ମ.ରାମପୁର, (ହେମନ୍ତ ସାହୁ) : କଳାହାଣ୍ଡି ଜିଲ୍ଲା ମ.ରାମପୁର ଥାନା ଅର୍ନ୍ତଗତ ମଦନପୁର ଗାଁର ଗ୍ରାମବାସୀ ଦୁଇ ଜଣ ଡକାୟତକୁ ଧରି ଉତ୍ତମ ମଧ୍ୟମ ଦେଇ ଦୌଡିରେ ବାନ୍ଧି ଥାନାରେ ଜିମା ଦେଇଥିବା ବେଳେ ସେମାନଙ୍କ ଠାରୁ ଗୋଟିଏ ପିସ୍ତଲ ଓ ଦୁଇଟି ଅଫୁଟା ଗୁଳି ସହ ବ୍ୟବହାର କରିଥିବା ବାଇକକୁ ଜବତ କରିଛି ପୋଲିସ । ମଦନପୁର ଗାଁ ଦେଇ ଏମ୍ ରାମପୁରକୁ ଏକ ବାଇକରେ ଦୃତ ଗତିରେ ଦୁଇ ଜଣ ଯାଉଥିବା ସମୟରେ ସେମାନଙ୍କୁ ଆଉ ଦୁଇ ଜଣ ଚୋର ଯାଉଛି କହି ପାଟିକରି ପିଛା କରୁଥିଲେ । ସେମାନଙ୍କ ପାଟି ଶୁଣି ଗାଁ ଲୋକେ ବାଇକକୁ ଅଟକାଇଥିଲେ । ହେଲେ ସେମାନେ ବାଇକ ଛାଡି ଫେରାର ହେବାକୁ ଉଦ୍ୟମ କରୁଥିବା ବେଳେ ଗାଁ ଲୋକେ ଦୁଇ ଜଣକୁ କାବୁ କରିଥିଲେ । ପରେ ଏକ ଖୁଣ୍ଟରେ ବାନ୍ଧି ଉତ୍ତମ ମଧ୍ୟମ ଦେଇ ପୋଲିସକୁ ଖବର ଦେଇଥିଲେ । ଥାନା ଅଧିକାରୀ ସତ୍ୟ ନାରାୟଣ ପ୍ରଧାନ ଏଏସ୍ଆଇ କାହ୍ନୁ ଚରଣ ପଣ୍ଡା ଓ ପୋଲିସ ସଦଳବଳ ଘଟଣାସ୍ଥଳରେ ପହଂଚି ଦୁଇ ଡକାୟତକୁ ଥାନାକୁ ଆଣି ଅଟକ ରଖି ଅଧିକ ତଦନ୍ତ ଜାରି ରଖିଛି । ଅଟକ ଡକାୟତ ଦୁଇ ଜଣ ହେଲେ ସୁବର୍ଣ୍ଣପୁର ଜିଲ୍ଲା ତରଭା ଅଞ୍ଚଳର ଅର୍ଡା ଗ୍ରାମର ନିବାସ ବାରିକ, ଟିଟିପାଲି ମନୋଜ କୁମାର ବୋଲି ଜଣାପଡିଥିବା ବେଳେ ସେମାନଙ୍କ ନାଁ ବିଭିନ୍ନ ଥାନାରେ ଅପରାଧିକ ମାମଲା ରହିଥିବା ପୋଲିସ ସୂତ୍ରରୁ ଜଣାପଡିଛି ।