂ ବରିଷ୍ଠ ନାଗରିକଙ୍କ ପାଇଁ ଆୟୁଷ୍ମାନ କାର୍ଡ ଭଳି ପଦକ୍ଷେପ ସହଜ ଜୀବନଯାପନ କ୍ଷେତ୍ରରେ ଏକ ନୂତନ ଅଧ୍ୟାୟ ଆରମ୍ଭ କରିଛି।
ପ୍ରଧାନମନ୍ତ୍ରୀ କହିଥିଲେ, ନବରାତ୍ରିର ପ୍ରଥମ ଦିନରୁ ଗୁରୁତ୍ୱପୂର୍ଣ୍ଣ ଜିଏସଟିହ୍ରାସ କାର୍ଯ୍ୟକାରୀ କରାଯାଇଛି। ନାରା ଲୋକେଶ ଗାରୁଙ୍କ ନେତୃତ୍ୱରେ ଜିଏସଟିବଚତ ଉତ୍ସବ ପାଳନ ଦେଖି ଶ୍ରୀ ମୋଦୀ ଖୁସି ପ୍ରକାଶ କରିଥିଲେ । ‘‘ସୁପର ଜିଏସଟି – ସୁପର ସଞ୍ଚୟ’’ ଅଭିଯାନର ସଫଳ ପ୍ରଚଳନକୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ। ସେ କହିଥିଲେ, ପରବର୍ତ୍ତୀ ପିଢ଼ିର ଜିଏସଟିସଂସ୍କାରଗୁଡ଼ିକ ଆନ୍ଧ୍ର ପ୍ରଦେଶର ଲୋକଙ୍କ ପାଇଁ 8,000 କୋଟି ଟଙ୍କାରୁ ଅଧିକ ସଞ୍ଚୟ କରିବ, ଯାହା ଉତ୍ସବର ଖୁସିକୁ ବୃଦ୍ଧି କରିବ। ପ୍ରଧାନମନ୍ତ୍ରୀ ‘ଭୋକାଲ୍ ଫର୍ ଲୋକାଲ’ପ୍ରତିଜ୍ଞା ସହିତ ସମନ୍ୱୟ ରଖି ଜିଏସଟିସଞ୍ଚୟ ମହୋତ୍ସବ ପାଳନ କରିବାକୁ ଅନୁରୋଧ କରିଥିଲେ। ଶେଷରେ ସେ କହିଥିଲେ, ଏକ ବିକଶିତ ଆନ୍ଧ୍ର ପ୍ରଦେଶ ମାଧ୍ୟମରେ ବିକଶିତ ଭାରତର ସ୍ୱପ୍ନ ସାକାର ହେବଏବଂ ନୂତନ ପ୍ରକଳ୍ପ ପାଇଁ ରାଜ୍ୟବାସୀଙ୍କୁ ପୁଣି ଥରେ ଅଭିନନ୍ଦନ ଜଣାଇଥିଲେ।
ଏହି କାର୍ଯ୍ୟକ୍ରମରେ ଆନ୍ଧ୍ର ପ୍ରଦେଶର ରାଜ୍ୟପାଳ ଶ୍ରୀ ସୟଦ ଅବଦୁଲ ନାଜିର, ଆନ୍ଧ୍ର ପ୍ରଦେଶର ମୁଖ୍ୟମନ୍ତ୍ରୀ ଶ୍ରୀ ଏନ. ଚନ୍ଦ୍ରବାବୁ ନାଇଡୁ, କେନ୍ଦ୍ର କ୍ୟାବିନେଟ୍ ମନ୍ତ୍ରୀ ଶ୍ରୀ ରାମମୋହନ ନାଇଡୁ କିଞ୍ଜରପୁ, ଡକ୍ଟର ଚନ୍ଦ୍ର ଶେଖର ପେମାସାନି, ଶ୍ରୀ ଭୂପତି ରାଜୁ ଶ୍ରୀନିବାସ ବର୍ମା ପ୍ରମୁଖ ଉପସ୍ଥିତ ଥିଲେ।
ପୃଷ୍ଠଭୂମି
ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ପ୍ରାୟ 13,430 କୋଟି ଟଙ୍କାର ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଶିଳାନ୍ୟାସ, ଉଦଘାଟନ ଏବଂ ରାଷ୍ଟ୍ର ଉଦ୍ଦେଶ୍ୟରେ ଲୋକାର୍ପଣ କରିଛନ୍ତି। ଏହି ପ୍ରକଳ୍ପଗୁଡ଼ିକ ଶିଳ୍ପ, ବିଦ୍ୟୁତ୍ ସଞ୍ଚାର, ସଡ଼କ, ରେଳବାଇ, ପ୍ରତିରକ୍ଷା ଉତ୍ପାଦନ, ଏବଂ ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ ଭଳି ପ୍ରମୁଖ କ୍ଷେତ୍ରଗୁଡ଼ିକ ସହ ଜଡ଼ିତ। ଏସବୁ ପ୍ରକଳ୍ପଆଞ୍ଚଳିକ ଭିତ୍ତିଭୂମିରେ ଉନ୍ନତି ଆଣିବ, ଶିଳ୍ପାୟନକୁ ତ୍ୱରାନ୍ୱିତ କରିବ ଏବଂ ରାଜ୍ୟରେ ସାମଗ୍ରିକ ସାମାଜିକ-ଆର୍ଥିକ ଅଭିବୃଦ୍ଧିକୁ ଆଗେଇ ନେବା ପାଇଁ ସରକାରଙ୍କ ପ୍ରତିବଦ୍ଧତାକୁ ପ୍ରତିଫଳିତ କରିଥାଏ।
ପ୍ରଧାନମନ୍ତ୍ରୀ କର୍ଣ୍ଣୁଲ-III ପୁଲିଂ ଷ୍ଟେସନରେ 2,880 କୋଟି ଟଙ୍କାରୁ ଅଧିକ ନିବେଶରେ ସଞ୍ଚାରଣ ପ୍ରଣାଳୀ ସୁଦୃଢ଼ୀକରଣ ପାଇଁ ଶିଳାନ୍ୟାସ କରିଥିଲେ। ଏହି ପ୍ରକଳ୍ପରେ 765 କେଭିଡବଲ-ସର୍କିଟ୍ କର୍ଣ୍ଣୁଲ-III ପୁଲିଂ ଷ୍ଟେସନ-ଚିଲାକାଲୁରିପେଟା ସଞ୍ଚାରଣ ଲାଇନ ନିର୍ମାଣ ଅନ୍ତର୍ଭୁକ୍ତ, ଯାହା ପରିବର୍ତ୍ତିତ କ୍ଷମତାକୁ 6,000 ଏମଭିଏକୁବୃଦ୍ଧି କରିବ। ଏହା ଦେଶର ଅଭିବୃଦ୍ଧିକୁ ସମର୍ଥନ କରିବା ପାଇଁ ଅକ୍ଷୟ ଶକ୍ତିର ବୃହତ ପରିମାଣର ସଞ୍ଚାରଣକୁ ସକ୍ଷମ କରିବ।
ପ୍ରଧାନମନ୍ତ୍ରୀ କର୍ଣ୍ଣୁଲରେ ଓରଭକଲ ଶିଳ୍ପାଞ୍ଚଳ ଏବଂ କଡପାରେ କୋପ୍ପାର୍ଥୀ ଶିଳ୍ପାଞ୍ଚଳ ପାଇଁ ମଧ୍ୟ ଭିତ୍ତିପ୍ରସ୍ତର ସ୍ଥାପନ କରିଥିଲେ, ଯେଉଁଥିରେ ମୋଟ 4,920 କୋଟି ଟଙ୍କାରୁ ଅଧିକ ନିବେଶ କରାଯିବ। ଜାତୀୟ ଶିଳ୍ପ କରିଡର ବିକାଶ ଏବଂ କାର୍ଯ୍ୟାନ୍ୱୟନ ଟ୍ରଷ୍ଟ (ଏନଆଇସିଡିଆଇଟି) ଏବଂ ଆନ୍ଧ୍ର ପ୍ରଦେଶ ଶିଳ୍ପ ଭିତ୍ତିଭୂମି ନିଗମ ଲିମିଟେଡ୍ (ଏପିଆଇଆଇସି) ଦ୍ୱାରା ମିଳିତ ଭାବେ ବିକଶିତ ହୋଇଥିବା ଏହି ଆଧୁନିକ, ବହୁ-କ୍ଷେତ୍ରୀୟ ଶିଳ୍ପ କେନ୍ଦ୍ରଗୁଡ଼ିକରେ ପ୍ଲଗ୍-ଆଣ୍ଡ-ପ୍ଲେ ଭିତ୍ତିଭୂମି ଏବଂ ୱାକ୍-ଟୁ-ୱାର୍କ ବିଚାର ରହିଛି। ଏଗୁଡ଼ିକ କୋଟି କୋଟି ଟଙ୍କାର ନିବେଶ ଆକୃଷ୍ଟ କରିବ ବୋଲି ଆଶା କରାଯାଉଛି। ଏହାଦ୍ୱାରା 21,000 କୋଟି ଟଙ୍କାର ନିବେଶ ଏବଂ ପାଖାପାଖି ଏକ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ । ଫଳରେ ଆନ୍ଧ୍ରପ୍ରଦେଶର ରାୟଲସୀମା ଅଞ୍ଚଳରେ ଶିଳ୍ପ ବିକାଶ ଏବଂ ବିଶ୍ୱସ୍ତରୀୟ ପ୍ରତିଦ୍ୱନ୍ଦ୍ୱିତା ବୃଦ୍ଧି ପାଇବ।
ସଡ଼କ ଭିତ୍ତିଭୂମିକୁ ଉନ୍ନତ କରିବା ପାଇଁପ୍ରଧାନମନ୍ତ୍ରୀ ସବାଭରମରୁ ଶୀଳାନଗର ପର୍ଯ୍ୟନ୍ତ 960 କୋଟି ଟଙ୍କାରୁ ଅଧିକ ମୂଲ୍ୟର ଛଅ ଲେନ୍ ବିଶିଷ୍ଟ ଗ୍ରୀନଫିଲ୍ଡ ହାଇୱେର ଭିତ୍ତିପ୍ରସ୍ତର ସ୍ଥାପନ କରିଛନ୍ତି, ଯାହାର ଲକ୍ଷ୍ୟ ବିଶାଖାପାଟଣାରେ ଭିଡ଼ କମ କରିବା ଏବଂ ବାଣିଜ୍ୟ ଓ ନିଯୁକ୍ତିକୁ ସୁଗମ କରିବା। ଏହାସହିତ, ପ୍ରାୟ 1,140 କୋଟି ଟଙ୍କା ମୂଲ୍ୟର ଛଅଟି ସଡ଼କ ପ୍ରକଳ୍ପ ଉଦଘାଟନ କରାଯିବ, ଯେଉଁଥିରେ ପିଲାରୁ-କାଲୁର ସେକ୍ସନର ଚାରି ଲେନ୍, କଡପା/ନେଲୋର ସୀମାରୁ ସିଏସପୁରମ ପର୍ଯ୍ୟନ୍ତ ପ୍ରଶସ୍ତୀକରଣ, ଏନଏଚ-165ରେ ଗୁଡିୱାଡା ଏବଂ ନୁଜେଲା ରେଳ ଷ୍ଟେସନ ମଧ୍ୟରେ ଚାରି ଲେନ୍ ବିଶିଷ୍ଟ ରେଳ ଓଭର ବ୍ରିଜ୍ (ଆରଓବି), ଏନଏଚ-716 ରେ ପାପାଗ୍ନି ନଦୀ ଉପରେ ପ୍ରମୁଖ ସେତୁ, ଏନଏଚ-565 ରେ କାନିଗିରି ବାଇପାସ୍ ଏବଂ ଏନଏଚ-544ଡିଡିରେ ଏନ. ଗୁଣ୍ଡଲାପାଲି ଟାଉନରେ ବାଇପାସ୍ ସେକ୍ସନର ଉନ୍ନତି ଅନ୍ତର୍ଭୁକ୍ତ। ଏହି ପ୍ରକଳ୍ପଗୁଡ଼ିକ ସଡ଼କ ସୁରକ୍ଷାକୁ ଉନ୍ନତ କରିବ, ଯାତ୍ରା ସମୟ ହ୍ରାସ କରିବ ଏବଂ ସମଗ୍ର ଆନ୍ଧ୍ର ପ୍ରଦେଶରେ ଆଞ୍ଚଳିକ ଯୋଗାଯୋଗକୁ ସୁଦୃଢ଼ କରିବ।
ପ୍ରଧାନମନ୍ତ୍ରୀ 1200 କୋଟି ଟଙ୍କାରୁ ଅଧିକ ମୂଲ୍ୟର ଅନେକ ଗୁରୁତ୍ୱପୂର୍ଣ୍ଣ ରେଳ ପ୍ରକଳ୍ପର ଶିଳାନ୍ୟାସ ଏବଂ ଲୋକାର୍ପଣ କରିଥିଲେ।ଏହି ପ୍ରକଳ୍ପଗୁଡ଼ିକରେ କୋଟ୍ଟାଭାଲସା-ବିଜୟନଗରମ ଚତୁର୍ଥ ରେଳ ଲାଇନ ଏବଂ ପେଣ୍ଡୁର୍ଟି ଓ ସିଂହାଚଳମ ଉତ୍ତର ମଧ୍ୟରେ ରେଳ ଫ୍ଲାଏଓଭର ପାଇଁ ଶିଳାନ୍ୟାସ,କୋଟ୍ଟାଭାଲସା-ବୋଦ୍ଦାଭାରା ସେକ୍ସନ ଏବଂ ଶିମିଳିଗୁଡ଼ା-ଗୋରାପୁର ସେକ୍ସନର ଦୋହରୀକରଣକୁ ରାଷ୍ଟ୍ର ଉଦ୍ଦେଶ୍ୟରେ ଲୋକାର୍ପଣ କରିବା ଅନ୍ତର୍ଭୁକ୍ତ। ଏହି ପ୍ରକଳ୍ପଗୁଡ଼ିକ ଭିଡ଼ ହ୍ରାସ କରିବ, ଦ୍ରୁତ ଓ ସୁରକ୍ଷିତ ଯାତ୍ରା ସୁନିଶ୍ଚିତ କରିବ, ଯାତ୍ରୀ ଓ ମାଲ ପରିବହନକୁ ସୁଗମ କରିବ, ସ୍ଥାନୀୟ ଲୋକଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି କରିବା ସହିତ ସମଗ୍ର ଅଞ୍ଚଳରେ ଶିଳ୍ପ, ବାଣିଜ୍ୟ ଓ ପର୍ଯ୍ୟଟନ ଅଭିବୃଦ୍ଧିକୁ ପ୍ରୋତ୍ସାହିତ କରିବ।
ଇନ୍ଧନ କ୍ଷେତ୍ରରେ, ପ୍ରଧାନମନ୍ତ୍ରୀ ଗେଲ୍ ଇଣ୍ଡିଆ ଲିମିଟେଡର ଶ୍ରୀକାକୁଲମ୍-ଅନୁଗୁଳ ପ୍ରାକୃତିକ ବାଷ୍ପ ପାଇପଲାଇନକୁ ରାଷ୍ଟ୍ର ଉଦ୍ଦେଶ୍ୟରେ ଉତ୍ସର୍ଗ କରିଥିଲେ।ଏହାର ମୋଟ୍ ବ୍ୟୟବରାଦ ପ୍ରାୟ 1,730 କୋଟି ଟଙ୍କାଯାହା ଆନ୍ଧ୍ର ପ୍ରଦେଶରେ ପ୍ରାୟ 124 କିଲୋମିଟର ଏବଂ ଓଡ଼ିଶାରେ 298 କିଲୋମିଟର ବ୍ୟାପ୍ତ। ସେ ଇଣ୍ଡିଆନ ଅଏଲର 60 ଟିଏମଟିପିଏ (ବାର୍ଷିକ ହଜାର ମେଟ୍ରିକ ଟନ) ଏଲପିଜି ବଟଲିଂ ପ୍ଲାଣ୍ଟକୁ ମଧ୍ୟ ଉଦଘାଟନ କରିଥିଲେ, ଯାହା ପ୍ରାୟ 200 କୋଟି ଟଙ୍କା ନିବେଶରେ ଆନ୍ଧ୍ରପ୍ରଦେଶର ଚିତ୍ତୁର ଠାରେ ସ୍ଥାପିତ ହୋଇଛି। ଏହି କାରଖାନା ଆନ୍ଧ୍ର ପ୍ରଦେଶର ଚାରୋଟି ଜିଲ୍ଲା, ତାମିଲନାଡ଼ୁର ଦୁଇଟି ଜିଲ୍ଲା ଏବଂ କର୍ଣ୍ଣାଟକର ଗୋଟିଏ ଜିଲ୍ଲାରେ 80 ଜଣ ବିତରକଙ୍କ ମାଧ୍ୟମରେ 7 ଲକ୍ଷରୁ ଅଧିକ ଗ୍ରାହକଙ୍କୁ ସେବା ପ୍ରଦାନ କରିବ। ଏସବୁ ଅଞ୍ଚଳର ସାଧାରଣ ପରିବାର ଏବଂ ବ୍ୟବସାୟ ପାଇଁ ବିଶ୍ୱସନୀୟ ଏଲପିଜି ଯୋଗାଣ ସୁନିଶ୍ଚିତ କରିବାରେ ଏହା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।
ପ୍ରତିରକ୍ଷା ଉତ୍ପାଦନକୁ ସୁଦୃଢ଼ କରିବା ପାଇଁ, ପ୍ରଧାନମନ୍ତ୍ରୀ କ୍ରିଷ୍ଣା ଜିଲ୍ଲାର ନିମ୍ମାଲୁରୁଠାରେ ଭାରତ ଇଲେକ୍ଟ୍ରୋନିକ୍ସ ଲିମିଟେଡ୍ ଦ୍ୱାରା ପ୍ରାୟ 360 କୋଟି ଟଙ୍କା ନିବେଶରେ ପ୍ରତିଷ୍ଠିତ ଆଡଭାନ୍ସଡ୍ ନାଇଟ୍ ଭିଜନ୍ ପ୍ରଡକ୍ଟସ୍ ଫ୍ୟାକ୍ଟ୍ରିକୁ ଲୋକାର୍ପଣ କରିଥିଲେ। ଏହି ସୁବିଧା ଭାରତୀୟ ପ୍ରତିରକ୍ଷା ବାହିନୀ ପାଇଁ ଉନ୍ନତ ଇଲେକ୍ଟ୍ରୋ-ଅପ୍ଟିକାଲ୍ ସିଷ୍ଟମ ନିର୍ମାଣ କରିବ, ପ୍ରତିରକ୍ଷା ଉତ୍ପାଦନରେ ଆତ୍ମନିର୍ଭରଶୀଳତାକୁ ସୁଦୃଢ଼ କରିବ ଏବଂ ଏହି କ୍ଷେତ୍ରରେ କୁଶଳୀ ନିଯୁକ୍ତିକୁ ପ୍ରୋତ୍ସାହିତ କରିବ।