ବ୍ରହ୍ମପୁର, (କେ.ସତ୍ୟନାରାୟଣ ରେଡ୍ଡୀ) : ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ଥାନା ଅନ୍ତର୍ଗତ ଭାଟକୁମୁଣ୍ଡା ସ୍ଥିତ ଭାବନ୍ଧ ନିକଟ ପାଗଳାବାବା ଆଶ୍ରମ ସମ୍ମୁଖରେ ଗତକାଲି ଏକ ସଡ଼କ ଦୁର୍ଘଟଣା ଘଟି ତିନିଜଣ ସାଇକେଲ ଆରୋହୀ ଗୁରୁତର ହୋଇ ଚିକିତ୍ସାଧୀନ ଅବସ୍ଥାରେ ଅଛନ୍ତି । ସୂଚନା ଅନୁସାରେ ଏକ କାର କ୍ଷୀପ୍ର ବେଗରେ ଆସି ଅଚାନକ ଏକ ଛୋଟିଆ ଦୋକାନ ଭିତରେ ପଶିଗଲା । ରାସ୍ତା ପାର୍ଶ୍ଵରେ ଯାଉଥିବା ତିନିଜଣ ସାଇକେଲ ଆରୋହୀଙ୍କ ଉପରେ କାର ମାଡ଼ିଗଲା । ଏହି ଛାତିଥରା ଦୃଶ୍ୟ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା । ଗୁରୁତର ତିନିଜଣ ହେଲେ ନରେନ୍ଦ୍ରପୁର କ୍ଷେତ୍ରମୋହନ ବିଜ୍ଞାନ ମହାବିଦ୍ୟାଳୟର ଛାତ୍ରୀ ସୁମିତ୍ରା ସାମଲ, ଇତିଶ୍ରୀ ପ୍ରଧାନ, ଶୁଭଶ୍ରୀ ନାୟକ । ଏମାନଙ୍କୁ ପ୍ରଥମେ ଭାଟକୁମୁଣ୍ଡା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା । ସୂଚନା ଥାଉକି, କାରଟି ବ୍ରେକ ଫେଲ ହୋଇ ଭାରସାମ୍ୟ ହରାଇଥିବା କୁହାଯାଉଛି । ଘଟଣାସ୍ଥଳରୁ ପୋଲିସ ସିସି ଟିଭିର ଫୁଟେଜ ବାହାର କରି ଦୁର୍ଘଟଣା ଗ୍ରସ୍ତ କାରକୁ ଜବତ କରିଛନ୍ତି । ପୋଲିସ ଅଧିକ ତଦନ୍ତ ଚଳାଇଛି ।