ସାନଖେମୁଣ୍ଡି : ପାଟପୁର ଥାନା ଏସ୍ ଗୋପାଳପୁର ପଞ୍ଚାୟତ ପାହାଡିଆ ଜଙ୍ଗଲ ଜମିରେ ଚାଷ କରାଯାଇଥିବା ବେଆଇନ ଗଂଜେଇ ଚାଷ ପୋଡି ପୋଲିସ ନଷ୍ଟ କରିଛି । ପାହାଡିଆ ଅବଡା ଖାବଡା ରାସ୍ତାରେ ଝରଣା ନିକଟରେ ଏକର ଏକର ଗଞ୍ଜେଇ ଗଛ ଚାଷ ହୋଇଥିବା ଖବର ପାଇ ପୋଲିସ ପୂର୍ବ ପ୍ରସ୍ତୁତି ଅନୁଯାୟୀ ଚଢ଼ାଉ କରିଥିଲା । ପ୍ରାୟ ୨୦ ଏକର ୨୨୦୦୦ ଗଞ୍ଜେଇ ଗଛ ଯାହାର ଆନୁମାନିକ ମୂଲ୍ୟ ଦୁଇ କୋଟିରୁ ଅଧିକ ହେବ ସେ ସବୁକୁ କାଟି ପୋଡି ନଷ୍ଟ କରାଯାଇଛି । ଏଥି ସହ ଖଳାରେ ପାଲ ଉପରେ ସୁଖେଇ ଥିବା ଗଞ୍ଜେଇ ପୋଡି ନଷ୍ଟ କରଯାଇଥିଲା । ବୁଧବାର ଆସିକା ଏସଡିପିଓ ଉମା ଶଙ୍କର ସିଂ ଙ୍କ ନେତୃତ୍ୱରେ ପାଟପୁର ଥାନା ଅଧିକାରୀ ସବ୍ୟସାଚୀ ମଲ୍ଲ, ବଡ଼ଗଡ଼ ସୁରଜ କୁମାର ଝଙ୍କାର, ଧରାକୋଟ ମମତା କୁମାରୀ ସାମନ୍ତରାୟ ସହ ଏକ ପ୍ଲାଟୁନ ପୋଲିସ ଫୋର୍ସ ଓ ଏସ ଗୋପାଳପୁର ରାଜସ୍ୱ ସର୍କିଲର ରାଜସ୍ୱ ନିରୀକ୍ଷକ ଶ୍ରୀନିବାସ ପାଣିଗ୍ରାହୀ ପ୍ରମୁଖ ଚଢାଉ କରିଥିଲେ ।