ଚନ୍ଦଳୀ ଉଚ୍ଚ ବିଦ୍ୟାଳୟରେ ପରୀକ୍ଷାଫଳ, ପ୍ରାଚୀର ପତ୍ର, କିଶୋରୀ ଶିକ୍ଷା ଓ ଯୋଗ ଶିକ୍ଷା କାର୍ଯ୍ୟକ୍ରମ ଅନୁଷ୍ଠିତ
ଡୁଙ୍ଗୁରିପାଲି, (କେପିଏନ୍ଏସ୍) : ଚନ୍ଦଳି ଉନ୍ନୀତ ଉଚ୍ଚ ବିଦ୍ୟାଳୟରେ ସମାପ୍ତିସୂଚକ ମୂଲ୍ୟାୟନର ଫଳାଫଳ ପ୍ରକାଶ ପାଇଛି । ଛାତ୍ରଛାତ୍ରୀ, ପିତାମାତା ଓ ଅଭିଭାବକମାନେ ପରୀକ୍ଷା ଫଳ ଜାଣି ତାଙ୍କର ମତାମତ ଶିକ୍ଷକ ଶିକ୍ଷୟିତ୍ରୀମାନଙ୍କୁ ଜଣାଇଥିଲେ । ଏହା ପରେ ବିଦ୍ୟାଳୟରେ କିଶୋର ଓ ଛାତ୍ରଛାତ୍ରୀମାନଙ୍କ ପାଇଁ ବିଭିନ୍ନ ସହଶିକ୍ଷଣ କାର୍ଯ୍ୟକ୍ରମ ପ୍ରଧାନ ଶିକ୍ଷକ ପ୍ରେମରାଜ ସେଠୀଙ୍କ ତତ୍ତ୍ୱାବଧାନରେ ଅନୁଷ୍ଠିତ ହୋଇଯାଇଥିଲା । କିଶୋର ଯୋଗ ଶିବିର ଆୟୋଜନ କରିଥିଲେ କ୍ରୀଡା ଶିକ୍ଷକ ଶ୍ରୀମନ୍ତ ପ୍ରଧାନ ଓ ତାଙ୍କୁ ସହଯୋଗ କରିଥିଲେ ଶିକ୍ଷକ ଅରୂପା ସାହୁ, ସନ୍ତୋଷ ଭୋଇ, ପ୍ରକାଶ ଭୁଏ ଏବଂ ଶିକ୍ଷିକା ନିକିତା ସାହୁ । ପରେ କିଶୋର କିଶୋରୀମାନଙ୍କର ପାଇଁ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା । ଶିକ୍ଷୟିତ୍ରୀ ନିତୁ ପଧାନ, ସାନ୍ତନା ଗୁରୁମା ଓ ଶିକ୍ଷକ ଦିବ୍ୟରଞ୍ଜନ ପଧାନ କାର୍ଯ୍ୟକ୍ରମ ପରିଚାଳନା କରିଥିଲେ । ଆଲୋଚନାଚକ୍ରରେ ଅନ୍ଧାରିବାଞ୍ଜି ସ୍ୱାସ୍ଥ୍ୟ କର୍ମୀ ମଞ୍ଜୁଲତା ବୁଡ଼େକ ଓ ଆଶା କର୍ମୀ ମିନା ଭୁଏ ଛାତ୍ରଛାତ୍ରୀମାନଙ୍କୁ କିଶୋର ଅବସ୍ଥାରେ ହେଉଥିବା ବିଭିନ୍ନ ସମସ୍ୟା ଓ ତାର ନିଦାନ ବିଷୟରେ ଅବଗତ କରାଇଥିଲେ । ଅନୁଷ୍ଠିତ ପୋଷ୍ଟର ତିଆରି ପ୍ରତିଯୋଗିତାରେ ବହୁ ସଂଖ୍ୟାରେ ଛାତ୍ରଛାତ୍ରୀ ଭାଗ ନେଇଥିଲେ । ଶିକ୍ଷକ ବାସୁଦେବ ବିଶ୍ୱାଳ, ରମେଶ ପ୍ରଧାନ, ସୁଜିତ ବଗର୍ତ୍ତୀ ତଦାରଖ କରିଥିଲେ । ପରିଶେଷରେ ଛାତ୍ରଛାତ୍ରୀଙ୍କ ଦ୍ୱାରା ସୁଶୋଭିତ ପ୍ରାଚୀର ପତ୍ରକୁ ଅଭିଭାବକମାନଙ୍କର ଦ୍ୱାରା ଉଦ୍ଘାଟିତ କରାଯାଇଥିଲା । ଏହି ଅବସରରେ ଆଞ୍ଚଳିକ ସାଧନ କେନ୍ଦ୍ରର ସଂଯୋଜକ ପ୍ରଦୀପ୍ତ କିଶୋର ଦାଶ ଉପସ୍ଥିତ ରହି ଛାତ୍ରଛାତ୍ରୀମାନଙ୍କୁ ଉତ୍ସାହିତ କରିଥିଲେ । ସ୍ୱେଚ୍ଛାସେବୀ ପିଙ୍କୁ ଭୁଏ, ସୁନୀଲ ଭୋଇ ଓ ଗ୍ରାମବାସୀ ସହଯୋଗ କରି କାର୍ଯ୍ୟକ୍ରମକୁ ସଫଳ କରାଇଥିଲେ ।