ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ଜିଲ୍ଲାରେ ମାତିଛନ୍ତି ଗଂଜେଇ ମାଫିଆ । ଭିନ୍ନ ଭିନ୍ନ ଉପାୟରେ କରୁଛନ୍ତି ଗଂଜେଇ ଚାଲାଣ । ବଲାଙ୍ଗିର ପୋଲିସ ଗଦା ଗଦା ଗଂଜେଇ ଜବତ୍ କରୁଥିବା ବେଳେ ମାଳ ମାଳ ଗଂଜେଇ ମାଫିଆ କୁଚିଆ ମଧ୍ୟ ଗିରଫ୍ ହେଉଛନ୍ତି । ତଥାପି ଗଂଜେଇ ଚୋରା ଚାଲାଣ ବଲାଙ୍ଗିରରେ ଥମିବାର ନାଁ ନେଉନାହିିଁ । ଆଜି ବଲାଙ୍ଗିର ରେଲୱେ ଷ୍ଟେସନଠାରେ ଟ୍ରେନରେ ଗଂଜେଇ ଚାଲାଣ ବେଳେ ଉଦ୍ଧାର କରିଛନ୍ତି ରେଲୱେ କର୍ମଚାରୀ । କିନ୍ତୁ ଫେରାର୍ ମାରିବାରେ ସଫଳ ହୋଇଛି ଗଂଜେଇ ମାଫିଆ । ଗତକାଲି ବିଲାସପୁରରୁ ରାୟପୁର ଯାଉଥିବା ପାସେଞ୍ଜର ଟ୍ରେନ୍ ବଲାଙ୍ଗିର ରେଲୱେ ଷ୍ଟେସନରେ ପହଞ୍ଚିଥିଲା । ଟ୍ରେନ ଛିଡ଼ା ହୋଇଥିବା ସମୟରେ ହଠାତ୍ ଜଣେ ଲୋକ ଆସି କୋଚ୍ ତଳେ ଥିବା ବେଟେରି ବକ୍ସରେ କିଛି ଜିନିଷ ରଖି ବଗି ଭିତରକୁ ଚାଲିଯାଇଥିଲା । ଟ୍ରେନ ଡ୍ରାଇଭର ଓ ରେଲୱେ କର୍ମଚାରୀ ଏହା ଦେଖିବା ପରେ ସଂଗେ ସଂଗେ ବ୍ୟାଟେରୀ ବକ୍ସ ନିକଟକୁ ଯାଇ ଚାରୋଟି ପ୍ୟାକେଟ ବାହାର କରିଥିଲେ । ଚାରୋଟି ପ୍ୟାକେଟରେ ଗଂଜେଇ ଥିବା ଜଣାପଡିଛି । ଗଂଜେଇ ପ୍ୟାକେଟଗୁଡିକୁ ଆରପିଏଫ୍ ଜବତ୍ କରି ତଦନ୍ତ ଜାରୀ ରଖିଛି । ପାସେଞ୍ଜର ରାୟପୁର ଅଭିମୁଖେ ଯାତ୍ରା କରିଥିବା ବେଳେ ଫେରାର୍ ମାରିଛି ଗଂଜେଇ ମାଫିଆ ।