ନୂଆପଡା, (ଅଜିତ ବେହେରା) : ନୂଆପଡା ସଦର ବ୍ଲକ ଟାନୱାଟ ପଞ୍ଚାୟତ ଲୁକୁପାଲି ଛକ ଠାରେ ବୁଧବାର ଦୁଇ ବାଇକ ମଧ୍ୟରେ ମୁହାଁମୁହିଁ ଧକ୍କାରେ ୨ ବାଇକ ଆରୋହୀଙ୍କ ମୃତ୍ୟୁ ହୋଇଥିବା ବେଳେ ୪ ଜଣ ଗୁରୁତର ଆହତ ହୋଇଛନ୍ତି । ମୃତକ ମାନେ ହେଲେ କୋମନା ଥାନା ମିର୍ଦ୍ଧାପାଲି ପଞ୍ଚାୟତ ବାଟିବାହାଲ ଗାଁର ସୁମାଛ ସାହୁ (୨୬) ଓ ଛତିଶଗଡ ରାଜ୍ୟ କୋମାଖାନ ଥାନା ଚୁରକିବାବଲ ଗାଁର ପାରଶ ରାମ ନାଗେଶ (୩୦) ବୋଲି ଜଣାପଡ଼ିଛି । ପ୍ରାପ୍ତ ସୂଚନା ଅନୁଯାୟୀ କୋମାଖାନ ଥାନା ତୁରକିବାବଲ ଗାଁର ଜଣେ ବ୍ୟକ୍ତିଙ୍କ ହାତ ଭାଙ୍ଗି ଯାଇଥିବାରୁ ଚିକିତ୍ସା କରିବା ପାଇଁ ୩ ଜଣ ବ୍ୟକ୍ତି ଏକ ବାଇକରେ ଠିକପାଲି ପଂଚାୟତ ସଲଙ୍ଗୀପଡା ଗାଁକୁ ଯାଉଥିଲେ । ସହି ସମୟରେ ବିପରୀତ ଦିଗରୁ ଆସୁଥିବା ଏକ ବାଇକ ୩୫୩ ନମ୍ବର ଜାତୀୟ ରାଜପଥ ଲୁକୁପାଲି ଛକ ଠାରେ ମୁହାଁମୁହିଁ ଧକ୍କା ହୋଇଥିଲା । ଫଳରେ ଦୁଇ ବାଇକରେ ଥିବା ୬ ଜଣ ଯାକ ରାସ୍ତାରେ ପଡ଼ି ଛଟପଟ ହେଉଥିଲେ । ଖବର ପାଇ ସଦର ଥାନା ପୋଲିସ ଘଟଣାସ୍ଥଳକୁ ପହଞ୍ଚି ଉଭୟ ବାଇକରେ ଥିବା ୬ ଜଣ ଆହତଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇ ଭର୍ତ୍ତି କରିଥିଲେ । ସେଠାରେ ସୁମନ୍ତ ସାହୁ ଓ ପାରଶ ରାମ ନାଗେଶଙ୍କୁ ଡାକ୍ତର ମୃତ ଘୋଷଣା କରିଥିଲେ । ଅନ୍ୟ ୪ଜଣ ଗୁରୁତର ଭାବରେ ଜିଲ୍ଲା ଚିକିତ୍ସାଳୟରେ ଚିକିତ୍ସିତ ହେଉଛନ୍ତି । ଆଜି ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯିବ ବୋଲି ତଦନ୍ତକାରୀ ପୋଲିସ ଅଧିକାରୀ ସୂଚନା ଦେଇଛନ୍ତି ।