ପଦ୍ମପୁର, (ନିରୋଜ କୁମାର ପାଣୀ) : ଆଜି ପଦ୍ମପୁର ରାଜାଜୀ ଟାଉନହଲ ପରିସରରେ ଚିତ୍ରଗୁପ୍ତ କଲ୍ୟାଣ ସଂଘ, ପଦ୍ମପୁର ଆନୁକୂଲ୍ୟରେ କରଣ ଜାତିର ଇଷ୍ଟଦେବ ଶ୍ରୀ ଶ୍ରୀ ଚିତ୍ରଗୁପ୍ତ ଦେବଙ୍କ ପୂଜନୋତ୍ସବ ମହାସମାରୋହରେ ଅନୁଷ୍ଠିତ ହୋଇଯାଇଛି । ସହର ତଥା ଆଖପାଖ ଅଞ୍ଚଳର କରଣ ଜାତିର ସପରିବାରଙ୍କୁ ନେଇ ଏକ ବର୍ଣ୍ଣାଢ୍ୟ ଶୋଭାଯାତ୍ରାର ସହର ପରିକ୍ରମା କରିଥିଲା । ପଣ୍ଡିତ ଅତ୍ରାହୀ ଭଞ୍ଜନ ପାଣିଗ୍ରାହୀ ପୂଜାକାର୍ଯ୍ୟର ଦାୟିତ୍ୱ ତୁଲାଇଥିବା ବେଳେ ମନୋଜ ମହାନ୍ତି ଓ ସବିତା ମହାନ୍ତି ଦମ୍ପତି କର୍ତ୍ତା ହୋଇଥିଲେ । ପୂଜାକାର୍ଯ୍ୟ ସରିବା ପରେ ସଂଘର ସଭାପତି ସନ୍ତୋଷ କୁମାର ମହାନ୍ତିଙ୍କ ଅଧ୍ୟକ୍ଷତାରେ ସାଧାରଣ ସଭା ଅନୁଷ୍ଠିତ ହୋଇଥିଲା । ଜାତିର ଦିବଂଗତ ଶିକ୍ଷୟତ୍ରୀ ସ୍ୱର୍ଗତ ସରୋଜିନୀ ଦାସଙ୍କ ଆତ୍ମାର ଶାନ୍ତି ପାଇଁ ଦୁଇ ମିନିଟ ନୀରବ ପ୍ରାର୍ଥନା କରାଯାଇଥିଲା । ସଂଘର ସଂପାଦକ ଅଶୋକ କୁମାର ବହିଦାର ସ୍ୱାଗତ ଭାଷଣ ଦେବା ସହିତ ବିବରଣୀ ପଠନ କରିଥିଲେ । ସର୍ବସମ୍ମତି କ୍ରମେ ଆଗତ ପ୍ରସ୍ତାବ ଗୁଡିକ ଉପରେ ଆଲୋଚନା କରାଯାଇ ସେ ଗୁଡିକୁ କାର୍ଯ୍ୟକାରୀ କରାଯାଇଥିଲା । ପରେ ସମସ୍ତେ ଏକତ୍ର ଅନ୍ନ ପ୍ରସାଦ ଗ୍ରହଣ କରିଥିଲେ । ଏଇ ଅବସରରେ ଗୀତ, ନୃତ୍ୟ, ରଙ୍ଗୋଲି ଓ କୁଇଜ ପ୍ରତିଯୋଗିତାର ଆୟୋଜନ କରାଯାଇଥିଲା । କରଣ ଯୁବକ ସଂଘର ସଭାପତି ପ୍ରୀତେଶ ବହିଦାର ଧନ୍ୟବାଦ ଅର୍ପଣ କରିଥିଲେ । ସମଗ୍ର କାର୍ଯ୍ୟକ୍ରମର ପରିଚାଳନାରେ ସମାଜର ସମସ୍ତ ସଦସ୍ୟ ସହଯୋଗ କରିଥିଲେ ।