ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ଜିଲ୍ଲା ପୁଇନ୍ତଲା ବ୍ଲକ ବିଚ୍ଛୁପାଲି ନିକଟସ୍ଥ ଝାରବଲାଙ୍ଗିର ଛକଠାରେ ୟାଫ ଦ୍ଵାରା ପରିଚାଳିତ ଅସହାୟ, ଦୁର୍ଘଟଣା ଗ୍ରସ୍ତ, ମାଲିକ ବିହୀନ ଗୋବଂଶମାନଙ୍କ ଆଶ୍ରୟ କେନ୍ଦ୍ର ଶ୍ରୀ ସୁରଭି ଗୋସେବା ଧାମ୍ ବଲାଙ୍ଗିର ଜିଲ୍ଲାପାଳ ଚଞ୍ଚଳ ରାଣାଙ୍କ ଦ୍ଵାରା ଉଦ୍ଘାଟିତ ହୋଇଯାଇଛି । ସଂସ୍ଥାର ସମ୍ପାଦକ ତ୍ରିଲୋଚନ ମେହେରଙ୍କ ଦ୍ଵାରା ପରିଚାଳିତ କାର୍ଯ୍ୟକ୍ରମରେ ଗୋସେବକ ରାମଚନ୍ଦ୍ର ବିଶ୍ୱାଳ ବକ୍ତା, ବଲାଙ୍ଗିର ଜିଲ୍ଲା ପଶୁସମ୍ପଦ ଅଧିକାରୀ ଡାକ୍ତର ସୁକୁରାମ ମୁଣ୍ଡା ସମ୍ମାନିତ ଅତିଥି, ଲୋକନାଥ ପାତ୍ର, ଆଚାର୍ୟ୍ୟ ରାମେଶ୍ୱରା ନନ୍ଦ ଅବଧୂତ ଯୋଗଦେଇ ଥିଲେ । ଗୋ ପୂଜନ ପରେ ଜିଲ୍ଲାପାଳ ଅନୁଷ୍ଠିତ ଉତ୍ସବରେ ଏହି ଗୋ ସେବା ଧାମ୍ର ପରିବେଶ ଓ ଅବସ୍ଥିତି ଦେଖି ସହର ନିକଟସ୍ଥ ଜାତୀୟ ରାଜପଥ କଡ଼ରେ ଥିବା ଏହି ଗୋଶାଳାକୁ ଏକ ଉତ୍ତମ ସେବା କେନ୍ଦ୍ର କରିବା ଦିଗରେ ତାଙ୍କର ସହଯୋଗ ରହିବ ବୋଲି କହିଥିଲେ । ଗୋ ବଂଶ ପ୍ରତି ସମ୍ମାନ କରି ସୁରକ୍ଷା ଦେବା ପାଇଁ ଆଗଭର ହୋଇ ଉଦ୍ୟମ କରିଥିବା ସଂସ୍ଥାରେ ଯୋଗ ଦେଇଥିବା ଲୋକଙ୍କୁ ପ୍ରଶଂସା କରିଥିଲେ । ଏଠାରେ ଜିଲ୍ଲାର ବିଭିନ୍ନ ଅଞ୍ଚଳରେ ଗୋ ପାଳନ କରି ସେବା କରୁଥିବା ଶତାଧିକ ମହିଳା ପୁରୁଷ ଯୋଗଦେଇଥିବ ବେଳେ ଦିନ ତମାମ ଚାଲିଥିବା ବିଭିନ୍ନ କାର୍ଯ୍ୟକ୍ରମରେ ଗାଈ ମହାତ୍ମା ପ୍ରବଚନ ସ୍ୱାମୀଜୀ ଦେଇଥିଲେ । ରାମ ଚଂଦ୍ର ବିଶ୍ଵାଳ, ପ୍ରଶାନ୍ତ କୁମାର ଡାଙ୍ଗ, କପିଳାସ ମହାକୁର ନିଜ ନିଜ ଅଭିଜ୍ଞତା କହିଥିଲେ ।