- ଅଭିଯୁକ୍ତ ଯୁବକ ନିଖୋଜ ନେଇ ବାପାଙ୍କ ପାଲଟା ଅଭିଯୋଗ : ଉଭୟ ପକ୍ଷରୁ ମାମଲା ରୁଜ୍ଜୁ
– ଅଭିଯୁକ୍ତ ନିଖୋଜ ନା ଫେରାର କରାଯାଇଛି
ମୁରିବାହାଲ, (ଦୁର୍ଗାନନ୍ଦ ମହାକୁର) : ବଲାଙ୍ଗିର ଜିଲ୍ଲା ମୁରିବାହାଲ ଥାନା ବଡସାଇମରା ଗ୍ରାମର ଜଣେ ବିବାହିତା ମହିଳାଙ୍କୁ ଜଣେ ଆଦିବାସୀ ଯୁବକ ରାତିରେ ଘରକୁ ପଶି ଦୁଷ୍କର୍ମ ଉଦ୍ୟମ କରିଥିଲା । ପୀଡ଼ିତା ମହିଳା ଥାନାରେ ପ୍ରଥମେ ଅଭିଯୋଗ କରିଥିବା ବେଳେ ଅଭିଯୁକ୍ତ ଯୁବକ ଘରୁ ନିଖୋଜ ଥିବା ନେଇ ତାଙ୍କ ବାପା ପାଲଟା ଅଭିଯୋଗ କରିଥିବା ଚର୍ଚ୍ଚାର ବିଷୟ ହୋଇଛି । ଉଭୟ ପକ୍ଷରୁ ଦୁଇଟି ମାମଲା ରୁଜ୍ଜୁ କରି ପୁଲିସ ତଦନ୍ତ ଜାରି ରଖିଥିବା ଜଣାପଡିଛି । ପୁଲିସ୍ ସୂତ୍ରରୁ ପ୍ରକାଶ ଯେ ବଡସାଇମରା ଗ୍ରାମର କାର୍ତ୍ତିକ ଠେଲା(୪୦)ଙ୍କ ପତ୍ନୀ ଉଷାରାଣୀ ଠେଲା(୩୫)ଙ୍କୁ ଶୁକ୍ରବାର ରାତିରେ ଗ୍ରାମର ରତନଲାଲ ଭୋଇ(୬୧)ଙ୍କ ପୁଅ ଚୈତନ୍ୟ ଭୋଇ(୨୮)ନାମକ ଜଣେ ଆଦିବାସୀ ଯୁବକ ଘରକୁ ପଶି ଟଣାଓଟରା କରି ବଦନାମ କରିଦେବାକୁ ଧମକଚମକ ଦେଇ ଦୁଷ୍କର୍ମ ଉଦ୍ୟମ କରିଥିଲେ । ମହିଳାଜଣଙ୍କ ଶନିବାର ସକାଳେ ସ୍ଵାମୀଙ୍କ ସହ ଆସି ଅଭିଯୁକ୍ତ ଚୈତନ୍ୟ ଭୋଇଙ୍କ ନାମରେ ଥାନାରେ ଦୁଷ୍କର୍ମ ଉଦ୍ୟମ ଅଭିଯୋଗ କରିଥିଲା । ଏ ସମ୍ପର୍କରେ ପୁଲିସ ଦଫା ୩୫୪(କ) କେଶ ନଂ ୨୬୯/୨୩ରୁଜ୍ଜୁ କରି ଅଧିକ ତଦନ୍ତ କରୁଥିଲା । ଅନ୍ୟପକ୍ଷରେ ଅଭିଯୁକ୍ତ ଯୁବକ ଚୈତନ୍ୟଙ୍କ ବାପା ରତନଲାଲ ଭୋଇ ଅଭିଯୋଗକାରିଣୀ ମହିଳା ତାଙ୍କ ସ୍ଵାମୀଙ୍କ ସହିତ ଦିନ ୧୧ଟାରେ ଆସି ତାଙ୍କୁ ଓ ତାଙ୍କ ପରିବାର ଲୋକଙ୍କୁ ଜୀବନରୁ ମାରି ଦେବାର ଧମକ ଦେଇ ଜାତି ଆକ୍ଷେପ କରି ଗାଳିଗୁଲଜ କରିଥିବାରୁ ସେତେବେଳଠାରୁ ତାଙ୍କ ପୁଅ ଚୈତନ୍ୟ ଘରୁ ନିଖୋଜ ଥିବା ଥାନାରେ ପାଲଟା ଅଭିଯୋଗ କରିଥିଲେ । ଏ ସମ୍ପର୍କରେ ମଧ୍ୟ ପୁଲିସ ଆଦିବାସୀ ନିର୍ଯାତନା ଆଇନ ଏଟ୍ରୋସିଟି ମାମଲାରେ କେଶ ନଂ ୨୭୦/୨୩ ରୁଜ୍ଜୁ କରି ଅଧିକ ତଦନ୍ତ ଜାରି ରଖିଛି । ପୀଡ଼ିତା ମହିଳା ଥାନାରେ ପ୍ରଥମେ ଦୁଷ୍କର୍ମ ଅଭିଯୋଗ କରିବାର ବହୁ ସମୟ ପରେ ଅଭିଯୁକ୍ତ ଯୁବକ ନିଖୋଜ ଥିବା ନେଇ ତାଙ୍କ ବାପାଙ୍କ ପାଲଟା ଅଭିଯୋଗ ଓ ମହିଳା ଓ ତାଙ୍କ ସ୍ଵାମୀଙ୍କ ନାମରେ ଏଟ୍ରୋସିଟି ମାମଲା ରୁଜ୍ଜୁ ଘଟଣା ଅଧିକ ସନ୍ଦେହ ସୃଷ୍ଟି କରୁଛି । ଥାନାରେ ଦୁଷ୍କର୍ମ ଅଭିଯୋଗ ପରେ ଯୁବକଙ୍କ ନିଖୋଜ ମାମଲା ଘଟଣାର ପୁଲିସ ଅଧିକ ତଦନ୍ତ କଲେ ପ୍ରକୃତ ରହସ୍ୟ ଜଣାପଡ଼ିବ । ଉଭୟ ପକ୍ଷରୁ ଦୁଇଟି ମାମଲା ରୁଜ୍ଜୁ କରି ପୁଲିସ ଅଧିକ ତଦନ୍ତ ଜାରି ରଖିଥିବା ଆଇଆଇସି ସିପୋରା ସରାୟ ଲୁଗୁନ ପ୍ରକାଶ କରିଛନ୍ତି ।