ବାଲିଗୁଡା, (ସୁରେନ୍ଦ୍ର କୁମାର ପାଣିଗ୍ରାହୀ) : କନ୍ଧମାଳ ଜିଲ୍ଲା ବାଲିଗୁଡା ଥାନା ଅନ୍ତର୍ଗତ ଗୁମିକିଆ ପଞ୍ଚାୟତର ସରୁଲାଇ ଗ୍ରାମର ଜଣେ ବୃଦ୍ଧଙ୍କୁ ଶନିବାର ଦିନ ଜଙ୍ଗଲି ବାରହା କାମୁଡି ଦେବାରୁ ଗୁରୁତର ଅବସ୍ଥାରେ ବାଲିଗୁଡା ଉପଖଣ୍ଡ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଥିବା ଖବର ମିଳିଛି । ଘଟଣାରୁ ପ୍ରକାଶ ଯେ ସରୁଲାଇ ଗ୍ରାମର ଗାଟିସା ପ୍ରଧାନ(୭୦) ପ୍ରତ୍ୟକ ଦିନ ଭଳି ଶନିବାର ସକାଳୁ ଘରୁ ବାହାରି ନିଜ ବିଲରେ ଖରାଦିନିଆ ଧାନ ଲଗାଇବା ପାଇଁ ବିଲକୁ ଯାଇଥିଲେ । ବିଲରେ କାମ କରୁଥିବା ବେଳେ ଏକ ଜଙ୍ଗଲି ବାରହାଟି ହଠାତ ଧାଇଁ ଆସି ଗାଟିସାଙ୍କୁ ହାତ, ଜଙ୍ଘ ଓ ଗୋଡରେ କାମୁଡିବା ଆରମ୍ଭ କରିଥିଲା । ସେ ଚିତ୍କାର କରିବାରୁ ବରାହାଟି ପଳାଇ ଯାଇଥିଲା । ସ୍ଥାନୀୟ ଲୋକ ଗୁରୁତର ଅବସ୍ଥାରେ ଗାଟିସାକୁ ବାଲିଗୁଡା ଉପଖଣ୍ଡ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରି ଚିକିତ୍ସା କରାଇଛନ୍ତି ।