ବଲାଙ୍ଗିର, (କେପିଏନ୍ଏସ୍) : ଆଜି ଜିଲ୍ଲା ପ୍ରଶାସନ ତରଫରୁ ଆନ୍ତର୍ଜାତିକ ଯୋଗ ଦିବସ ରାଜେନ୍ଦ୍ର ନାରାୟଣ ସିଂହଦେଓ କ୍ରୀଡ଼ା ପ୍ରାଙ୍ଗଣରେ ଅନୁଷ୍ଠିତ ହୋଇଯାଇଛି । ଏଥିରେ ସନ୍ତରଣ, ଲନ୍ ବଲ୍, ଫେନ୍ସିଂ, ମର୍ଣ୍ଣିଂ ୱାର୍କ ଏସୋସିଏସନ୍ ତଥା ଜିଲ୍ଲା ପ୍ରଶାସନର ଅନେକ ଅଧିକାରୀ ଯୋଗ ଦେଇଥିଲେ । ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ତଥା ମୁଖ୍ୟ ପ୍ରଶାସକ ସୁଶାନ୍ତ କୁମାର ସିଂହ ଯୋଗଦେଇ ସମସ୍ତଙ୍କୁ ଯୋଗର ଉପାଦେୟତା ବୁଝାଇବା ସଙ୍ଗେ ସଙ୍ଗେ ଏହାକୁ ନିଜର ଦୈନନ୍ଦିନ ଜୀବନରେ ସାମିଲ କରି ସୁସ୍ଥ ରହିବାକୁ ଉପଦେଶ ଦେଇଥିଲେ । ଶାରିରୀକ ଶିକ୍ଷା ଛାତ୍ରୀ ତଥା ଜାତୀୟ ସ୍ତରର ଯୋଗ ଏବଂ ଫେନସିଙ୍ଗ୍ ଖେଳାଳୀ କୁମାରୀ ସୌଦାମିନୀ କାଣ୍ଡି ସମସ୍ତଙ୍କୁ ଯୋଗାଭ୍ୟାସ କରାଇଥିଲେ । ଉକ୍ତ କାର୍ଯ୍ୟକ୍ରମଟିକୁ ଜିଲ୍ଲା କ୍ରୀଡ଼ା ଅଧିକାରୀ ପରାଶର ବାଗ ପରିଚାଳନା କରିଥିଲେ । ଜିଲ୍ଲା ପରିଷଦ ବଲାଙ୍ଗିର ତରଫରୁ ସମସ୍ତ ଆନୁଷଙ୍ଗିକ ବ୍ୟବସ୍ଥା କରାଯାଇଥିଲା ।