ବଲାଙ୍ଗିର, (କେପିଏନ୍ଏସ୍) : ପିକ୍ଅପ୍ ଗାଡ଼ିରେ ଚୋରାଚାଲାଣ ହେଉଥିବା ବେଳେ ୯୨୦ କେଜି ଗଂଜେଇ ଜବତ୍ କରିଛି ବଲାଙ୍ଗିର ଟାଉନ୍ ପୋଲିସ । ଟାଉନ୍ ଥାନା ଆଇଆଇସି ବିଶ୍ୱଜିତ ମନବୋଧଙ୍କ ପକ୍ଷରୁ ମିଳିଥିବା ସୂଚନା ଅନୁସାରେ କୌଣସି ବିଶ୍ୱସ୍ତ ସୂତ୍ରରୁ ଖବର ପାଇ ବଲାଙ୍ଗିର-ସମ୍ବଲପୁର ରୋଡ଼ ଯୁବୋଦୟ କଲେଜ ସାମ୍ନାରେ ଗଂଜେଇ ଚୋରାଚାଲାଣ କରୁଥିବା ଓଆର୍ ୧୭ଜି ୫୯୧୯ ନମ୍ବର ପିକ୍ଅପ୍ ଗାଡ଼ିକୁ କାବୁ କରିଥିଲା ବଲାଙ୍ଗିର ଟାଉନ୍ ପୋଲିସ । ଏହି ଗାଡ଼ିରୁ ୯୨୦ କେଜି ଗଂଜେଇ ଜବତ୍ କରାଯାଇଥିବା ବେଳେ ୪ ଜଣ ଅଭିଯୁକ୍ତଙ୍କୁ ଗିରଫ୍ କରାଯାଇଥିଲା । ତେବେ ଉକ୍ତ ପିକ୍ଅପ୍ ଗାଡିକୁ ମଧ୍ୟ ଜବତ କରାଯାଇଥିବା ସୂଚନା ଦିଆଯାଇଛି । ଅଭିଯୁକ୍ତମାନେ ହେଲେ ବଲାଙ୍ଗିର ମାଲପଡ଼ାର ପ୍ରଶାନ୍ତ କ୍ଷେତି, କଂଟାମାଲ ଥାନା ଅନ୍ତର୍ଗତ ମଲିକପଦର୍ ନିବାସୀ ସୁନୀଲ ସାହୁ, ମନମୁଣ୍ଡାର ଚୋକା ଓରଫ୍ ସରୋଜ ଷାଣ୍ଢ ଓ ଭୁବନେଶ୍ୱର ପାତ୍ରପଡ଼ାର ସୁଶୀଲ କୁମାର ବାରିକ୍ । ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ସୂଚନା ମିଳିଛି ।