ବଲାଙ୍ଗିର, (କେପିଏନ୍ଏସ୍) : ସ୍ଥାନୀୟ ସାଗରପଡ଼ାସ୍ଥିତ ଏକ କ୍ଲବ ଘରେ ଚାଲିଥିବା ଜୁଆ ଆଡ୍ଡା ଉପରେ ପୋଲିସ ଚଢାଉ କରି ୫ ଜୁଆଡ଼ିଙ୍କୁ ଗିରଫ୍ କରିଛି । ସେମାନଙ୍କଠାରୁ ୫୩ ହଜାର ୪ ଶହ ଟଙ୍କା ଜବତ କରାଯାଇଥିବା ନେଇ ଟାଉନ ଥାନା ଆଇଆଇସି ବିଶ୍ୱଜିତ୍ ମନବୋଧ ଜଣାଇଛନ୍ତି । ମିଳିଥିବା ସୂଚନା ଅନୁସାରେ ଏଠାରେ ନିୟମିତ ଜୁଆ ଆଡ୍ଡା ଚାଲିଥିବା ନେଇ ପୁଲିସ କୌଣସି ସୂତ୍ରରୁ ଖବର ପାଇ ବୁଧବାର ରାତିରେ ଚଢ଼ଉ କରିଥିଲା । ଜୁଆଡ଼ିମାନେ ଫେରାର ମାରିବାକୁ ଉଦ୍ୟମ କରୁଥିବା ବେଳେ ପୁଲିସ ସେମାନଙ୍କୁ କାବୁ କରିଥିବା ଜଣାପଡିଛି । ଏମାନଙ୍କ ପାଖରୁ କାର୍ଡ, ୫ଟି ବାଇକ୍ ଓ ୫ଟି ମୋବାଇଲ ଜବତ କରାଯାଇଛି । କେସ୍ ନଂ ୪୮୪/୨୩ରେ ୫ ଜଣ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ନେଇ ଶ୍ରୀ ମନବୋଧ ସୂଚନା ଦେଇଛନ୍ତି । ଗିରଫ୍ ଜୁଆଡ଼ିମାନେ ହେଲେ ଅକ୍ଷୟ ତ୍ରିପାଠୀ, ସଞ୍ଜୟ ଚନ୍ଦନ, ପ୍ରମୋଦ ବାବୁ, ଦୁର୍ଗା ପ୍ରସାଦ ନାଏକ ଓ ଉଦ୍ୟୋତ ଖୁଆସ ବୋଲି ପୁଲିସ ସୂତ୍ରରୁ ସୂଚନା ମିଳିଛି ।