ପଟ୍ଟାମୁଣ୍ଡାଇ : ସାପ କାମୁଡାରେ ୪ ବର୍ଷର କଅଁଳ ଶିଶୁର ମୃତ୍ୟୁ ହୋଇଛି । ମୃତ ଶିଶୁ ହେଲେ କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ବ୍ଲକ ଡାମରପୁର ପଞ୍ଚାୟତ ତେଲିପାଟଣା ଗାଁର ନାରାୟଣ ପ୍ରସାଦ ସାହୁଙ୍କ ୪ ବର୍ଷର ଶିଶୁପୁତ୍ର ଅନ୍ତର୍ଯ୍ୟାମୀ ସାହୁ । ସୂଚନା ମୁତାବକ, ଶନିବାର ସକାଳୁ ଘର ଅଗଣାରେ ଅନ୍ତର୍ଯ୍ୟାମୀ ଖେଳୁଥିଲା । ଏତିକି ବେଳେ ଏକ ବିଷାକ୍ତ ସାପ ତାଙ୍କୁ କାମୁଡ଼ି ଦେଇଥିଲା । ହେଲେ ଗାଁରେ ବନ୍ୟା ପାଣି ରହିଥିବାରୁ ଶିଶୁକୁ ମେଡିକାଲ ଆଣିବାରେ ବିଳମ୍ବ ହୋଇଥିଲା । ଯାହା ଫଳରେ କଅଁଳ ଶିଶୁଟିର ଚାଲିଗଲା ଜୀବନ । ମେଡିକାଲ ପରିସରରେ ନିଜ ଏକମାତ୍ର ୪ ବର୍ଷର ପୁଅର ମୃତଦେହକୁ ଧରି ମା କାନ୍ଦୁଛନ୍ତି । ଏହି ଘଟଣା ପରେ ପରିବାରରେ ଶୋକର ଛାୟା ଖେଳି ଯାଇଛି ।
