ନବରଙ୍ଗପୁର : ପ୍ରଚାର ବାହାନାରେ ଡ଼କାୟତି ହୋଇଥିବା ଏକ ଖବର ଆସିଛି । ନିର୍ବାଚନ ପ୍ରଚାର କରିବା ବାହାନାରେ ଆସି ଡକାୟତି କରିଛନ୍ତି ଦୁର୍ବୃତ୍ତ । ସୂଚନା ଅନୁସାରେ ୩ ଜଣ ମୁଖା ପିନ୍ଧା ଦୁର୍ବୃତ୍ତ ନବରଙ୍ଗପୁର ଜିଲ୍ଲା କୋଡ଼ିଙ୍ଗା ଥାନା ଅନ୍ତର୍ଗତ ଝାହାଜଭଟ୍ଟା ସାହିର ଜଣେ ମହିଳାଙ୍କ ଘରେ ପଶି ତାଙ୍କ ବେକରେ ଛୁରୀ ଲଗାଇ ଲୁଟ୍ କରିଛନ୍ତି । ଦୁର୍ବୃତ୍ତମାନେ ମହିଳାଙ୍କ ଠାରୁ ସୁନା ଓ ଟଙ୍କା ଲୁଟ୍ କରି ନେଇଥିବା ବେଳେ ଏନେଇ ମହିଳା ଜଣଙ୍କ ଥାନାରେ ଲିଖିତ ଅଭିଯୋଗ କରିଛନ୍ତି । ଝାହାଜଭଟ୍ଟା ସାହିର ମୁକୁନ୍ଦ ହରିଜନଙ୍କ ସ୍ତ୍ରୀ ପିଙ୍କି ହରିଜନ ଘରେ ସନ୍ଧ୍ୟା ସମୟରେ ଏକୁଟିଆ ଥିବା ବେଳେ ତିନି ଜଣ ମୁଖା ପିନ୍ଧା ଦୁର୍ବୃତ୍ତ ତାଙ୍କ ଘରକୁ ଆସି ନିର୍ବାଚନ ପାଇଁ ଭୋଟ୍ ଭିକ୍ଷା କରିବା ବାହାନାରେ କବାଟ ବାଡେଇଥିଲେ । ଏହି ସମୟରେ ପିଙ୍କି କବାଟ ଖୋଲିବାରୁ ଦୁବୃର୍ତ୍ତମାନେ ତାଙ୍କ ବେକରେ ଛୁରୀ ଲଗାଇ ଗଡରେଜ୍ ଚାବି ମାଗିଥିଲେ । ପିଙ୍କି ପାଟି କରିବାରୁ ତାଙ୍କୁ ଜୀବନରୁ ମାରିଦେବାକୁ ଧମକ ମଧ୍ୟ ଦେଇଥିଲେ । ଡ଼କାୟତ ଦଳ ସୁନା ହାର, କାନଫୁଲ ସହ ନଗଦ ୭୦ ହଜାର ଟଙ୍କା ଚୋରି କରି ନେଇଥିବା ଅଭିଯୋଗ ହୋଇଛି ।