ବଲାଙ୍ଗିର, (କେପିଏନ୍ଏସ୍) : ମହଙ୍ଗା ପଡ଼ିଲା ଯୁବତୀଙ୍କୁ ବ୍ଲାକମେଲ କରିବା । ବ୍ଲାକମେଲର୍କୁ ଗିରଫ କରି କୋର୍ଟ ଚାଲାଣ କଲା ବଲାଙ୍ଗିର ସାଇବର ପୁଲିସ । ଗତ ଗୁରୁବାର ରାତିରେ ଜଣେ ଯୁବତୀଙ୍କୁ କେହି ଜଣେ ଅଜଣା ବ୍ୟକ୍ତି ହ୍ୱାର୍ଟସ୍ଆପରେ ଭିଡିଓ କଲ୍ ଓ ଅଡିଓ କଲ୍ କରି ଅସଭ୍ୟ ମେସେଜ କରିଥିଲା । ତା ସହ ଶାରୀରିକ ସମ୍ପର୍କ ରଖିବା ପାଇଁ କହୁଥିଲା । ଏନେଇ ଶୁକ୍ରବାର ସକାଳେ ପୀଡ଼ିତା ବଲାଙ୍ଗିର ସାଇବର ଥାନାରେ ଏକ ଅଭିଯୋଗ ଦାଖଲ କରିଥିଲେ । ମାମଲା ରୁଜୁକରି ପୁଲିସ ଘଟଣାର ତଦନ୍ତ ଆରମ୍ଭ କରିଥିଲା । ସାଇବର ଥାନାର ଆଇଆଇସି ଭାରତୀ ନାଏକ ଓ ଟିମ୍ ବିଶେଷ ସୂତ୍ରରୁ ଖବର ପାଇ ପୁଇଁତଲା ଥାନା ବହାଲବୁକା ଗ୍ରାମକୁ ଯାଇ ସେଠାରୁ କାହ୍ନା ଓରଫ ଗିରିଧାରୀ କୁଅଁରକୁ ଗିରଫ କରି ମୋବାଇଲ୍ ଫୋନ୍ ଜବତ କରିବା ସହ ଅଦାଲତରେ ହାଜର କରିଥିବା ଜଣାପଡିଛି ।