- ଅହିଂସା ମାର୍ଗ ହିଁ ବିଶ୍ୱରେ ଶାନ୍ତି ପ୍ରତିଷ୍ଠା କରିପାରିବ
ବଲାଙ୍ଗିର, (କେପିଏନ୍ଏସ୍) : ଆଜି ସ୍ଥାନୀୟ ଗାନ୍ଧୀ ଭବନ ସମ୍ମୁଖରେ ଥିବା ଗାନ୍ଧୀ ପ୍ରତିମୂର୍ତ୍ତିଠାରେ ମହାତ୍ମା ଗାନ୍ଧୀଙ୍କ ମହାପ୍ରୟାଣ ଦିବସ ପାଳିତ ହୋଇଯାଇଛି । ଏଠାରେ ଥିବା ଗାନ୍ଧିଜୀଙ୍କ ପ୍ରତିମୂର୍ତ୍ତିରେ ଦୀପ ପ୍ରଜ୍ୱଳନ ଓ ପୁଷ୍ପମାଲ୍ୟ ଅର୍ପଣ କରି ବଲାଙ୍ଗିରର ବୁଦ୍ଧିଜୀବୀ ଓ ଗାନ୍ଧୀଭବନର ପାଠକଗଣ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ଗାନ୍ଧୀସ୍ମୃତି କମିଟି ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଆବାହକ ଯୁଧିଷ୍ଠିର ମେହେର ସଂଯୋଜନା କରିଥିବା ବେଳେ ବିଶିଷ୍ଠ ସୂଚନାଅଧିକାର କର୍ମୀ ହେମନ୍ତ କୁମାର ପଣ୍ଡା, ଶିକ୍ଷାବିତ୍ ସନାତନ ଠାକୁର ଓ ବରିଷ୍ଠ ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା ଗାନ୍ଧିଜୀଙ୍କ ଆଦର୍ଶର ସ୍ମୃତିଚାରଣ କରିଥିଲେ । ମହାତ୍ମା ଗାନ୍ଧୀଙ୍କୁ ହତ୍ୟା କରାଗଲା କିନ୍ତୁ ତାଙ୍କ ଆହିସାଂ ରୂପକ ଆଦର୍ଶକୁ କେହି କେବେ ହତ୍ୟା କରିପାରିବେ ନାହିଁ, ଅହିଂସା ମାର୍ଗ ହିଁ ବିଶ୍ୱରେ ଶାନ୍ତି ପ୍ରତିଷ୍ଠା କରିପାରିବ ବୋଲି ବକ୍ତାଗଣ ମତବ୍ୟକ୍ତ କରିଥିଲେ । ଆଜି ବିଶ୍ୱ ଯୁଦ୍ଧଖୋର ମନୋବୃତ୍ତିରେ ପରିଚାଳିତ ହେଉଥିବା ବେଳେ ଗାନ୍ଧୀଙ୍କ ଅହିଂସାର ପଥ ହିଁ ଏହାକୁ ପ୍ରଶମିତ କରିପାରିବ ବୋଲି ଆଲୋଚନା ହୋଇଥିଲା । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଶିକ୍ଷାବିତ୍ ଗୋପଭୂଷଣ ନାଥ, ମନୋରଂଜନ ପୁରୋହିତ, ଯଥା ବିଶ୍ୱାଳ, ଅରୁଣ ମିଶ୍ର, ଗାନ୍ଧୀଭବନର ପାଠକଗଣ ବହୁସଂଖ୍ୟାରେ ଯୁବକ/ଯୁବତୀ ଯୋଗ ଦେଇଥିଲେ । ଶେଷରେ ସାମ୍ବାଦିକ ବିଭୁକଲ୍ୟାଣ ଗଡତ୍ୟା ଧନ୍ୟବାଦ ଅର୍ପଣ କରିଥିଲେ ।