ଛତ୍ରପୁର, (କେ.ସତ୍ୟନାରାୟଣ ରେଡ୍ଡୀ) : ଛତ୍ରପୁରର ପୁରୁଣା ରିଜର୍ଭ ପୋଲିସ ଲାଇନରେ ପରମ୍ପରା କ୍ରମେ ସମାହିତ ହୋଇଆସୁଥିବା ସପ୍ତାହବ୍ୟାପୀ ପାଳିତ ମା’କୁଲାଡ଼ ବ୍ୟାଘ୍ରଦେବୀଙ୍କ ଯାତ୍ରା ମଙ୍ଗଳବାର ମଧ୍ୟରାତ୍ରିରେ ଉଦ୍ଯାପିତ ହୋଇଯାଇଛି । ମଙ୍ଗଳବାର ମା’ଙ୍କ ଅନ୍ତିମ ଘଟଯାତ୍ରା ବାହାରିଥିବା ବେଳେ ଏସ୍ଡ଼ିପିଓଙ୍କ ବାସଭବନରେ ପ୍ରଥମେ ମା’ କ୍ଷୀରି, କାକରା, ଆରିସା, ମଣ୍ଡା ପିଠା, ରସାବଳୀ ପଣା ଆଦି ନାନା ବ୍ୟଞ୍ଜନରେ ତିଆରି ସ୍ୱାଦିଷ୍ଟ ରାଜଭୋଗ ମା’ଙ୍କୁ ସମର୍ପଣ କରାଯାଇଥିଲା । ପରେ ମା’ବେରକସାହି, ରାମକୃଷ୍ଣନଗର, ରିକାପଲ୍ଲୀ ଛକ, ମେଦିରି ସାହି, ଦୟା ସାହୁଙ୍କ ବାସଭବନ ପର୍ଯ୍ୟନ୍ତ ନଗର ପରିଭ୍ରମଣ କରିବା ପରେ ଦେବୀଙ୍କ ଘଟଯାତ୍ରା ମା’ଙ୍କ ମୁଖ୍ୟ ମନ୍ଦିରକୁ ବାହୁଡି ଥିଲା । ଦେବୀଙ୍କ ସହଚରୀ, ସାତଭଉଣୀ, ଦେହରକ୍ଷୀ, ବାଘ, ଘୋଡା, ବୃଷଭ, ରଣପା-କାଳୀ, ଭିନ୍ନଭିନ୍ନ ନାଟ ପସରା, ଘଣ୍ଟଦଳ, ଚାଙ୍ଗୁ ବାଦ୍ୟ, ବିଭିନ୍ନ ଦେବାଦେବୀ ନୃତ୍ୟ, ପଶୁନୃତ୍ୟର ପଟୁଆରରେ ସହର ପରିକ୍ରମା ହୋଇ ମେଳା, ମୀନାବଜାର, ଦୋଳି ପସରା ସହ ଛତ୍ରପୁର ସହର ଉତ୍ସବ ମୁଖର ହୋଇଉଠିଥିଲା । ଗଞ୍ଜାମ ପୋଲିସ ଜିଲ୍ଲା ହେଡ଼ କ୍ୱାଟରରେ ନିୟୋଜିତ ବହୁ ବରିଷ୍ଠ ପୋଲିସ ଅଧିକାରୀ, ଆରକ୍ଷୀ-ସେନାବାହିନୀ, ଅଧିକାରୀଙ୍କ ସମେତ ଗଞ୍ଜାମ ଏସ୍ପି ବ୍ରିଜେଶ କୁମାର ରାଏ, ଏସ୍.ଡ଼ି.ପି.ଓ ଗୌତ୍ତମ କିଷାନ, ଡିଆଇବି-ଡ଼ିଏସ୍ପି ଅଜୟ କୁମାର ମିଶ୍ର, ଆସିଷ୍ଟାଣ୍ଟ କମାଣ୍ଡେଣ୍ଟ ମାନସ ରଞ୍ଜନ ମହାନ୍ତି, ବରିଷ୍ଠ କିରାଣୀ ଏ.ରାବଣା ରାଓ ପ୍ରମୁଖ ପୋଲିସ କର୍ମଚାରୀ ୟୁନିୟନର ସଭାପତି ଅଭିମନ୍ୟୁ ଜାଲି, ସାଧାରଣ ସମ୍ପାଦକ ସୁବାଷ ସେଠୀ, ପୂର୍ବତନ କର୍ମକର୍ତ୍ତା ବ୍ରଜମୋହନ ଜେନା ପ୍ରମୁଖ ବହୁ ପୋଲିସ ବିଭାଗୀୟ ଅଧିକାରୀ କର୍ମଚାରୀ ସକ୍ରୀୟ ଅଂଶଗ୍ରହଣ କରି ଏହି ଯାତ୍ରାକୁ ସଫଳ କରାଇଥିଲେ ।