ବଲାଙ୍ଗିର, (କେପିଏନ୍ଏସ୍) : ବଲାଙ୍ଗିର ସହରରେ ଜଣେ ପୋଲିସ ବାବୁଙ୍କ ଚୋରା ପୀରତି ଏବେ ହାଟରେ ପଡ଼ି ବାଟରେ ଗଡ଼ୁଛି । ଏକ ସରକାରୀ କ୍ୱାର୍ଟର୍ରେ ପ୍ରେମିକା ସହ ପୋଲିସ ସ୍ୱାମୀଙ୍କୁ ପତ୍ନୀ ଠାବ କରିଥିବା ବେଳେ ରାତି ତମାମ ହୋ ହାଲ୍ଲା, ହଟଚମଟ ଦେଖିବାକୁ ମିଳିଛି । ଶେଷରେ ହସ୍ତକ୍ଷେପ କରିଛି ବଲାଙ୍ଗିର ଟାଉନ୍ ପୋଲିସ ।
ଚୋରା ପରକିଆ ପ୍ରୀତିରେ ବଲାଙ୍ଗିରର ଜଣେ ପୋଲିସ ବାବୁ ଏବେ ବେଶ୍ ଚର୍ଚ୍ଚାରେ । ସେ ବିବାହିତ । ତାଙ୍କର ଏକ ସନ୍ତାନ ମଧ୍ୟ ଅଛି । ହେଲେ ତଥାପି ରଙ୍ଗିଲା ପୋଲିସ ବାବୁ ଚୋରା ପୀରତିରେ ମସ୍ଗୁଲ୍ । ତାଙ୍କ ଏଇ ଚୋରା ପୀରତି ଏବେ ତାଙ୍କ ତଂଟିରେ କଂଟା ସାଜିଛି । ଦାଣ୍ଡରେ ପଡି ହାଟରେ ଗଡୁଛି । ଏହି ଘଟଣାଟି ଏଇ ନିକଟରେ ଏକ ବିଳମ୍ବିତ ରାତିରେ ସାମ୍ନାକୁ ଆସିଥିଲା । ତେବେ ହାତୀଶାଲପଡ଼ାରେ ଥିବା ଏକ ସରକାରୀ କ୍ବାର୍ଟରରେ ଜଣେ ମହିଳା ବିଲମ୍ବିତ ରାତିରେ ହଙ୍ଗାମା କରିଥିବାର ପଡାବାସୀ ଜାଣିବାକୁ ପାଇଥିଲେ । ତେବେ ସମ୍ପୃକ୍ତ ମହିଳାଙ୍କୁ ପଚରା ଯିବାପରେ ଏହି କଥା ସାମ୍ନାକୁ ଆସିଥିଲା । ସମ୍ପୃକ୍ତ ମହିଳା ଜଣକ ହେଉଛନ୍ତି ପୋଲିସ ବାବୁଙ୍କ ପତ୍ନୀ । ବଲାଙ୍ଗିର ରିଜର୍ଭ ପୋଲିସରେ ହାବିଲଦାର ଭାବରେ କାମ କରୁଥିବା ତାଙ୍କ ସ୍ୱାମୀ ଏଠି ତାଙ୍କ ପ୍ରେମିକା ସହ ମସ୍ଗୁଲ୍ ଥିବା ସେ ଜାଣିବାକୁ ପାଇଥିଲେ ଏବଂ ସେ ଏଠାକୁ ଆସିଥିଲେ । ହୋ-ହାଲ୍ଲା ହେବା ପରେ ପଡାବାସୀ ମଧ୍ୟ ସତ ଜାଣି ତାଙ୍କ ସହ ଛିଡା ହୋଇଥିଲେ । ସମ୍ପୃକ୍ତ ପୋଲିସ ବାବୁଙ୍କୁ ତାଙ୍କ ପ୍ରେମିକ ସହ ସେଠି ଦୀର୍ଘ ସମୟ ଅଟକ ରଖିଥିଲେ ସମସ୍ତେ ମିଶି । ଅନ୍ୟପଟେ ବଲାଙ୍ଗିର ଟାଉନ ପୋଲିସ ଘଟଣା ସ୍ଥଳରେ ପହଞ୍ଚି ସମ୍ପୃକ୍ତ ପୋଲିସ ବାବୁଙ୍କୁ ଥାନାକୁ ଆଣିଥିଲେ । ଏତିକି ବେଳକୁ ପୋଲିସ ବାବୁଙ୍କ ପ୍ରେମିକା ସେଠୁ ଚମ୍ପଟ ମାରିଥିଲେ ବୋଲି କୁହାଯାଇଛି ।
ତେବେ ସମ୍ପୃକ୍ତ ପୋଲିସ ବାବୁ କିଛି ବର୍ଷ ପୂର୍ବରୁ ଅଭିଯୋଗକାରୀ ମହିଳାଙ୍କୁ ଭଲ ପାଇ ପ୍ରେମ ବିବାହ କରିଥିଲେ । ୨୦୧୭ରେ ସେ ବୈଦିକ ରୀତିନୀତିରେ ବିବାହ କରିଥିବା ବେଳେ ଏବେ ତାଙ୍କର ଏକ ଶିଶୁ ମଧ୍ୟ ରହିଛି । ତେବେ ତାଙ୍କ ପୋଲିସ ସ୍ୱାମୀ ତାଙ୍କୁ ଛଳନା କରି ଅନ୍ୟ ଯୁବତୀ ସହ ସମ୍ପର୍କ ରଖିଥିଲେ, ଯାହା ଫଳରେ ଦୁଇଙ୍କ ବୈବାହିକ ସମ୍ପର୍କ ତିକ୍ତ ହୋଇଥିଲା । ସେପଟେ ନିଜେ ତାଙ୍କ ସ୍ୱାମୀ ଆଗକୁ ଏଭଳି ଭୁଲ କରିବେ ନାହିଁ ବୋଲି ସ୍ତ୍ରୀକୁ କହିଥିଲେ ବି ପୁଣି ଅନ୍ୟ ଯୁବତୀ ସହ ସମ୍ପର୍କ ରଖି ଚୋରା ପୀରତିରେ ମସ୍ଗୁଲ୍ ଥିବା ପତ୍ନୀ ଜାଣିବାକୁ ପାଇଥିଲେ । ସେଦିନ ବିଳମ୍ବିତ ରାତିରେ ତାଙ୍କ ସ୍ୱାମୀ ସଂପୃକ୍ତ ସରକାରୀ କ୍ବାର୍ଟରରେ ତାଙ୍କ ପ୍ରେମିକାଙ୍କ ସହ ରଂଗିଲା ଅବସ୍ଥାରେ ଥିବା ଜାଣି ସେ ଏଠାକୁ ଆସି ପ୍ରେମିକା ସହ ତାଙ୍କ ପୋଲିସ ସ୍ୱାମୀକୁ ଧରିଥିଲେ ବୋଲି ସେ କହିଛନ୍ତି । ତେବେ ସ୍ୱାମୀଙ୍କ ଏଭଳି ଚୋରା ପୀରତି ସ୍ୱଭାବ ଯୋଗୁଁ ସେ ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି ବୋଲି ପତ୍ନୀ ମତ ଦେଇଛନ୍ତି ।