ପାଟଣା : ବନବିଭାଗ ପକ୍ଷରୁ ଲକ୍ଷାଧିକ ଟଙ୍କାର ଶାଳଗଣ୍ଡି ଜବତ ହୋଇଥିବା ଜଣାପଡିଛି । କେନ୍ଦୁଝର ଜିଲ୍ଲା ପାଟଣା ବନାଞ୍ଚଳ ସାହାରପଡା କ୍ଷେତ୍ର ମାଛଗଡ଼ ଖଣ୍ଡ ଅନ୍ତର୍ଗତ ହରିଡାଗୋଠ ଗ୍ରାମ ନିକଟସ୍ଥ ଜଙ୍ଗଲରେ ଗତକାଲି ବନ ବିଭାଗ ଅତର୍କିତ ଚଢ଼ାଉ କରି ଲକ୍ଷାଧିକ ଟଙ୍କାର ଶାଳଗଣ୍ଡି ଜବତ କରିଛି । ଜଙ୍ଗଲରେ ଗଛ କଟା ଯାଇଥିବା ନେଇ କୌଣସି ସୂତ୍ରରୁ ଖବର ପାଇ ପାଟଣା ବନାଞ୍ଚଳ ଅଧିକାରୀ ଟିକେଶ୍ୱର ମହାନ୍ତଙ୍କ ନେତୃତ୍ୱରେ ସାହାରପଡା ବନପାଳ ମୋହିନୀ ମହାନ୍ତ ଏବଂ ପାରାକର୍ମଚାରୀ ଜଙ୍ଗଲରେ ଚଢ଼ାଉ କରିଥିଲେ । ଚଢ଼ାଉ ସମୟରେ ବନ ବିଭାଗକୁ ଦେଖି କାଠ ମାଫିଆ ଘଟଣାସ୍ଥଳରୁ ଫେରାର ହୋଇଯାଇଥିବା ବେଳେ କାଠ ଗୁଡିକୁ ବନ ବିଭାଗ ଜବତ କରି ପାଟଣା ବନାଞ୍ଚଳକୁ ଆଣିଛି । ଜବତ କାଠ ମଧ୍ୟରେ ୧୫ଟି ଶାଳଗଣ୍ଡି ଥିବା ବେଳେ ଏହାର ଆନୁମାନିକ ମୂଲ୍ୟ ୧ ଲକ୍ଷ ଟଙ୍କାରୁ ଅଧିକ ହେବ ବୋଲି ବନ ବିଭାଗ ସୂଚନା ଦେଇଛି ।